Саха биллиилээх бэйиэтэ, тылбаасчыт Сивцев Ефрем Степанович - Таллан Бүрэ аатынан орто оскуола спортсаалатыгар көҥүл тустууга ССРС спордун маастара Николай Кириллович Алексеев аата иҥэриллиитин үөрүүлээх быһыыга-майгыга бэлиэтэннэ. Типовой арочнай улахан спортивнай саала былырыыҥҥы үөрэх дьылыгар үлэҕэ киллэриллибитэ. Баскетбол, волейбол оонньонор киэҥ-куоҥ, сырдык, сылаас саалалардаах, үлэлиир хостордоох, иккис этээһигэр тустуу саалалаах, оскуола тэлгэһэтигэр турар, толору хааччыллыылаах, оскуола котельнайыттан ититиллэр, билигин тупсаҕай оҥоһуулаах бөһүөлэк киэргэлинэн буолан турар.
Маннык үчүгэй саалаҕа Бөтүҥнэр киэн туттар биир дойдулаахтарыгар, Максим Кирович Аммосов аатынан ХИФУ профессора, физико-математическай наука кандидата, Саха АССР үтүөлээх тренера, көҥүл тустууга ССРС спордун маастара, РСФСР чемпионатын боруонса призера, Иван Поддубнай Бүтүн Союзтааҕы Кубогын кыайыылааҕа, көҥүл тустууга, самбоҕа, сладаҕа аан дойду ветераннарын түһүлгэлэрин чөмпүйүөнэ уонна призера, Дмитрий Петрович Коркин аатынан Саха Өрөспүүбүлүкэтин государственнай бириэмийэтин лауреата, Нам улууһун Бочуоттаах олохтооҕо Николай Кириллович Алексеев аата иҥэрилиннэ.
Аат иҥэрии Дьокуускай куоракка баар "Нам" түмсүү туруорсуутунан уонна Бөтүҥ нэһилиэгин депутаттарын быһаарыытынан ылыныллыбыта. Бу дьоро күн Николай Кириллович Алексеев бэйэтэ, Бөтүҥ нэһилиэгин баһылыга Михаил Васильевич Макаров, Нам улууһун депутаттарын сэбиэтин бэрэссэдээтэлэ Иван Романович Попов, Дьокуускай куораттан "Нам" түмсүү салайааччыта Гаврил Гаврильевич Местников, интернационалист-буойун, Вьетнам сэриитин кыттыылааҕа, Нам улууһун, Нам уонна Бөтүҥ нэһилиэктэрин Бочуоттаах олохтооҕо, Саха Өрөспүүбүлүкэтин Бэчээтин туйгуна, Саха Өрөспүүбүлүкэтин Бочуоттаах пенсионера Тит Ефремович Сивцев, Саха Өрөспүүбүлүкэтин үөрэҕириитин Бочуоттаах үлэһитэ, нэһилиэк ветераннарын сэбиэтин бэрэссэдээтэлэ Людмила Васильевна Михайлова, И.Е.Винокуров аатынан Хатыҥ-Арыы орто оскуолатын учуутала Лена Тарасовна Сивцева, Н.К.Алексеев Ленинградка бииргэ үөрэммит доҕоро Роберт Семенович Охлопков, бэйэтин кэмигэр 60-с сыллардаахха өрөспүүбүлүкэҕэ күүстээх тустууктар кэккэлэригэр аатын ааттаппыт Егор Иванович Холмогоров, уо.д.а. биир үөлээннээхтэрэ, үлэ, үөрэх ветераннара, ахтыыларын, эҕэрдэлэрин, баҕа санаа бастыҥын, үтүө санаа үтүмэнин тиэртилэр.
Бу үөрүүлээх түгэҥҥэ Николай Кириллович бэйэтэ кыттан үтүө махтал тылларын биир дойдулаахтарыгар эттэ уонна кини баҕата барыта кэскиллээх буоллун диэн, саха тустуута сайдарын, кэскиллээх буоларын туһугар, кини аатынан өрөспүүбүлүкэ оҕолорун көҥүл тустууга турнирын Бөтүҥ нэһилиэгэр бары көмөлөһөн, спонсордаан тэрийэн ыытарга ыҥырыытын биир дойдулаахтара сүрдээх истиҥник ылыннылар, дохсун ытыс таһыныытынан доҕуһуоллаатылар.
Сахалыы уус-уран тыл маастара, Үчүгэй Өлүөнэ ырыаһыта Ефрем Степанович Сивцев - Таллан Бүрэ Бөтүҥ оскуолатыгар үөрэппит, ииппит үөрэнээччилэрэ – саха дьоно киэн туттар тенор куоластаах Россия уонна Саха сирин народнай артыыһа Семен Петрович Оконешников сырдык аата эмиэ саҥардыыҥҥыта киллэриллибит культура-сынньалаҥ дьиэтигэр иҥэриллэн, уонна “Матбор” аатынан билиниллэр математика учуонайа, көҥүл тустуу маастара Николай Кириллович Алексеев аатынан спортсаала нэһилиэк үүнэр көлүөнэ ыччатын, олохтоохтору түмэ, саҥа үрдэллэргэ кынаттыы турдуннар!
Баһылай Посельскай, Sportyakutia.ru
