Ыарахан атлетикаҕа сахаттан бастакы Сэбиэскэй Сойуус успуордун маастара М.М.Скрябин Мооруктан төрүттээх. Билиҥҥи кэмҥэ кыра нэһилиэккэ 20 успуорт маастара олороро биллэр. Чэпчэки атлетикаҕа, гиирэҕэ, саха атах оонньууларыгар күүстээх спортсменнардаахтар. Манна мас тардыһыыта сайдыытыгар өрөспүүбүлүкэ үтүөлээх тириэньэрэ Николай Бояров улахан өҥөлөөх. Элбэх мадьыныны такайан-уһуйан таһаарбыт тириэньэр.
Ол эрээри, кэнники кэмҥэ успуорт саалалара умайан хаалан, мооруктар успуордунан дьарыктаныыларыгар, ыччаты уһуйууга ыарахаттары көрсөн олороллор. Ол иһин, бэйэлэрин көҕүлээһиннэринэн, күүстэринэн пиэрмэ каркаастаах саҥа успуорт саалатын тутууга сорунуулаахтык туруммуттар. Ити үлэни нэһилиэк баһылыгын солбуйааччынан бу сааскыттан ананан үлэлээн эрэр Виктор Уваровскай сүрүннэһэ сылдьар.
‒ Муус устартан үлэтин саҕалаабыппыт. Акылаат турбалара бэйэбититтэн. Каркааһын Аллараа Бэстээхтэн атыыластыбыт. Бүгүҥҥү күҥҥэ үлэтин сыаната, харчытыгар таһаардахха, 2,5 мөлүйүөн солкуобай суумалаах үлэ буолла, ‒ диэн кэпсээтэ Виктор Владимирович атырдьах ыйын саҥатыгар улуус баһылыгын социальнай боппуруостарга солбуйааччы Николай Цыпандин уонна физкултуура, успуорт управлениетын начаалынньыга Константин Захаров тутуллар сааланы көрө сылдьыбыттарыгар.
Каркааһын булууга уонна сыбааркалаан, таҥан туруорууга Аллараа Бэстээххэ баар «Жилстройинвест» муниципальнай тэрилтэ (салайааччы Алексей Стручков) улаханнык көмөлөспүтүн Виктор Уваровскай бэлиэтиир. Тутуу үбүн олохтоохтор уонна Мооруктан төрүттээх, билигин Дьокуускайга олорор дьонноруттан ‒ аймахтартан, үлэ династияларыттан уонна аахсыйа кэнсиэр оҥорон хомуйбуттар. Аҕыйах ыал бастакынан үп-харчы биэрбиттэр. Егоровтар, Апросимовтар, Сосиннар, Петровтар, Скрябиннар, Уваровскайдар, Порядиннар уонна да атын аймахтар көмөлөрүн оҥорбуттар.
Ыһыахха диэри үлэтин бүтэрбиттэр. Турар оннугар буор куттаран, билигин онно олох кыра гына бытарытыллыбыт хайа боруодатын (щебени) кутан баран, полистироллаан, стяжкалаан бетон куттарар былааннаах сылдьаллара. Акылаат турбалары олохтоохтор тыраахтардарынан состорон аҕалан биэрбиттэр. Муостатыгар, эркиннэригэр анаан 345 маһы кэрдэн киллэрэн сытыараллар. Эркинин сэндвич-панелынан хайыахтаахтар. Тутуута бүттэҕинэ, 8-тан тахса миэтэрэ үрдүктээх, 14-тэн тахса миэтэрэ кэтиттээх, 30 миэстэрэ усталаах (онтон алтата таҥас уларыттар, суунар эҥин хостор буолуохтаахтар) успуорт саалата Суола Моорук нэһилиэгин биир саҥа дьоһун көстүүтэ буолуоҕа. Икки этээстииргэ былаанныыллар. Буор таһыытыгар устудьуоннар үлэлээн барбыттар. Бырайыагын Дьокуускайга «ВикСем» ХЭУо-ҕа (Семен Лукин) 60 тыһыынча солкуобайга оҥортороллор. Өссө, экспертизаны аһартарарга 40 тыһыынчаттан итэҕэһэ суох үп-харчы наада буолуохтаах.
Сирэ-уота оскуола тэлгэһэтиттэн быһыллан, нэһилиэк дьаһалтатын бас билиитигэр тыырыллыбыт.
Аркадий ИННОКЕНТЬЕВ, Ulus.media
