Барыта 17 нэһилиэк кытынна. 11 көрүҥҥэ олус тыҥааһыннаах киирсиилэр буолан аастылар.
Ороһу нэһилиэгэ волейболга – 2-с миэстэ, саахымакка – 1, хабылыкка, хаамыскаҕа – 3-с, ытыыга – 4-с, дартска – 4-с, остуол тенниһигэр – 1, дуобакка – 6-с, эстафетаҕа – 3-с, “Веселые старты” 4-с, бальнай үҥкүүгэ – 7-с миэстэ буолла. Уопсай түмүккэ улахан нэһилиэктэр ыккардыларыгар 11 нэһилиэктэн 2-с миэстэ буоллубут.
Үчүгэй көрдөрүүлэри остуол тенниһигэр Калиста Ивановна Романова уонна Владимир Федорович Федотов, саахымакка Валерий Николаевич Семенов уонна Сардана Владимировна Васильева, хабылыкка, хаамыскаҕа Мария Михайловна Ильина уонна Егор Симонович Быккасов, эстафетаҕа Галина Артамоновна Арбыкина, Калиста Ивановна Романова, Егор Симонович Быккасов, Юрий Алексеевич Алексеев көрдөрдүлэр уонна бары көрүҥҥэ туох баар кыахпытынан кытта сатаатыбыт.
Аны эмиэ нэһилиэктэр ыккардыларыга инвалидтар күрэхтэрэ буолан ааста. Барыта сэттэ улахан нэһилиэк кытынна. Хас биирдии көрүҥҥэ олус тыҥааһыннаах киирсиилэр буолан аастылар, биэс көрүҥҥэ (волейбол, сахалыы остуол оонньуулара, ытыы, дартс, армрестлинг).
Биирдии көрүҥнэринэн ылар буоллахха волейбол – 1, хабылык, хаамыска – 5-с, ытыы – 4-с, дартс – 3-с, армрестлинг – 1 миэстэ. Армрестлиҥҥа кэргэнниилэр Марианна Ивановна уонна Вадим Юрьевич Васильевтар, дартска Надежда Михайловна Иванова уонна Константин Капитонович Васильев ситиһиилээхтик кытыннылар. Бары кыттыбыт спортсменнарбытыгар барҕа махтал тиэрдэбит, ити курдук ыарыыны билиммэккэ мэлдьи инники күөҥҥэ сылдьаргытыгар баҕарабыт.
Марианна Ивановна уонна Вадим Юрьевич быйылгы дьылга ситиһиилэрэ элбэх. Спорт диэн баран муннукка ытаабыт дьон. Ол курдук волейбол, сүүрүү, армрестлинг уонна да атын көрүҥнэргэ төһө кыахтара баарынан барытыгар кытталлар. Бу күннэргэ республиканскай инвалидтар күрэхтэригэр баран армрестлиҥҥа 70 кг ыйааһыннаахтарга иккиэн бастакы миэстэни ылан кэллилэр.
Сэтинньи 30 күнүгэр остуол тенниһин күрэҕэ буолан ааста. Барыта тоҕус улахан нэһилиэк кытынна. Теннис күрэҕэ олус тыҥааһыннаахтык буолан ааста. Ороһуттан икки эр киһи, биир дьахтар кытыннылар, ол курдук Владимир Федорович Федотов, Леонид Егорович Васильев уонна Калиста Ивановна Романова кытыннылар. Бастакы ракетка Леонид Егорович 5-с миэстэҕэ тигистэ, иккис ракетка Владимир Федорович – бастакы, үһүс ракетка Калиста Ивановна – 2-с миэстэ буоллулар. Уопсай түмүккэ 11 нэһилиэктэн бастакы миэстэ буоллубут.
Калиста Романова (ортоку)
Кыратык сырдатар буоллахха, Калиста Ивановна Романова быйылгы дьылга теннискэ ситиһиилэрэ аата-ахсаана биллибэт буолла. Ол курдук оройуон, улуустар ыккардыларыгар, республиканскай күрэхтэргэ барытыгар ситиһиилээхтик кыттан, бастакы, иккис миэстэлэртэн түспэтэ. Кини теннискэ олох дьаныһан туран дьарыктанар.
Владимир Федорович Федотов Үөһээ Бүлүүгэ теннискэ биир бастыҥ тренер. Кини үөрэппит оҕолоро аан дойдунан барытынан күрэхтэһэллэр. Оҕолорун ситиһиилэринэн кынаттанан, күн бүгүнүгэр дылы Ороһу орто оскуолатыгар үлэлии сылдьар, ол курдук теннис секциятын ыытар. Сотору оҕолорбут Ороһу аатын ааттатыахтара диэн эрэлбит улахан.
Кинилэргэ барыларыгар өссө төгүл ситиһиилэри, өссө да элбэх күрэхтэһиилэргэ кыттан биһигини үөрдэ турдуннар.
Ороһуларын тустарыгар туох баар сатабылларын киллэрэн туран бары кыттыбыт спортсменнарга барҕа махталбытын тиэрдэбит. Салайан илдьэ сылдьыбыт, кэлэр-барар транспорынан хааччыйбыт дьоннорбутугар – баһылык Анатолий Васильевич Антоновка, КСК дириэктэрэ Виктория Николаевна Абраховаҕа, кырдьаҕастар түмсүүлэрин салайааччытыгар Наталья Александровна Кривошапкинаҕа, социальнай үлэһиккэ Валерия Васильевна Акимоваҕа эмиэ барыбыт ааппытыттан махтал тиэрдэбит.
Лидия ТЕРЕНТЬЕВА,
общ. корреспондент,
Ороһу, Үөһээ Бүлүү