Бу хорсун санаалаах хоту дойду хоһуун уолаттарын уонна кыыһын хайыһарынан айаннаан иһэр бөлөҕүн үлэ уонна спорт бэтэрээнэ, маннык айаннарга улахан уопуттаах чулуу спортсмен, СӨ XII ыҥырыылаах Үрдүкү Сэбиэтин уонна III, IV ыҥырыылаах Ил Түмэн дьокутаата Дмитрий Николаевич Горохов салайар.
Бөлөх састаабыгар бааллар: Күһүүр орто оскуолатын учууталлара Людмила Горнакова, Виталий Жирков, Иван Жирков, Константин Сыромятников, МБУ ” Дохсун” тренерэ Семен Корякин, “Чекуровка” общинатын балыксыта, булчута Василий Павлов.
Кинилэр кулун тутар 25 күнүгэр Эдьигээн сэлиэнньэтигэр кэлэн баран, хас күн аайы ортотунан 6-7 көһү хайыһарынан айаннаан, онус күннэригэр Халбаакыга кэлбиттэр. Онтон салгыы баран, Бүлүү Эбэни туораан, ыраахтан күн уотугар кылабачыйа оонньуур үрдүк стелаҕа оҥоһуллубут үс Бүлүү Геройдарын пааматынньыга турар Кыайыы болуоссатыгар тиийэн кэллилэр.
Манна хайыһарынан айан кыттыылаахтарын Бүлүү оройуонун дьокутааттарын Сэбиэтин бэрэссэдээтэлэ, СӨ норуотун хаһаайыстыбатын үтүөлээх үлэһитэ Гаврил Семенович Корякин эҕэрдэлии көрүстэ, салгыы эмиэ маннык тэтимнээхтик айаннаан, киэҥ Ньурба сиригэр-уотугар болдьоммут күннэригэр этэҥҥэ тиийэллэригэр үтүө баҕа санаатын эттэ.
Бөлөх салайааччыта Дмитрий Горохов кылгастык маннык кэпсээтэ:
– Ыраах айаннарга салайааччынан сылдьыбытым хаһыс да төгүлэ. Күһүүргэ түөрт сыл үлэлээбитим, уопсайынан, хоту улуустарга 35 сыл араас үлэҕэ сырыттым. Билигин Дьокуускайга биэнсийэҕэ олоробун.
Бөлөх састаабыгар баар дьонум үксүлэрэ араас маршруттарынан маннык ыраах айаннарга сылдьа үөрүйэхтэр. Холобур, Күһүүр оскуолатын физкультураҕа учуутала Иван Жирков бу 29- с сырыыта буолар. Онтон Василий Павлов “Гиннес Рекордугар” киирбитэ, онон биллэр киһи. 2012 сыллаахха Бүлүүттэн Күһүүргэ тиийэн тураллар. Саамай эдэрбит Семен Корякин 22 саастаах. Кинилэр бары айылҕа оҕолоро буолаллар.
Улуу Кыайыы 75 сылынан Ил Түмэн Бэрэссэдээтэлин бастакы солбуйааччы А.Н.Жирков Семен Иванович Сюльскай 1941 с. Булуҥтан Ньурбаҕа диэри хайыһарынан тиийбит суолунан барарга этии киллэрбитэ. Бу хорсун санаалаах киһи Ийэ дойдутун көмүскүү сэриигэ баҕа өттүнэн бараары оччолорго маннык уустук,ыраах айаҥҥа туруммут. Онон кини сырдык кэриэһигэр биһиги эмиэ бу хайыһарынан Ньурбаҕа диэри баран иһэбит,- диэн эттэ.
Айан кыттыылаахтара Бүлүү куоратын ытык-мааны сиригэр- Кыайыы болуоссатыгар үс Геройдарбыт пааматынньыгын аттыгар туран сахалыы алгыстаннылар, ытыктабыл, сүгүрүйүү бэлиэтигэр уонна өйдүү-саныы сылдьарга хаартыскаҕа түстүлэр, этиллибит үтүө баҕа санаа иһин махтаннылар уонна салгыы Чочуга таарыйан ааһардыы айан суолун тутустулар.
Николай Федоров, Ulus.media