Спортсменнар аммаларын аатын күүтүүлээх күрэхтэһиилэргэ чиэстээхтик көмүскүүргэ бэлэмнэрин эттилэр.
Аммаҕа Саха сирин норуоттарын VII спортивнай оонньууларгар улуус хамаандатын чилиэннэрэ кэтэр формаларын үөрүүлээх быһыыга — майгыга туттулар. Долгутуулаах түгэҥҥэ улуус баһылыга Николай Архипов, физкультура уонна спорт кэмитиэтин бэрэссэдээтэлэ Эдуард Ефимов, улуус волейболга федерациятын бэрэссэдээтэлэ Роман Алексеев кытыннылар.
«Оонньууларга улуус хамаандалара бэҕэһээҥҥиттэн саҕалаан кэлэн эрэллэр. Хамаандабытын кытта сирэй көрсөн күрэхтэһиигэ ситиһиилээхтик кытталларыгар баҕа санаабытын тириэртибит. Олохтоох хамаанда хайдах киирсэрин нэһилиэнньэ барыта, атын улуустар олус интэриэһиргииллэр. Күрэхтэһии түмүгэ хас биирдии хамаанда чилиэниттэн тутулуктаах. Улууспут чиэһин 190 — ча спортсмен көмүскүөҕэ. Спорт 14 көрүҥүттэн 12 көрүҥҥэ кыттыахпыт. Туох кыалларын барытын тэрийдибит. Анал идэлээх дьон, психологтар, массажистар үлэлэстилэр. Спортсменнар туруктара үчүгэй, санаалара кытаанах», — диэн этэр улуус баһылыга Николай Архипов.
«Бэлэмнэнии, тэрээһин үлэтэ эрдэттэн үрдүк таһымнаахтык барда. Хамаанда чилиэннэрэ олорор усулуобуйалара, дьиэлэрэ — уоттара, астара — үөллэрэ барыта баар, спортсменнар санаалара бөҕөх. Аны хайдах кытталлара, кыайаллара — хотоллоро, ситиһиилэрэ барыта бэйэлэриттэн тутулуктаах», — диэн көҥүл тустууга тренер Кирилл Павлов санаатын үллэстэр.
«Үөһээ Бүлүүгэ ыытыллыбыт Манчаары оонньууларыгар ох саанан ытыыга кыттыбытым. Быйыл олорон эрэ волейбол хамаандатыгар киирэн улууһум чиэһин көмүскээри сылдьабын. Бу көрүҥҥэ үһүс сылбын дьарыктанным. Үс улахан өрөспүүбүлүкэтээҕи күрэхтэһиигэ кыттыбыт уопуттаахпыт. Хамаанда бэлэмэ үчүгэй, бастыыр иһин киирсэр санаалахпыт», — диэн этэр хамаанда чилиэнэ Саргылана Яковлева.
Спортсменнарбытыгар буолаары турар күрэхтэһиилэргэ ситиһиилэри баҕарабыт.
Ааптар: Алтана Артемьева
