Эбийиэк сакаасчытынан улуустааҕы инвестиционнай-тутуу управлениета, бэдэрээтчитинэн Дьокуускайдааҕы «БАРТ-Строй» производственнай-тутуу фирмата буолар. Эбийиэк ахсынньы 1 күнүгэр үлэҕэ киириэхтээх.
Ньурба Антоновкатыгар успуорт комплексын тутуута саҕаланарыгар улахан өҥөлөөх киһинэн биир дойдулаахтара, Пекиннээҕи Олимпиада призера, успуорт миниистиринэн үлэлээбит Георгий Балакшин буолар. Тутуу уопсай суумата — 122 мөл. солк. Федеральнай бырагырааманан федеральнай уонна өрөспүүбүлүкэ бүддьүөттэрин суотугар тутуллар, итиэннэ улуустан ирээттэһэн үбүлээһин бэрээдэгинэн 37 мөл. солк. көрүллүбүтэ.
«БАРТ-Строй» производственнай-тутуу фирматын прораба Василий Ильинов кэпсииринэн, билигин 13 киһи үлэлии сылдьар. 5 киһилээх монтажниктар биригээдэтэ каркаһын туруорар. Кинилэр эрдэ Бүлүү, Амма Бөтүҥүн спорт-саалаларын таҥмыттар, Дьокуускайга эмиэ араас тутууга үлэлээбиттэр. Итиэннэ 8 киһилээх каменщиктар биригээдэлэрэ баар. Барыта кэлии дьон. Хаалбыт атын үлэлэргэ сахалар үлэлиэхтээхтэр.
«Антоновка успуорт-саалатын устата — 30 уонна кэтитэ — 18 миэтэрэ, — диэн кэпсиир Василий Ильинов. — Итиэннэ 2 этээстээх, 30,2 усталаах уонна 15 миэтэрэ туоралаах административнай-бытовой самалык тутуулаах буолар.
Бу күннэргэ каркас стойкаларын барытын туруоран бүтэрэбит. Үлэ барыта былаанынан баран иһэр. Эрдэ графиктан хаалыы баара, кэнники графикка киирдибит. Билигин туттар матырыйаалбыт барыта баар. Эркинэ сэндвич-панель буолар, Новосибирскайга собуокка оҥоһулла турар. Успуорт саала каркаһын таҥан бүтэрэрбит саҕана, массыынанан тиэллэн кэлиэхтээх. Новосибирскайдааҕы тырааныспар хампаанньатын кытта манна аҕалалларыгар дуогабардаахпыт. Бу сыл ахсынньы 1 к. диэри бүтэриэхтээхпит. Көрөргүт курдук, бириэмэбит ыгым, онон үлэ ахсаабакка бара турарыгар кыһанабыт. Үлэбит күнэ сарсыарда 8 чаастан саҕаланар уонна киэһэ 10 ч. түмүктэнэр. Дьоммут мантан чугас олороллор, онон бириэмэбитин да сүтэрбэппит.
«БАРТ-Строй» производственнай-тутуу фирмата 2007 сыллаахха тэриллибитэ, Дьокуускайга регистрациялаах. Дьокуускайга уонна араас улуустарынан үлэлиибит. Тутуунан эрэ буолбакка, сири дьөлө үүттээһининэн эмиэ дьарыктанабыт. Былырыын Ньурбачааҥҥа саҥа оҕо уһуйаанын дьиэтин тутан киллэрбиппит, Хаҥалас оскуолатын өрөмүөнүн үлэтин толорбуппут».
Федеральнай бырагыраама ирдэбилэ кытаанах: эбийиэк ыйыллыбыт кэмигэр үлэҕэ кыайан киирбэт түгэнигэр кэлэр сылларга бүтүн өрөспүүбүлүкэ федеральнай бырагырааматтан таһаарыллыан сөп. Онон улуус салалтата тутуу хаамыытын мэлдьи хонтуруолга тутар. Тутааччылар успуорт сааланы кэмигэр бүтэрэргэ туруннулар.
Геннадий Антонов, Ulus.media
