Дьарыктаныыга мотивацияны саҕар Чурапчы физкультураҕа уонна спорка институтун ректора Иннокентий Готовцев, мас тардыһыыга ыарахан ыйааһыҥҥа аан дойду чөмпүйүөнэ, институт кафедратын сэбиэдиссэйэ Василий Алексеев, “Боотур Уус” стадион дириэктэрэ Василий Давыдов, спортивнай оскуола дириэктэрэ Дьулус Егоров, өрөспүүбүлүкэ үөрэҕин министиэристибэтин физическэй культураҕа уонна спорка управлениетын отделын начальнига, гиирэ спордугар Манчаары оонньууларын чөмпүйүөнэ, спорт маастара Михаил Варламов, Сунтаар Күндэйэтиттэн Георгий Осипов, Мэҥэ-Хаҥалас Төҥүлүтүттэн травматолог-быраас Георгий Цыпандин, киирэннэр састаап сэргэхсийдэ, күүһүрдэ. Бары спорду өрө туппут, спорт аргыстаах дьоһун дьон. Бөлөххө киирбиттэр ахсааннара сүүһү куоһарда. Онон үчүгэй өттүгэр хамсааһын баар.
Бөлөх аата да этэрин курдук, тардыныыны баһылааһын. Онуоха сөптөөх эрчиллии ньымаларын, турникка тардыныы албастарын үөрэтии, сүбэ-ама биэрии күүскэ ыытыллаллар. Кэпсэтии-сэлэһии барыта төлөпүөнүнэн, ON-LINE нөҥүө. Ый 1-3 күннэригэр ким-хайдах туруктааҕын, төһө эбиллибитин-көҕүрээбитин тургутар хонтуруоллуур тардыныылар буолаллар. Хас биирдии киһи тардыммытын саҕаланыаҕыттан бүтүөр диэри төлөпүөнүн видеотугар түһэрэн ватссаабынан ыытар, ону тустуу тренеринэн үлэлиир сүрүн инструктор-судьуйа Егор Яковлев уонна сүрүн сэкэрэтээринэн анаммыт Д.П. Коркин аатынан Республиканскай спортивнай оскуола-интэринээт дириэктэрэ Николай Гуляев сурукка-бичиккэ тиһэн иһэллэр.
Физкультура-спорт группата буоларбытынан, спорка интэриэс, инники диэки дьулуһуу баар. Биирдиилээн үрдүк көрдөрүүлэрдээхтэр сөҕүүнэн-махтайыынан туһаналлар. Группаҕа баар дьон тардыннынар-тардымматынар, барыларын уопсай көрдөрүүлэрэ ааҕыллар. Холобур, 35 киһи тардыннаҕына, испииһэккэ баар сүүстэн тахса киһи бары учуоттаналлар. Балаҕаны ыйыгар 41 киһи 540 тардынаннар группа саамай үрдүк көрдөрүүтэ буолта. Тардыммыт дьон орто көрдөрүүлэрэ 18-20 тардыныыга тэҥнэһэр. Үчүгэй көрдөрүү. Урукку өттүгэр бэрт үчүгэйдик тардына сылдьыбыттар, үлэҕэ-хамнаска үтүрүттэрэн, олоххо да интэриэстэрэ уларыйан, сааһыран-эҥин, ыарытыйан-эҥин, дьарыктарын тохтотоннор, ыйааһыннара да эбиллэн-ыараан, билигин көрдөрүүлэрин лаппа аччатаннар, дьонтон уонна бэйэлэриттэн да кыбыстар буолуохтарын сөп. Үтүө холобурдары батыһаннар, киһи көрбөтүгэр, баҕар, кыралаан эрчиллэн, саҕалаан эрэллэрэ буолуо. Оннук буоллаҕына үчүгэй буолуо этэ. Дьону үчүгэйгэ, бэйэ бодотун тардына сылдьарга ыҥырар сыаллаах-соруктаах ватсаап-группа тэриллибитэ.
Группаҕа эдэриттэн аҕам дьонугар тиийэ араас саастаахтар бааллар. Эдэрдэр группаҕа киирэн эбиллэллэриттэн киһи үөрэр. Дьиҥинэн, бырахпакка дьарыктанааччылар урукку туруктарын туталлар эбит. Оннук дьону көрөҥҥүн сөҕөҕүн, ымсыыраҕын.
Кыайан тардымматтар “Австралийскай” көрүҥүнэн тардыналлар. Сытар аҥардаах балаһыанньаҕа намыһах турниктан тардыныахха сөп. Көрдөрүүлэрэ ааҕыллар. Оннук куруутун тардына сырыттахха, сыыйа, үрдүк турникка көһөн тардынар буолуохха сөп.
Группа чэгиэн-чэбдик буолууга уонна спорка эрэ хайысхалаах. Ол сиэринэн, араас сүбэнэн-аманан көхтөөхтүк сэлэһэн кыттааччылар бааллар. Чэгиэн-чэбдик сылдьыы, чөл олох, уһун үйэлэнии кистэлэҥнэрэ, норуот эмчиттэрэ, эмтээх оттор, таба аһааһын, физкультура уонна спорт, дьарыктаныылар ньымалара, былыргы төрүттэрбит тустарынан, Сахабыт сирин историята, мындыр этиилэр, притчалар, психологическай тестар, наука ситиһиилэрэ, аныгылыы сайдыы технологиялара, спорду пропагандалыыр уус-уран уонна документальнай киинэлэр, видеороликтар, медитациялар, үтүө дьыалалар, олох-дьаһах уо.д.а. боппуруостар уопсай көрүүгэ-истиигэ тахсыталаан, хорутуулаахтык ырытыллаллар. Туһалаах матырыйааллартан, иһитиннэриилэртэн киһи үөрэнэр, тускар туһанаҕын, билиигин-көрүүгүн хаҥатаҕын.
Өй-санаа, эт-сиин туруктарын суолталара улахаттар.
Элбэхтэн биир түгэни кытта билсиэҕин. Ситиһиилээх уонна ситиһиитэ суох дьоннор тустарынан, “киһи өйүнэн-санаатынан” диэн өйдөбүлгэ туһааннаах психологическай тест болҕомтону ылар. Ситиһиитэ суох дьон атын дьону ырыталлар, уларыйыы тахсарыттан куттаналлар, барытын билэр курдук сананаллар, туох-баар проблемаларга уонна сыыһаларга атын дьону буруйдууллар. Онтон, ситиһиилээх дьон идеялар тустарынан кэпсэтэллэр, уларыйыылартан үөрэллэр, олохторун былаһын тухары үөрэнэллэр, эппиэтинэһи бэйэлэригэр ылаллар.
Салайааччыттан элбэх тутулуктаах.
Эдэр-эмэн саастарыттан спордунан дьарыктанар, чөл олоҕу тутуһар группабыт салайааччыта Дмитрий Петрович Захаров көҕүлүүрэ, санааны көтөҕөрө, сүбэлиирэ элбэҕиттэн, сылайбатыттан, хал буолбатыттан сөҕөҕүн эрэ. Хайа да түгэҥҥэ, ханнык да боппуруоска наадалаах сүбэни биэрэр, чуокайдык быһаарар, мотивациялыыр, кэтэмэҕэйдээн турбат, сэлэһиилэргэ кыттан иһэр. ”SahkaLifting” группа кытаанах, булгуруйбат өйдөөх-санаалаах, бас-көс киһибит, эркин курдук эрэллээх салайааччыбыт. Биирдэ бэртээхэй MMA бэрчээккэтэ бириистээх куонкурус ыыппыта, онно үгүстэр кыайыыны миэхэ биэрэргэ быһаарбыттара. Бирииспин сүүрбэччэтэ тардынар студенныыр улахан сиэммэр бэлэхтээбиппэр үөрүүтэ улахан. Махтанабыт. Итинник курдук группа иһигэр араас көҕүлүүр дьаһаллары ыытар соруктар тураллар.
Группаҕа холобурунан туһанааччылар бааллар.
Хирург-быраас, Ил Түмэн депутата Владимир Чичигинаров, Борис Винокуров, үөрэх департаменын саайааччыта Ян Алексеев, нэһилиэк баһылыга Ньургун Попов, көҥүл тустууга ветераннарга аан дойду чөмпүйүөнэ Иннокентий Кочкин, үөрэх управлениетын начальнига Афанасий Андреев, о.д.а. вассаап бөлөх олоҕор көхтөөхтүк кытталлар, спордунан дьарыктанарга сүбэлииллэр. Урбаанньыт Василий Туприн, тустуу тренерэ Афанасий Ноговицын воркаут-сотканан күүскэ ылсан дьарыктананнар эбиллии бөҕөлөр. Фанаттыы эрчиллэр Василий Туприн үс ыйдаах “соткатын” бүтэрэн, хас эмэ ый болдьохтоох күүһүрдүллүбүт программанан дьарыктанан эрэр. Кинини үтүктэн батыһар киһи баара биллибэт. Арааһа, спорт, хамсаныы атын көрүҥнэринэн дьарыктанар буолуохтарын сөп.
Үгүстэр ковидынан ыарыйдылар эрээри, үтүөрэннэр, салгыы дьарыктаналлар. Аан-бастаан пандепия утары вакцинацияны гиирэ спордун маастара Дьулус Егоров ылбыта кэрэхсэниэн эрэ сөп. Спортоскуола дириэктэрэ Николай Гуляев “Спорт олохпут нуормата” девиһи туруоран, улахан кылаас уолаттарын кытта тэҥҥэ тардынара, спортивнай интэринээт-оскуола иитиллээччилэрэ күүс өттүнэн эбиллэн иһэллэрэ саныырга үчүгэй. Итини иилэ хабан, кылаастарынан, оскуолаларынан күрэхтэһиилэри тэрийэргэ Ян Алексеев курдук группа чилиэннэриттэн этиилэр киирэллэр. Бэйэ эрэ тардынара, кырдьык, татым соҕус, “оҕолору эмиэ көҕүлээн, хамаанданан күрэхтэһиилэри тэрийэр тоҕо табыллыбат буолуой. Ылыстахха кыаллар дьыала”,- диэн Дмитрий Петрович Захаров күүскэ өйүүрүн биллэрэр.
Бу бэртээхэй хамсааһыны өрөспүүбүлүкэ физическэй культураҕа уонна спорка Министиэристибэтин Арнольд Мохов салайааччылаах физическэй культураҕа уонна маассабай спорка Управлениета тардыныыны өрөспүүбүлүкэ үрдүнэн тарҕатар дьаһалы ылара буоллар Сахабыт сиригэр маассабаһы үрдэтиигэ биир боччумнаах хайысхатын быһыытынан киирэн, улахан хайҕаллаах дьыала буолуо эбит диэн группа дьоно санааларын кытта үллэстэллэр.
Тардыныынан Россия регионнара, аан дойду бүтүннүүтэ дьарыктаналлар. Тардыныы ватсаап-группата ол иһин “SahkaLifting” киэҥ сиргэ өйдөнүмтүө буоллун диэн омуктуу ааты ылыммыта. Кэлин, ыырбыт, сыал-сорук кэҥиэн сөп.
Ааспыт сайын тэриллиэхтэриттэн киирэн утумнаахтык дьарыктананнар 25 киһи көрдөрүүлэрин эптилэр. Тардыныы абылыыр “амтанын” билбиттэр элбээн иһэллэр. 30 киһи 10-н тахсалыыта, 11 киһи 20-н тахсалыыта, 5 киһи 25-н тахсалыыта тардынар буоллулар. Группаҕа кэпсэтэллэриттэн сылыктаатахха, утумнаахтык тардыныынан дьарыктанааччылар өйдүүн-санаалыын да бөҕөргөөтүлэр.
Тардыныыларын харахха быраҕыллар гына Николай Гуляев сайын 14 тардынар эбит буоллаҕына, бу олунньуга 21 тардынан сыл аҥарын иһигэр көрдөрүүтүн 7 тардыныынан эптэ, Ян Алексеев 21 (+7), Афанасий Ноговицын 27 (+19), Ньургун Попов 25 (+17), Николай Барашков 22 (+8), Олег Аржаков 17 (+7), Петр Калачев 17 (+5), Николай Калачев 21 (+11), 19 тардынар Василий Туприн 24 тиэртэ (+5), көрдөрүүлэрин сүрдээҕин үрдэттилэр. Саха сирин хапсаҕайга абсолютнай чөмпүйүөнэ Күһүн 33 тардыммыт 41 саастаах Константин Пахомов билигин 34 тардынан эбиллэн иһэр. Дьарыга үчгэйин көрдөрөр.
Көҥүл тустууга ветераннарга аан дойду чөмпүйүөнэ 72 саастаах Иннокентий Кочкин 30 тардынан, 60 саастаах Борис Винокуров 19 “выход силой”, 103 киилэни үктүүр ыйааһыннаах, мас тардыһыыга аан дойду чөмпүйүөнэ Василий Алексеев 15 тардынан, 54 саастаах Николай Федоров 46 тардынан “SakhaLifting” ватсаап-бөлөх рекордарын олохтоотулар!
Олунньу ый 1-3 күннэригэр группа 26 тардынааччылара 483 тардыннылар. “Австралийскайынан” тардынааччыларбыт тоҕо эрэ тардымматылар. Тардыммыттара буоллар, группа рекорда олохтонуо эбит.
Ити курдук, “SakhaLifting” иннин диэки дьулурҕатык баран иһэр!
Дьарык, эрчиллии салҕанар.
Баһылай Посельскай