Турнир хапсаҕайдаһан тустууга СӨ спортка маастарын толорор ыра санаалаах, спортка талаһыытынан, кыайыыга дьулуурунан, ураты сэмэйинэн, элэккэй майгытынан дьонно-сэргэҕэ сөбүлэппит, киһи кэрэмэһэ дэттэрэ охсубут Никита Иванов сырдык аатыгар, ситэ туолбатах сырдык ыраларын үйэтитиигэ ананна.
Күрэхтэһии кыттыылаахтарын парадын оччотооҕуга “Бэдэр” хапсаҕай кулуубун выпускнига, билигин үөрэммит оскуолатыгар физкультура учууталынан үлэлии сылдьар хапсаҕайга спорт маастарыгар кандидат К.К. Левчиков салайан киллэрдэ.
Күрэхтэһиигэ Бүлүүттэн 17 (Бороҕон 8, Тыымпы 9), Үөһээ Бүлүүттэн 1, Мэнэ Хаҥалас 1, Кэбээйи улууһуттан Баҕадьаттан 11, Арылаахтан 4, Мастаахтан 12 уонна Мукучуттан 48. Уопсайа 94 кыттааччы ол иһигэр 5 спорт маастара кылбар хапсыһыылары көрдөрдүлэр.
Саамай суолталааҕа Никита оскуолаҕа, университекка бииргэ үөрэммит оҕолоро, бииргэ дьарыктанан билигин Саха Өрөспүүбүлүкэтин хапсаҕайга маастар буола үүммүт Владислав Левчиков, Иван Семенов, Олег Федотов, Юрий Сергин, Прокопий Григорьев кэлэн кыттан турниры киэргэппиттэрэ буолар.
Талааннаах киһи барытыгар талааннаах дииллэрин курдук Никита доҕотторо, удьуор тустуук, хапсаҕайдьыт Насим Иванов (Иванов Серафим Иванович сиэнэ) уонна Владислав Левчиков “Дойдум салгына тыынна биэр” диэн аныгы хит ырыаны олус бэркэ толорон күрэхтэһии көҕүн хара ааныттан өрө көтөҕөн таһаардылар.
Сахалыы сиэринэн, хапсаҕай түhүлгэтэ этэҥҥэ аастын, Мукучу маанылаах туонатыгар үктэммит күндү ыалдьыттар этэҥҥэ сылдьалларын туhугар алгыс тылын үтүөтүн, этэр тыл эгэлгэтин алгысчыт Петр Дохунаев тиэртэ.
Никитабыт Кэбээйи улууһугар хапсаҕай сайдыытын кэрэһитэ буолан үйэлэргэ хаһан да сүппэттик өйбүтүгэр-санаабытыгар, хас биирдиибит сүрэҕэр хаалыаҕа. Үүнэр көлүөнэ бөҕөстөрбүт Кини сырдык ыратын, күүстээх санаатын, көрсүө-сэмэй майгытын холобур оҥостон, кини туруоруммут сыалын ситэргэ үлэлиэхтэрэ диэн эрэнэбит.
Түһүлгэбитин иилээн-саҕалаан ыытыстылар биһиги олуһун ытыктыыр, убаастыыр дьоммут саха төрүт көрүҥүн – хапсаҕайы үрдүк таһымҥа чочуйан таһаарбыт хас да нэһилиэк, улуус, ол иһигэр Мукучу нэһилиэгин, Кэбээйи улууһун бочуоттаах гражданина СӨ хапсаҕай федерациятын толорооччу директора, международнай категориялаах судьуйа, ытыктабыллаах Мостахов Алексей Егорович.
Күрэхтэһиини талба-талыы тылынан иилээн-саҕалаан ыытта көрдөөх кэпсээннээх, Мукучу нэһилиэгин, Хапсаҕай оскуолатын иитиллээччилэрин өрөспүүбүлүкэ киэн уораҕайдарыгар сырдатааччы, Мукучу нэһилиэгин бочуоттаах гражданина, Николай Озеров аатынан «Көмүс микрофон» хаһаайына, комментатор Александр Васильевич Васильев – Көрдүгэн.
“Норуот күүһэ – көмүөл күүһэ” – диэн мээнэҕэ эппэттэр, билиҥҥи олоххо ханнык да тэрээһин үрдүк таһымнаах буоларыгар харчынан үбүлээһинтэн эмиэ тутуллар. Улууспут салалтата, спорт управлениета өйөбүллэринэн уон ыйааһыҥҥа иккис, үһүс миэстэлэргэ отут биэс тыһыынча суумаҕа бириис ылылынна. Никита күн күбэй ийэтэ Вера Дмитриевна Иванова хаан-уруу аймахтарын, доҕотторун-атастарын түмэ тардан кыайыылаахтарга ону таһынан кыра саастаах уолаттарга, улахан уолаттарга уонна эр дьоҥҥо Аан Дархан муҥутуур кыайыылаахтарыгар, анал биһирэбиллэргэ сүүс биэс уон тыһыынча солкуобайдаах бириистэри туруоран бар дьону сөхтөрдө, эдэр спортсменнары өссө үрдүк чыпчааллары дабайарга көҕүлээтэ. Куруутун тэрээһиннэри өйүүр үгэһинэн «Мукучу нэһилиэгэ» муниципальнай тэриллии баһылыга Анна Ивановна Сысоева турниры арыйда. Турнирга уолаттарга Аан Дархан аатын былдьаһыыга кыл-мүччү иккис буолбут уолга биэс тыһыынча уу харчынан бириис анаата. Ону таһынан ыҥырыылаах ыалдьыттары аҕалыыга күүс-көмө буолбута олус үөрүүлээх. Онтон Мукучу эдэр ыччата биир сүбэнэн эдэрдэргэ Аан Дархан аатын мүччү туппут бөҕөскө санаатын көнньүөрдэн спорт маҕаһыыныттан аҕыс тыһыынчалаах сертификат туттарда.
Үгүс ыһыылаах-хаһыылаах, долгутуулаах түгэннэри, кылбар кыайыылары бэлэхтээбит хапсаҕай түһүлгэтигэр оҕолорго – Мастаахтан Денис Архипов, уолаттарга – Мукучуттан Максим Каратаев, эр дьоҥҥо Бүлүү улууһун Тыымпытыттан Юрий Сергин Аан Дархан аатын сүктүлэр.
Никита олус сырдык мичээрдээх, номоҕон бэйэлээх сирэйдээх, бэйэтигэр сөрү-сөп быһыылаах-таһаалаах буола улааппыта. Кыахтаах уол бииртэн биир чаҕылхай кыайыыларынан дьонун-сэргэтин үөрдэн испитэ. Кини баара буоллар, саарбаҕа суох, бу турнир Никита хапсаҕайга СӨ маастара буолбутун чиэстиир түһүлгэтэ буолуохтаах этэ!
Эдэр бөҕөстөргө эҕэрдэ тылларын тиэртилэр Никита таайдара, СӨ спордун уонна физическэй культура туйгуна Никифор Дмитриевич уонна хапсаҕайга бу эргин ыччаттан биир бастакынан СӨ спордун маастарын нуорматын толорбут Афанасий Дмитриевич Ивановтар.
Никита сырдык аатын үйэтитэн ийэтэ Вера Дмитриевна, аймахтара 2018 сылга «Сырдык мичээрдээх уол» диэн кинигэ таһаарбыттара. Кинигэҕэ чугас дьонун, учууталларын, оскуолаҕа, университекка бииргэ үөрэммит доҕотторун ахтыылара уонна хаартыскалара киирбиттэрэ. Бу ахтыыларга бары биир киһи курдук Никитаны оҕо эрдэҕиттэн спордунан таптаан дьарыктаммытын, хайаатар да Маастар буолары ситиһиэхтээҕин ахтыбыттара.
Быйыл Никита күн күбэй ийэтэ күрэхтэһии кыттыылаахтарыгар, өйдөбүнньүк футболка оҥотторон аҕалан кыайыылаахтарга уонна чугас дьонугар бэлэх ууммута эмиэ ураты дьоро түгэн буолла.
Күрэхтэһиини барытын устан ютуб ханаалга киинэ оҥорон киэҥ көрүүгэ оҕолорбут табаарыстара Максим Тихонов таһаарда. Сырдыгынан сыдьаайан, күлүм гынан ааспыт, чаҕылхай оҕобут Никита Иванов биһиэхэ куруутун тыыннаах. Кини аатынан хапсаҕай түһүлгэтэ бастыҥ ыччаты түмэ турдун!
Ааптардар: Саргылаана Иванова, төрүт көрүҥнэргэ Мукучутааҕы спортоскуола тренерэ, Ксения Новикова общ. корреспондент.
