Тыа хаһаайыстыбатын үлэтин ветерана, тыа сиригэр волейболу көҕүлээччи, тэрийээччи Алексеев Владимир Михайлович үбүлүөйдээх 65 сааһын туолуутугар аналлаах 60-н үөһэ саастаах эр дьон аҕыс хамаандалара – Тааттаттан, Чурапчы-Амма холбоһон туруорбут “Маарыкчаан”, Уус Алдантан сыырдаахтар, Бүлүүттэн “Оленск”, Мэҥэ Хаҥалас, Дьокуускайтан “Урожай”, “Аргыс”, Хатас түмсүүлээх хамаандалара сельхотехникум спорт саалатыгар күрэхтэстилэр.
Үһүс миэстэни былдьаһыыга Петр Гуляев хапытааннаах маарыкчааннар Бүлүү курдук ыраах сиртэн айаннаан кэлбит Александр Корякин хапытааннаах “Оленск” волейболистарын сиирэ-халты кыайдылар. Финалга Виталий Никитин хапытааннаах “Урожай” уонна Александр Саввинов хапытааннаах “Аргыс” хамаандалара сүрдээх сыралаах, хатыһыылаах киирсиилэрэ 2:1 ахсаанынан урожайдар кыайыыларынан түмүктэннэ.
Турнир сүрүн судьуйата, көҥүл тустууга ССРС спордун маастара, эдэр-эмэн саастарыгар Сэбиэскэй Сойууска төрдүс миэстэлэнэ сылдьыбыт, Мэҥэ Хаҥалас Төҥүлүтүн физкультураҕа учуутала Василий Эверстов сүрүн судьуйа быһыытынан үлэлээтэ уонна балассааккаҕа киирсиилэри эрчимнээхтик салайан ыытта.
«Урожай» хапытаана Виталий Никитин санаатын кытта үллэһиннэ: «Мин бэйэм хамаандабыттан бэлиэтиэм этэ араас идэлээх үлэһиттэр, пенсионердар Александр Сидельников, Анатолий Старовойтов, Владимир Простихин уонна Егор Васильев курдук бастыҥ оонньооччулардаах буоламмыт кыайыыны ситистибит. Махтаныам этэ Олег Софронович Осипов тыа хаһаайыстыбатын техникумун физкультураҕа учуутала биһиэхэ заал биэрэн дьарыктанныбыт, ону сэргэ техникум дириэктэригэр Андрей Петрович Самсоновка, заалларын биэрэн, усулуобуйа олохтооннор, күрэхтэһиибит да үчүгэйдик барда. Бу күрэхтэһиибит сыала-соруга диэн саастаах спортсменнар эдэр ыччаттарга холобур көрдөрөн, тэтиммитин быспакка күрэхтэһэ, оонньуу, сүүрэ-көтө сылдьарбытыттан биһиги астынабыт!».
Баһылай ПОСЕЛЬСКАЙ.
