Үөһээ Бүлүү  биллэр-көстөр хапсаҕайдьыттара уонна Тыва чулуу бөҕөстөрө түһүлгэҕэ утарыта көрүстүлэр

Киэһэ 19 чаастан күрэхтэһии саҕаланан, тыҥааһыннаах киирсии кэнниттэн Үөһээ Бүлүү иккис хамаандата кыайан-хотон ыалдьааччыларыгар, көрөөччүлэригэр  умнуллубат үөрүүнү бэлэхтээтэ. Улуус хапсаҕайын устуоруйатыгар көмүс буукубанан суруллар үтүө тэрээһин буолла. 

Тустуу үс эргииринэн барда. Аан маҥнай Тыва хамаандатын кытта Үөһээ Бүлүү иккис хамаандата күөн көрүстэ. Манна 3:2 ахсаанынан Үөһээ Бүлүү хамаандата кыайан таҕыста. Иккис эргииргэ Үөһээ Бүлүү 1, 2 хамаандата туһунна, манна иккис хамаанда кыайыылааҕынан тахсан табаарыстыы көрсүһүү кыайыылааҕын аатын сүктэ. Үһүс эргииргэ Тыва тустууктарын утары улуус 1- кы хамаандата кииристэ, манна Тыва бөҕөстөрө 4:1 ахсаанынан кыайаннар 2- с миэстэҕэ таҕыстылар.

Күрэхтэһиини тэрийээччилэр Тываттан күүстээх хамаанда кэлбитин бэлиэтииллэр.

Киэһэрэн, сиик түһэн, көбүөр халтархай буолан, уолаттарга мэһэйи үөскэттэ. Ол да буоллар, бөҕөстөр иҥнэн- толлон турбакка эрбии тииһин курдук эрийсэн, көрөөччүлэргэ кыраһыабай халбас харата хапсаҕай бырааһынньыгын бэлэхтээтилэр.

Түмүккэ 1 миэстэни ылбыт Үөһээ Бүлүү 2 хамаандата 100 тыһыынча, Тыва өрөсппүбүлүкэтин хамаандата 2 миэстэҕэ тахсан 50 000 солкуобайынан, 3 миэстэлээх Үөһээ Бүлүү 1 хамаандата 30 000 солкуобай суумалаах сертификаттарынан наҕараадаланнылар.

Аны маннык тустууну Тываҕа тэрийиэхтэрэ итиэннэ биһиги бөҕөстөрбүтүн табаарыстыы көрсүһүүгэ ыҥырыахтара диэн тэрийээччилэр сабаҕалыыллар.

Николай НиколаевҮөһээ Бүлүү улууһун успуордун управлениетын начаалынньыга:
— Улууспут иккис хамаандата 3:2 очукуонан кыайыыны ситистэ. Күрэхтэһии бэрт үрдүк тэрээһиннээхтик ааста. Түгэнинэн туһанан, кыттыбыт спортсменнарга ис сүрэхпиттэн махтанабын.

Ыалдьааччылар ыһыах хапсаҕайын умсугутуулаах көрүгэр эбии кэлии ыалдьыттары кытта киирсии күүрээннээх мүнүүтэлэрин эттэринэн-хааннарынан билэн, кыайыыттан дуоһуйан, бырааһынньык үөрүүтэ үс бүк үрдээтэ.

Ааптардар: Александр Тарасов, Галина Семенова.

http://ulus.media/category/gazetyi-rayonov/verhnevilyuyskiy-ulus/ee-b-l/

Поделиться:

Добавить комментарий

Защитный код
Обновить

#Новости