Турнир кыттыылаахтарын спорт миниистирэ Иннокентий Григорьев, “Сахаада-спорт” Ассоциация президенэ Александ Ким-Кимэн, Манчаары аатынан спорт национальнай көрүҥнэригэр Киин дириэктэрэ Гаврил Мохначевскай эҕэрдэлээтилэр. Сүрүн судьуйанан Максим Оегостуров үлэлээтэ.
Күрэхтэспэтэхтэрэ уон ый буолбут, уһун тохтобул кэнниттэн көрсүбүт ойооччулар итальянскай “Мондо” тэлгэммит уһун көрүдүөрүн устун ахтыбыттыы, бугуһуйбуттуу барыталаатылар. Икки ардылара түөртүү миэтэрэ гына тэлгэтиллибит туостары куоһарталаан ыраахха диэри кыырайдылар. Үгүстэр тус бэйэлэрин көрдөрүүлэрин эрэ буолбакка, өрөспүүбүлүкэ рекортарын эмиэ тупсартаатылар.
Алта ойооччу хас ойууларын аайы түөртүү миэтэрэни “кылыыга уонна ыстаҥаҕа ылаттаатылар. Горнай улууһун аатыттан кыттар Чурапчы Чакырыттан төрүттээх-уустаах, Манчаары Спартакиадаларын икки төгүллээх абсолютнай чөмпүйүөнэ Николай Адамов төрөппүт уола Кай Адамов ордук табыллан күрэхтэстэ. “Кылыыга” 30 м 58 см түһэн эрэллээхтик бастаата. 19 саастаах Уус-Алдан ыччата маастар Ньургун Сокольников 30 м 07 см, Кэбээйи маастара Яков Дмитриев 29 м 49 см түһүтэлээтилэр. “Ыстаҥа” көрүҥэр Кай Адамов аҕатын “туйаҕын хатаран” өссө ыраатта – 30 м 69 см көрдөрүүлэннэ уонна өрөспүүбүлүкэ саҥа рекордун олохтоото. Яков Дмитриев 29 м 27 см, Ньургун Сокольников 28 м 95 см көрдөрүүлэрдээх иккис уонна үһүс үчүгэй көрдөрүүлэрдэннилэр. “Куобахха” өрөспүүбүлүкэ рекордсмена Таатталар киэн туттуулара Андрей Васильев 27 м 18 см кыырайда, Яков Дмитриев 25 м 52 см, Кай Адамов 25 м 14 см. Үс көрүҥ түмүгүнэн абсолютнай кыайыылааҕынан Кай Адамов таҕыста – 86 м 41 см. Кэбээйиттэн Яков Дмитриев иккис, Уус-Алдантан Ньургун Сокольников үһүс бириистээх миэстэлэргэ тигистилэр. Ааспыт үйэ кынаттаах кылыыһыта Ньургун Сокольников төрөппүт уола Ньургун Сокольников эмиэ аҕатын “туйаҕын хатаран” өрөспүүбүлүкэ ыччаттарыгар түөрт рекоду олохтоото. Тренерэ Уус-Алдан Бэйдиҥэтин маастара Андрей Васильевич Федоров.
Чурапчы Д.П. Коркин аатынан спортивнай оскуола-интернатыгар 11 кылааска үөрэнэр 17 саастаах Афанасий Сибиряков 28 м 49 см кылыйан, 27 м 36 см ыстаҥалаан, 22 м 78 см куобахтаан спорт маастарын нуорматын толорору ситистэ. Улахан дьоҥҥо кылыыга төрдүс, ыстаҥаҕа бэһис, куобахха ахсыс, үс көрүҥ түмүгүнэн сэттис миэстэлэннэ. Тренерэ Иван Иванович Чиркоев Бүлүүнэн, Чурапчынан 50-с маастарын бэлэмнээбитин сөҕүөххэ, хайгыахха эрэ сөп. Улахан үлэ түмүгэ! Мырылаттан төрүттээх-уустаах Афоня саха аатырбыт бөҕөһө Максим Сибиряков хаан сиэнэ. Онон, билигин 87 саастаах Максим Николаевич: “атаҕар кыанар киһи тустууга эрэ буолбакка, спорт үгүс көрүҥнэригэр ситиһиилэнэр”,- диэн үөрүүтүн кытта үллэстэр.
Эдэрдэр тахсан иһэллэрэ атах оонньуутун сайдыытын түстүүр.
Дьахталларга Дьокуускайтан Валерия Олесова, Кэбээйиттэн Саяна Уваровская, Намтан Ангелина Иванова, туһааннааҕынан, бастакы, иккис, үһүс миэстэлэрги ылаттаатылар.
Кэлэр сайын Бэрдьигэстээхэ буолар Манчаары оонньууларын абсолютнай чөмпүйүөнүгэр массыына оонньонорун туһунан “Сахаада-спорт” Ассоциация президенэ Александр Ким-Кимэн иһитиннэрдэ.
Дьэ, массыына хаһаайынынан ким буолар?
Үрдүк көрдөрүүлэри кэтэһэбит. Көрүөхпүт, истиэхпит, билиэхпит.
Кытаатыҥ!
Баһылай Посельскай
Максим Суханов хаартыскалара.
