Ол кэмтэн ыла үгүс элбэх оҕо хаҥкыга туран, дьарыктанан, сибиэһэй салгыҥҥа оонньоон-көрүлээн кэллэ. Ыччат туруорсуутунан Сэбиэскэй уулуссаҕа саҥа каток тутуутун саҕалаатылар.
Алексей Неустроев салайааччылаах «Манчаары» хоккей кулуубун ыччат ортотугар бу көрүҥү тарҕатыыга бэйэлэрин холобурдарынан уһуйбуттара саарбаҕа суох. Хамаанда араас күрэхтэһиилэргэ кыттар буолбута. Кинилэр эмиэ Майатааҕы катокка анаан-минээн дьарыктанан, ситиһиилэр сыллата эбиллэн эрэллэр.
Хаҥкылыыр былаһаакка хаар уулларын баттаһа хомуллар этэ. Ити үлэни салҕыыр, кэҥэтэр уонна сайыннарар сыалтан Сэбиэскэй уулуссаҕа, урукку өттүгэр алын сүһүөх оскуолатын оннугар саҥа каток олохтоох миэстэтин буллардылар.«Майа сэлиэнньэтэ» МТ баһылыга Дмитрий Тихонов көҕүлээһининэн 60х30 миэтэрэ иэннээх былаһаакка сирэ-уота оҥоһулунна. Бу нэдиэлэҕэ Казань куораттан улахан кыамталаах массыынанан анал матырыйаалы тиэйэн аҕаллылар.
‒ Биһиги улууспут баһылыгын кытта сөбүлэһэн бараммыт итиэннэ кэнники үс сылтан бэттэх ыччаппыт кыһыҥҥы успуорт көрүҥнэригэр сыстаннар, кинилэр быһалыы туруорсууларынан үлэ-хамнас ыытыллар. Бу үлэни «Кэлэр көлүөнэлэр пуондалара» өйөөтө, туруоруутугар олохтоох Никифор Дмитриев биригээдэтин көмөтүнэн алтынньы ыйга куорпутун олоххо киллэриэхпит. Сайыҥҥы өттүгэр бетонунан бүрүллүбүт былаһааккаҕа оҕолорбут ролигынан хатааһылыыр буолуохтара. Инникитин хаартан-ардахтан хаххалыырга сабыылаах гына ситэрэн-хоторон биэриэхпит, ‒ диир баһылык.
Корт туруоруллар сирин оҥоруутугар, тэҥнээһинигэр эмиэ олохтоох үлэһит Семен Новгородов салайааччылаах биригээдэ икки нэдиэлэ анараа өттүттэн саҕалаабыта. Саҥа матырыйаал кэлиитигэр көтөҕүүгэ-таһыыга Майа эр дьоно, аҕалар биир сомоҕо буолан, көхтөөхтүк үлэлээбиттэрэ үөртэ. Инньэ гынан оҕолор, ыччат тустарыгар субуотунньук буолла.
‒ Саха норуота тоҕус томороон тымныылаах буоламмыт, былыр былыргыттан мууска чугаспыт. Онон хоккей, шорт-трек курдук көрүҥнэри сайыннаран, оҕолорбут, баҕар, инникитин Олимпиадаҕа кыттыахтара диэн сыаллаах-соруктаах үлэбитин саҕалаатыбыт, ‒ диэн Дмитрий Иванович түмүктээтэ.
Виктория БЕЛОЛЮБСКАЯ, Ulus.media
