“Азия оҕолорун” оонньууларыгар бэлэмнэнэ сылдьар өрөспүүбүлүкэ сүүмэрдэммит хамаандатын бэргэн ытааччылара ахсынньы 9 күнүгэр П.А. Ойуунускай аатынан Дьокуускай авипордугар Москваттан көтөн кэлиилэрин төрөппүттэрэ, эдьиийдэрэ, убайдара, балыстара, бырааттара сибэкки дьөрбөлөөх көрүстүлэр. Оҕолор бэркэ күрэхтэспиттэр. Буулдьанан ытыыга Монголия Улахан кубогар, Улан-Удэҕэ Бүтүн Россиятааҕы турнирга уонна Казань куоракка оҕолор ортолоругар Россия чемпионатыттан 20-чэ кыһыл көмүс, үрүҥ көмүс, боруонса мэтээллэри аҕаллылар.
Хамаанданы илдьэ сылдьыбыт сүрүн тренер Александр Егорович Сотников кэпсииринэн, маҥнайгы уонна иккис састаабынан бараннар, оҕолор хас да улахан таһымнаах күрэхтэһиилэргэ кыттыбыттар, куһаҕана суох көрдөрүүлэрдэммиттэр. Биирдиилээн ытыыларга үчүгэй көрдөрүүлэр бааллар. Ытыыга дьоҕурдаах оҕолор тахсан эрэллэрэ үөрдэр.
“Дохсун” спорткомплекска эрчиллэр Дьокуускай куорат национальнай гимназиятын М.К. Аммосов аатынан ХИФУ иһинэн "Сэргэлээх " Оскуола-лаборатория 8 кылааһын үөрэнээччитэ Алина Готовцева биэстэ эстэр бэстилиэтинэн уон сөкүүндэ иһигэр түргэнник ытыыга 16-гар диэри саастаах Россия оҕолоругар бастаата уонна Россия спорка миниистирэ Павел Колобков илии баттааһыннаах дипломунан наҕараадаламмыт.
Иккиэ буолан буккаастаах пааранан ытыыларга убайдыы-балыстыы Коля уонна Алина Готовцевтар кэккэлэһэ туран бэстилиэтинэн 10 м сиртэн 40-та ытыыга “ПП-40+40” упражнениеҕа Алина 378, Коля 374, холбоон 752 очколаах 16-тан аллара саастаах оҕолорго Россияҕа чөмпүйүөннээннэр, ураты ситиһиилэннилэр. Биир дьиэ кэргэнтэн икки Россия чөмпүйүөннэрэ тэҥинэн баар буолбуттара сэдэх көстүү. Чурапчытааҕы спорт институтун ректора Иннокентий Иннокентьевич Готовцев оҕолорун кыра саастарыттан буулдьанан ытыынан дьарыктаналларыгар уһуйбута. Р.М. Дмитриев аатынан Олимпийскай солбук училище IX кылааһыгар үөрэнэр уолугар Коляҕа стимул быһыытынан дьиэ кэргэн үбүттэн бэстилиэт бэлэхтээбитэ түбэспиччэ буолбатаҕа көстөн таҕыста. Алиналаах Коля икки-үс сыллааҕыта Дьокуускай 2-с оскуолатыгар баар тииргэ эдэр тренер Геннадий Капчукка эрчиллиилэрин саҕалаабыттара. Көрдөрүүлэрин сыллата тупсараннар билигин өрөспүүбүлүкэ сүүмэрдэммит хамаандатыгар киирдилэр, уопуттаах тренер Александр Сотниковка эрчиллэллэр. Алина ааспыт саас маастар нуорматын толорбута, ол гынан баран сааһа кыратынан иҥэриллибэккэ сылдьар. Онтон Коля сыралаһан туран дьарыктанан, олус уустук, ылбычча киһи табыллан ыппат упражнениетыгар, 600 ытыыттан 565 очкону ылан, дьэ маастарга кандидатынан буолла.
Алинаҕа “Дохсун” спорткомплекс бэстилиэти тренерэ Александр Егорович биэрбитэ. Хас биирдии ытыынан дьарыктанар оҕо Steyr LP10 мааркалаах бэстилиэттээх, Walther винтовкалаах, экипировкалаах. Василий Иванович Егоров дириэктэрдээх Саха Өрөспүүбүлүкэтин спорка солбугу бэлэмниир киин материальнай өттүн толору хааччыйар, сырыын-айан ороскуотун быһаарар. Буулдьанан ытыы электроннай мишеннэрин өрөспүүбүлүкэбитигэр туруортуур инженер, ССРС чөмпүйүөнэ, призера, норуоттар икки ардыларынааҕы кылаастаах спорт маастара Павел Николаевич Поляков олимпийскай эрэл училищеҕа сотору-сотору кэлэн барар. Онон оҕолор Россия үтүөлээх тренеригэр эмиэ чочуллаллар. Поляков олус наадалаах кыайыыга тиэрдэр сүбэлэри биэрэр. Холобур, Коля Россия финалыгар илиитэ хамсаабытыгар, Павел Николаевич сүбэтинэн муостаттан хаста да анньыммытыгар, илиитэ хамсаабат буолан хаалбыт.
Сүнньүнэн, бэстилиэтинэн ытааччылар күннээтилэр.
Айыы кыһатыгар IX кылааска үөрэнэр маастарга кандидат Наина Гоголева Бурятияҕа буолан ааспыт Бүтүн Россиятааҕы турнирга бастакы, иккис уонна үһүс миэстэлэри ылаттаан, үс мэтээллээх кэллэ. Монголияҕа маастар нуорматынан ытта (556 очко). ПП-60 упражнениеҕа Ян Федоров, Коля Готовцев, Илья Бенецкэй Москва эрэ хамаандатыгар баһыйтараннар хамаанданан иккис буоллулар. Бүлүү 3 № орто окуолатыгар X кылааһыгар үөрэнэр, тренер Анна Егоровна Ивановаҕа эрчиллэр Илья Бенецкэй үс мэтээллээх. 5№ оҕо спортоскуолатын иитиллээччитэ Аян Кириллин Монголияҕа ПП-60 упражнеиеҕа 558 очкону ылан үрүҥ көмүс мэтээли ылары ситиспит. Соҕотох боруонса мэтээлин олус күндүтүк саныыр 4 № спортоскуола иитиллээччитэ Данил Кривошеев тренер Василий Михайлович Васильевка эрчиллэр.
Ытааччылар бачча элбэх мэтээли аҕалбыттара иһиллибэт этэ. Онон буулдьанан ытыы көрүҥүн оҕолорбут баһылаан эрэллэр диэххэ сөп. Уопсай хамаанданан түмүккэ, бинтиэпкэнэн ытааччылар арыый да кэдэйэн биэрэннэр, оҕолорбут төһө да миэстэлэспэтэхтэрин иһин, инникитин кыайыыларга суоттаналлар.
Билигин “Азия оҕолорун” оонньууларыгар бэлэмнэнии үлэ күргүөмнээхтик барар. Аҕыйах хонугунан Казахстааҥҥа бараллар, тохсунньуга Россия саҕаланар. Эдэр ытааччылар маастарыстыбаларын өссө үрдэтэр сыаллаахтар-соруктаахтар. Буулдьанан ытыы көрүҥэ кыраҕы хараҕы, кытаанах илиини эрэйэр. Хайа да түгэҥҥэ ыгылыйбат, холку, хомуллуулаах буоларга үөрэтэр дэһэллэр. Буулдьанан ытыыга үчүгэй техника ирдэнэрин, илии күүһэ наадатын, чаастан ордук кэм устата илиигэр тутан туруу, сыалгын таба ытыы биллэн турар, утумнаах дьарыгы эрэйэр. Ону оҕолор өйдүүллэр. Сыаллаахтар-соруктаахтар. Баҕаран, сөбүлээн туран эрчиллэллэр. Үлэлииргэ, эрэйи, кыһалҕаны туоруурга үөрэнэллэр.
Өрөспүүбүлүкэ сүүмэрдэммит хамаандатыгар киллэриллибит спортсменнар уонна кинилэр тренердэр таба суолунан баран иһэллэрэ, сөпкө үлэлииллэрэ, дьарыктаналлара дойду күрэхтэһиилэригэр хара көлөһүннэрин тоҕон ылаттаабыт мэтээллэринэн сыаналаналлар.
Баһылай ПОСЕЛЬСКАЙ
