Саха Өрөспүүбүлүкэтин үөрэҕириитин уонна физическэй культураҕа, спорка туйгуна, Уус Алдан Мүрүтүн нэһилиэгин бочуоттаах олохтооҕо Зинаида Афанасьева бирииһигэр 45 үөһэ саастаах ветеран дьахталлар өрөспүүбүлүкэтээҕи волейболга турнирдара 11-с төгүлүн ыытылынна.
Үлэҕэ-олоххо эргиччи көхтөөх дьахталлар элбэхтэр. Кинилэр ортолоругар, ыал тапталлаах ийэтэ, эбээтэ Зинаида Егоровна Афанасьевтар спортивнай дьиэ кэргэҥҥэ төрөөбүт-үөскээбит буолан, спорт куттаах. Убайа Станислав Афанасьев хапсаҕайга спорт маастара, өрөспүүбүлүкэ абсолютнай чөмпүйүөнэ, быраата Сэмэн «Урожайдар» биир тутаах волейболистара. Инньэ гынан Зинаида Афанасьева спорка олус бэриниилээх. 2001 с. Мындаабаттан саҕалаан, онтон сыыйа өрө тахсан, Мүрү нэһилиэгэр, «Майаҕатта Бэрт Хара» стадиоҥҥа, Мүрү 2 № орто оскуолатын спортивнай балассааккатыгар, Уус Алдан улууһугар сүүрүү уонна хаамыы декадаларын көҕүлээн ыыппыта. Сарсыардааҥҥы чэбдигирдэр сэрээккэлэри тэрийэн, «Автоледи» кулууп чилиэнигэр тиийэ, уонунан ааҕыллар общественнай үлэлэргэ кыттар. «Азия оҕолорун» оонньууларын солбуллубат судьуйата, өрөспүүбүлүкэ улахан күрэхтэһиилэрин, Бүтүн Россиятааҕы, аан дойду таһымнаах күрэхтэһиилэр аккредитационнай хамыыһыйаларын чилиэнэ, салайааччыта.
Кыайыы эҥэрдээх күүстээх спортсменка. Эрчимнээх эдэр саастарыгар Уhук Илин, Сибиир чэпчэки атлетикаҕа икки төгүллээх призера, баскетболга төрдүс миэстэлээх, Волгоградскай уобаласка студенческай тутар этэрээттэр волейболга күрэхтэһиилэрин кыайыылааҕа, Уhук Илин, Сибиир, Урал, Киргизия Универсиадатын чэпчэки атлетикаҕа күрэхтэһиитигэр 4-с миэстэлээх, СахаВА волейболга фестивалын үс төгүллээх кыайыылааҕа уонна призера, кумахха волейболга өрөспүүбүлүкэ чөмпүйүөҥкэтэ, чэпчэки атлетикаҕа уонна хайыһарга бастакы разрядтаах, волейболга, баскетболга, туризмҥа иккис разрядтаах, бэртээхэй гимнастка. Өрөспүүбүлүкэ тыатын сирин спортсменнарын чэпчэки атлетикаҕа спортивнай оонньууларын чөмпүйүөҥкэтэ уонна призера, чэпчэки атлетикаҕа уонна волейболга өрөспүүбүлүкэ дьахталларын спартакиадаларын хас да төгүллээх кыайыылааҕа, призера.
Зинаида Егоровна ити ситиһиилэринэн тохтоон, муҥурданан хаалбакка, 2009 сылтан сыллата ветеран дьахталлар ортолоругар волейболга күрэхтэһиилэри үрдүк тэрээһиннээхтик тэрийэн ыытар. Бу туһунан турнир үөрүүлээхтик аһыллыытын түгэнигэр «Сахава» кулуубун бэрэссэдээтэлэ Сергей Иванов, куорат Дууматыттан Антонина Титова уонна Зинаида Афанасьева бэйэтэ бэлиэтээн эттилэр, турнир кыттыылаахтарын эҕэрдэлээтилэр. Мүрү нэһилиэгэ, Үөһээ Бүлүү, Бүлүү иккитэ, Уус Алдан иккитэ, Горнай, Амма, Мэҥэ Хаҥалас бастаталыы сылдьыбыттара.
5 № оҕо спортоскуолатын спортивнай саалатыгар буолан ааспыт икки күннээх сыралҕаннаах оонньуулар түмүктэринэн, сүүрүү эстафетатыгар бастаабыт, волейболга иккис миэстэлэммит Татьяна Григорьева хапытааннаах Бүлүү хамаандата кыайыылааҕынан таҕыста. Кыайыылаах Бүлүү хамаандатын салайан аҕалбыт Галина Федорова ситиһии төрүөтүн туһунан кэпсээтэ: «Күрэхтэһиилэри көтүппэппит. Бу турнирга 2013 сылтан кыттабыт. Саастаах ветеран дьахталларга олус үчүгэй. Хамаандабыт быйыл төрүттэммитэ 25 сылын туолар. Саамай тутаах оонньооччубут Августина Унарова оонньууну киэргэттэ, бастыырбытыгар улахан төһүү күүс буолла. Хамаандабытыгар араас идэлээх үлэһиттэр бааллар: дьиэ-уот коммунальнай хаһаайыстыба үлэһитэ Митясова Елизавета, аптекарь Светлана Бубякина, культура методиһа Августина Егорова, мин, Галина Федорова, физкультура-спорт управлениетын сүрүн тренерэбин, педколледж экономиһа бииргэ төрөөбүт балтым Татьяна Григорьева, бииргэ төрөөбүт эдьиийим начальнай кылаас учуутала Львова Валентина Егоровна уонна оҕо уһуйаанын баспытаатала Нюрбинцева Розалия сүүмэрдэнэн кэлбиппит. Күн аайы көтүппэккэ эрчиллэбит, саалалар иллэҥ буолалларынан көрөн».
Саргылаана Оконешникова хапытааннаах Чурапчылар иккис, Анна Свинобоева салайан аҕалбыт «Хотун Төҥүлү» үһүс бириистээх миэстэлэргэ тигистилэр. Уус Алдан-1 төрдүс, Үөһээ Бүлүү бэһис, Уус Алдан-2 алтыс, хаҥаластар сэттис, «Бэрдьигэс» ахсыс буоллулар.
«Бастыҥ оонньооччу» Августина Унарова (Бүлүү), «быһааччы» Оксана Куприянова (Мэҥэ Хаҥалас), «көмүскээччи» Елена Адамова (Үөһээ Бүлүү), «туруорааччы» Вероника Пермякова (Чурапчы), «туһалаах оонньооччу» - Татьяна Григорьева (Бүлүү), «бастыҥ ийэ оонньооччу» - Галина Федорова (Бүлүү), «элбэх оҕолоох ийэ оонньооччу» - Антонина Титова (Дьокуускай), «эбээ оонньооччу» - Надежда Бубякина – Үөһээ Бүлүү, «элбэх сиэннээх эбээ оонньооччу» - Ульяна Захарова (Мэҥэ Хаҥалас), «бастыҥ хапытаан оонньооччу» - Матрена Иванова (Мэҥэ Хаҥалас) анал бириистэринэн биһирэннилэр.
Ветеран-спортсмен дьахталллар кэлэн күрэхтэспиттэрин таһынан, сылын аайы материальнай өйөбүл быһыытынан инбэлиит спорстменнарга харчынан көмө оҥороллор. Бу сырыыга волейболга Россия сүүмэрдэммит хамаандатын чилиэнигэр, Токиоҕа буолар Паралимпиадаҕа бэлэмнэнэр Россия спордун үтүөлээх маастарыгар Алена Дмитриеваҕа харчынан көмөлөрүн анаатылар.
Сааһырыыны киэр кыйдаабыт аҕам саастаах спортсменнар эдэрдии эрчимнэрин ыһыктыбаттар. Ветераннар волейболга хамсааһыннара киэҥник тарҕанара, көҕүлээһиннэр бааллара кэрэхсэбиллээх.
Баhылай ПОСЕЛЬСКАЙ
