Волейболу олоҕун аргыһа оҥостубут, бэйэтин кэмигэр бастыҥ волейболист, 1№ ДьПУ преподавателэ, М.К. Аммосов аатынан ХИФУ тренерэ, судьуйалар коллегияларын бэрэссэдээтэлэ Дмитрий Дмитриевич Избеков үбүлүөйдээх 60 сааһыгар аналлаах турнирга 45-н үөһэ саастаах ветеран волейболистар тоҕус хамаандалара КФЕН спортивнай саалатыгар түмсэн күрэхтэстилэр.
Эрийсиилээх сытыы оонньууларга Семен Сабарайкин хапытааннаах университет «Сэргэлээх» волейболга кулуубун хамаандата финалга урукку сбербаан оонньооччуларыттан тэриллибит Александр Ларионов хапытааннаах «Олимп» хамаандатын 2:0 хоттулар. Гаврил Колосов хапытааннаах «Илин Эҥэр» хамаанда бириистээх үһүс миэстэҕэ тигистэ. Турнир бастыҥ волейболистарыгар, ону таһынан уон икки бириистэр туттарылыннылар. Сүрүн спонсордарынан «Сэргэлээх» ВК оонньооччута, «Сахастройсервис» генеральнай дириэктэрэ Никита Собакин, итиэннэ, «Сэргэлээх» волейболистара буоллулар. Университет вице-ректора Е.И. Михайлова уонна физкультура-спорт институтун быһаарыыларынан кэлэр сылтан Избеков бирииһэ эдэрдэр ортолоругар ыытыллыаҕа.
Баһылай ПОСЕЛЬСКАЙ
