Чурапчы нэһилиэгэр Боотур Уус стадиоҥҥа оҕунан ытыыга өрөспүүбүлүкэ күрэхтэһиитэ ыытылынна

Күрэхтэһии успуорт уонна үлэ бэтэрээнэ, саха дьахталларыттан бастакы оҕунан ытыыга ССРС успуордун маастарыгар кандидат, Баһылай Манчаары оонньууларын түөрт төгүллээх кыайыылааҕа, Арассыыйа, Уһук Илин уонна Сибиир үс төгүллээх чөмпүйүөннэрэ, «Урожай» уопсастыбаҕа Сойууска улахан дьоҥҥо призер, олоҕун успуорт сайдыытыгар анаабыт, бастыҥ общественник, Чурапчы сэлиэнньэтин Бочуоттаах гражданина Мария  Попова 65 сааһыгар, ох успуордугар анаабыт 50 сылын кэрэһэлээн тэрилиннэ.

Мария Ефимовна уонна кини дьиэ кэргэнэ, аймахтара туруорбут бириистэрэ дьоһуннаахтара күрэхтэһии хаамыытын сытыырҕатта, араас улуустан элбэх күрэхтэһээччи кэлбитэ кэрэхсэбиллээх буолла.

Эр дьоҥҥо Сунтаартан сылдьар бүрээт чулуута Балдар Балдаев инники күөҥҥэ хара маҥнайгыттан тахсыбыта. Иккис миэстэ Үөһээ Бүлүү бэргэн ытааччыта Виктор Елисеев буолла. Үһүс миэстэни Ньурбаттан сылдьар Дьулустан Федоров ылла.

Дьахталларга Дьокуускай олохтооҕо, Чурапчыттан төрүттээх уопуттаах охчут Галина Федорова бастаата. Иккис миэстэҕэ эмиэ уопуттаах, Таатта улууһуттан сылдьар успуорт бэтэрээнэ Галина Ючюгяева таҕыста. Анна Стасова – Алексеева олус эрийсиилээх киирсиигэ үһүс бочуоттаах миэстэҕэ тигистэ. Чөмпүйүөннэр Мария Ефимовна туруорбут морозильнай камераларын бэлэх туттулар.

Муҥутуур кыайыылааҕы быһаарар күрэхтэһиигэ эр дьон 50 миэтэрэттэн, дьахталлар 40 миэтэрэттэн ытаннар Мария кэргэнинээн Егор Поповтуун туруорбут убаһаларын хаһаайына буоларга илин – кэлин түһүстүлэр. Барыта 26 киһи кытынна. Бастаан куобаҕы, онтон куһу ыттылар. Быдан кыра буолан табарга уустук эбит. Ол кэннэ тууру ааспыттар тииҥи ыттылар. Тииҥ кыра буолан күрэхтэһээччилэр хайдар аҥардара туораатылар.

IMG 4136

Муҥутуур кыайыылааҕы быһаарар түһүмэххэ сэттэ ытааччы таҕыста. Бастакы ытыы түмүгүнэн икки киһи: Чурапчы ыччата Алгыс Верховцев уонна уопуттаах охчут, Дьокуускайтан сылдьар күтүөт Борис Олесов ким бастыҥын быһаарыстылар. Бастакы ытыыга иккиэн таптылар. Сэрэбиэйинэн Алгыс бастаан ытта. Иккис ытыыга Алгыс сыыһан кэбистэ, дьон кыһыйбыт саҥата өрө хаһыыра түстэ. Борис төһө да уопуттаах буоллар, долгуйан, эмиэ сыыста. Үһүс ытыыларыгар иккиэн сыыстылар, төрдүстэригэр иккиэн таптылар. Бэһис ытыыга эмиэ иккиэн сыыстылар. Долгуйаллара ыраахтан да көстөр буолла. Алгыс олох тэйиэккэлээн ылар, халаан диэки көрөр, сыалын одуулуур. Борис долгуйуутун туттуна сатыыр, хараҕын симэн тугу эрэ ботугуруур, уоскутунар. Алтыс ытыы саҕаланна. Алгыс бэрт уһуннук кыҥаан ытта эрээри, сыыста. Бориһы кэтэһэн дьон саҥата ах барда. Борис сирэйдиин – харахтыын уларыйан оҕун тарта, кирис тыаҕа хабылла түстэ да оноҕос сирилээбитинэн тииҥи түҥнэри көттө. Ыалдьааччылар хаһыылара өрө оргуйа түстэ, муҥутуур кыайыылаах улахан бирииһин Борис Олесов тутар дьоллонно.

Улуус баһылыга Андрей Ноговицын Мария Ефимовна успуорт сайдыытыгар, уопсастыбаннай олоххо көхтөөҕүн, ыччакка үтүө холобур буоларын, Поповтар дьиэ кэргэттэрэ сахалыы ытык ыалын бэлиэтээн махтанна. Улуус баһылыгын социальнай боппуруостарга солбуйааччы Н.И. Аммосов, Саха Өрөспүүбүлүкэтин төрүт оҕунан ытыыга федерация бэрэссэдээтэлэ П.В. Бурцев, Чурапчы успуордун управлениетын салайааччы В.В. Лукин, Саха сиригэр төрүт сахалыы оҕунан ытыыны төрүттээбит энтузиаст – тренер Б.Б.Олесов, Чурапчы сэлиэнньэтин баһылыгын солбуйааччы П.Е. Гуляев, улуус профсойуустарын лидерэ Е.И. Давыдов эҕэрдэлээтилэр. Дьокуускай  охчуттара Мария Ефимовнаҕа ох саа уонна оноҕос, бүрээт охчута Балдар Балдаров саха охчут Далбар Хотунугар бүрээттэр оҥорбут охторун бэлэхтээтилэр.

Афанасий Захаров, Газета "Саҥа олох"

Поделиться:

Комментарии

Защитный код Обновить

#Новости