Дзюдоны төрүттээччинэн Япония уһулуччу педагога, сырдатааччыта уонна тириэнньэрэ Кано буолар. Аныгы дзюдо, билиниллибит лиидэрдэринэн Япония дзюдоистара буолаллар.
Кулун тутар 21 күнүгэр, Покровскайга спорт дыбарыаһыгар, дзюдоҕа норуоттар икки ардыларынааҕы матчевай көрсүһүү буолан ааста. Манна, Монголия норуодунай өрөспүүбүлүкэтиттэн, Саха сирин оҕолорго сүүмэрдэммит хамаандата, Дьокуускай куорат өрөспүүбүлүкэтээҕи анал оҕо спортивнай оскуолаларын иитиллээччилэрэ уонна Покровскайтан «Хотой» өрөспүүбүлүкэтээҕи анал оҕо спортивнай оскуолатын хамаандалара кытыннылар.
Бу турнир сүрүн тэрийээччитэ, «Хотой» өрөспүүбүлүкэтээҕи анал оҕо спортивнай оскуола дириэктэрэ А.А.Куприяновы көрсөн бу улахан таһымнаах тэрээһин туһунан билиһиннэрэригэр көрдөстүм: - Ааспыт сылга Монголия уонна Покровскайтан «Хотой» өрөспүүбүлүкэтээҕи анал оҕо спортивнай оскуолатын хамаандаларын икки ардыларыгар матчевай көрсүһүү буолбута. Быйылгы сылга сайыннаран, Монголия, Дьокуускай к. хамаандаларын уонна өрөспүүбүлүкэ сүүмэрдэммит оҕолору ыҥыраммыт, барыта түөрт хамаанда кииристэҕинэ биһиги оҕолорбут омук оҕолорун кытта күрэхтэстэхтэринэ уопуттара улаатар, эрэллэрэ күүһүрэр. Монголияттан быйыл толору хамаанданан кэллилэр. Тириэнньэрдэрэ Наганз Батготов, 1985 с. самбоҕа аан дойду чемпионатын үрүҥ көмүс призера, 1986 с. үһүс призера, дзюдоҕа Монголия өрөспүүбүлүкэтин үс төгүллээх чөмпүйүөнэ. Кини иитиллээччитэ, бу соторутааҕыта оҕолорго Аан дойду күрэхтэһиитигэр призердаата. Хаҥалас улууһа уонна Монголия столицата Улаан-Баатар Чингэлтэй оройуона бырааттыы куораттарынан буолаллар. Ити үтүө сыһыан олохтонон, биһиги оскуолабыт сыллата Монголияҕа баран түмсүүлээх үөрэтэр эрчиллиилэргэ сылдьар. Монголия дзюдоистара 9 олимпийскай призердаахтар, Аан дойдуга биир күүстээх оскуолалаах судаарыстыба буолаллар. Оттон бу матчевай көрсүһүүгэ киирсэ сылдьар оҕолортон быйыл сайын ыытыллар VI «Азия оҕолоро» норуоттар икки ардыларынааҕы Оонньууларга кыттыахтара диэн эрэллээхпин,- диэтэ РФ, СӨ үтүөлээх тириэнньэрэ, Илиҥҥи күөн көрсүү көрүҥэр норуоттар икки ардыларынааҕы категориялаах судьуйа Александр Куприянов.
Бу да сырыыга, Монголия эдэр баатырдара күүстээх-уохтаах, чочуллубут албастардаах, кимэн киириилэрдээх сытыы-сылбырҕа киирсиилэри көрдөрдүлэр. Саха сирин үүнэн иһэр спортсменнара наһаа хаалсыбакка утары тахсан, бырахсан истилэр. Сыллата эбиллэн иһэллэрэ харахха тута быраҕыллар. «Бастыҥ спортсмен» аатын Монголия кэскиллээх дзюдоиһа Цогтгэрэл Хишигбаяр (тириэнньэрэ Н.Батготов), бастыҥ албастардаах спортсменынан Покровскайдааҕы «Хотой» өрөспүүбүлүкэтээҕи анал оҕо спортивнай оскуолатын Алданнааҕы салаатын иитиллээччитэ Артем Дедов (тириэнньэрэ Т.Еросейнов), Саха өрөспүүбүлүкэтин сүүмэрдэммит хамаандатын чилиэнэ Сергей Федоров, Дьокуускай куорат өрөспүүбүлүкэтээҕи анал оҕо спортивнай оскуолатын Дьокуускайдааҕы салаатын иитиллээччитэ Руслан Кричко (тириэнньэрэ А.Адылканов) уонна норуоттар икки ардыларынааҕы турнир бастыҥ судьуйатынан Баяржаргал (Монголия, дзюдо тириэнньэрэ) ааттаннылар. Норуоттар икки ардыларынааҕы матчевай көрсүһүүгэ, түмүккэ Монголия хамаандатын оҕолоро кыайыылааҕынан буоллулар. Иккис миэстэҕэ Покровскайтан «Хотой» өрөспүүбүлүкэтээҕи анал оҕо спортивнай оскуолатын дзюдоистара таҕыстылар уонна үһүс бочуоттаах миэстэҕэ Дьокуускай куорат өрөспүүбүлүкэтээҕи анал оҕо спортивнай оскуолатын иитиллээччилэрэ тигистилэр. Бу курдук, хардарыта уопут атастаһан Хаҥалас улууһун уонна Улаан-Баатар Чингэлтэй оройуонун бырааттыы сыһыаннара бөҕөргүүр.
Уйбаан УЙГУУРАП,
Степан САВВИН хаартыскаҕа түһэриитэ.
