Ол курдук култуураҕа, спорка да буоллун улахан ситиһииилэрдээх, чөл олоҕу биир бастакынан олоххо киллэрбит бөһүөлэк буолар. Кырдьык да бу алаастан элбэх биллэр спортсменнар сахалар ааттарын ааттаппыттара. Владимир, Михаил Афанасьевтар (саахымат), Атос Кулаковскай (хайыһар), Иустин Кулачиков (гиирэ) курдук республика бастакы маастардарынан уонна да атын дьоннорунан киэн тутталлар.
Бу нэһилиэккэ үгэс буолбут чулуу дьоннорун ааттарын үйэтитэр, кинилэр ааттарыгар турнирдары ыыталлара кэрэхсэбиллээх суол.
Ааспыт ый 31 күнүгэр Иван Куприянович Софронов аатынан төрдүс төгүлүн ыытыллар республиканскай остуол тенниһигэр күрэхтэһии буолан ааста. Иван Куприянович биир спорт араас көрүҥэр элбэх ситиһиилэрдээх, кэлин сылларга теннис курдук кырасыабай көрүҥүнэн утумнаахтык дьарыктаммыт спортсмен этэ. Идэтинэн худуоһунньук, куоракка үөрэнэ сылдьыаҕыттан хайыһардьыт, элбэх араас таһымнаах күрэхтэһиилэргэ ситиһиилээхтик кыттара.
Быйыл саас тыалыран, тибэн, элбэх спортсмен кыайан кэлбэтэ. Бу күн алааска анаабыт курдук ыраас, чуумпу күн туран биэрдэ. Сарсыардаттан кэлбит спортсменнар оонньообутунан бардылар. Тыҥааһыннаах киирсии кэнниттэн барыта Томпоттон, Уус Алдантан, Чурапчыттан, Тааттаттан, Дьокуускайтан 29 спортсмен илин-кэлин түһүстүлэр. Турниры Дальнай Восток чемпиона Ньургун Сабарайкин кыттыбыта киэргэттэ. Кини абсолютнай чемпион аатын олус кырасыабай, техничнэй ооньууну көрдөрөн ылыан ылла.
Турнирга аан дойду икки төгүллээх чемпиона Виктор Лебедев кэлэн тыл эппитэ, анал бириис туттарбыта дьоҥҥо умнуллубат түгэни бэлэхтээтэ.
Бу нэһилиэккэ теннис олус сайдан эрэр диэххэ наада. Олохтоох оскуолаҕа физкультура учууталынан үлэлээбит педагогическэй улэ ветерана, теннискэ элбэх үрдүк ситиһиилэрдээх Михаил Семенович Кулачиков элбэх ыччаты эрчийэн, иитэн таһаарда.
Бу да күрэхтэһиигэ бэйэтин саастылаахтарыгар бастаан сыаналаах бирииһи ылла. Күрэхтэһии эр дьоннорго буолла. Спортсменнары олохтоох сынньалаҥ киинин үлэһиттэрэ, олохтоохторо сылаас аһынан хааччыйдылар. Кылаабынай судьуйа М.С.Кулачиков, сэкэрэтээр Л.Ф.Рахлеев дьүүллээтилэр.
Тыҥааһыннаах киирсии кэнниттэн 30 диэри саастаахтарга
1 миэстэ – Сабарайкин.
2 миэстэ – Эртюков
3 миэстэ – Окоемов
40 диэри саастаахтарга
1 миэстэ – Аммосов
2 миэстэ – Копырин
3 миэстэ – Винокуров
50 диэри саастаахтарга
1 м – Пинигин
2 м – Рахлеев
3 м – Лазарев
60 диэри саастаахтарга
1 м – Федотов
2 м – Наумов
3м – Колодезников
65 үөһэ саастаахтарга
1 м – Кулачиков
2 м – Федулов
Абсолютнайга Сабарайкин бастаан Иван Куприянович 65 сааһыгар анаммыт турнир кубогун, мэтээлин уонна дьиэ кэргэнэ, бииргэ төрөөбүттэрэ туруорбут телевизордарын тутта. Бары кыттыбыт спортсменнар бириистэри туттулар. Хас да анал бириис туттарылынна. Ол курдук аҕа саастаахтарга биир дойдулаахпыт Е. Малышев бэйэтэ оҥорбут сурунаал остуола М.С. Кулачиковка туттарылынна.
Ити курдук биир эмиэ интэриэһинэй, умнуллубат күрэхтэһии ыраах сытар Чыычымахха буолан ааста.
Түгэнинэн туһанан бу тэрээһиҥҥэ көмөлөспүт, тэрийсибит дьоннорбутугар ис сүрэхтэн этиллэр махталбытын тиэрдэбит: Амма нэһилиэгин баһылыгар С.С.Соровка, баһылык солбуйааччытыгар И.П.Ефимоваҕа, “Айылгы” сынньалаҥ киинин үлэһиттэригэр, дириэктэр М.К. Решетниковаҕа, күрэхтэһиини тэрийбит М.С.Кулачиковка. Музыкальнай эҕэрдэлэрин тиэрпит олохтоох оскуола үҥкүүһүттэригэр, Марина Садрашоваҕа, Лилия, Марианна Афанасьеваларга, Татьяна Кириллинаҕа, Марианна Решетниковаҕа сэргэх киэһэни бэлэхтээбиттэригэр.
Бары спонсордаабыт дьоммутугар барҕа махталбытын тиэрдэбит, тус олоххутугар дьолу-соргуну, чөл олоҕу өссө да чэчирэтэ сылдьыҥ.
Күрэхтэһии кэнниттэн ахтыы киэһэтигэр Иван Куприянович чугас дьонноро, аймахтара, доҕотторо иһирэх тылларынан ахтыы оҥордулар. Күрэхтэһии дэлэй астаах фуршетынан түмүктэннэ.
Валентина СОФРОНОВА – КУЛАЧИКОВА,
Таатта улууһа, Амма нэһилиэгэ
