Мэлдьэхситтэн төрдүс кылааһы бүтэрбит Проня Говоров, үһүс кылааһы бүтэрбит Альберт Алексеев, иккис кылааска үктэммит Илона Неустроева уонна Сандаара Степанова Турция Измир куоратыгар баран Европа чөмпүйэнээтигэр кыттан уон мэтээллээх төнүннүлэр.
Оҕолор кыайыыларын-хотууларын чиэстиир үөрүүлээх тэрээһин от ыйын 23 күнүгэр улуус дьаһалтатын мунньахтыыр саалатыгар ыытылынна. Кырачааннар уочараттаах дьоһун ситиһиилэрин бэлиэтиир тэрээһиҥҥэ улуус баһылыга Николай Старостин, улуус баһылыгын солбуйааччы Леонид Спиридонов, улуустааҕы дуобат федерациятын салайааччыта, физкултуура уонна успуорт управлениетын начаалынньыгын солбуйааччы Иван Нестеров, «Урожай» успуорт уопсастыбатын салайааччыта, управление кылаабынай исписэлииһэ Виталий Пестряков о.д.а. кытыннылар.
‒ Бу сүүстэн тахса мэтээлтэн аҥардас 32-тин маҥнайгы кылаастан таһаарыылаахтык дьарыктанар Проня Говоров араас таһымнаах күрэхтэһиилэргэ кыттан ылбыта. Төрөөбүт нэһилиэкпитигэр Мэлдьэхсигэ олипмпиадаҕа алтата кыттыбыт Тимир Пинегин аҕата, күүстээх Боссоойко, бараммат Байбал, аан дойду дуобакка федерациятын бэрэсидьиэнинэн үлэлээбит Владимир Птицын курдук дьон төрөөбүттэрэ-үөскээбиттэрэ. Дуобаппыт сайдар базатыттан халбаҥнаабат санаалаахпыт. 20 миэстэлээх интэринээттээхпит. Ньурбаттан, Үөһээ Дьааҥыттан, Тааттаттан уонна Кэбээйиттэн дьоҕурдаах оҕолор үөрэнэллэр, ‒ диэн Василий Васильевич билиһиннэрдэ.
Оскуолаҕа ааспыт сылтан дуобатынан уонна саахыматынан оҕо саадыттан үрдүкү кылааска диэри оҕолору 100 бырыһыан хабаллар. Дуобатчыт спортсмен оҕолор биир да өрөбүлэ, сынньалаҥа суох утумнаахтык дьарыктаналлар, икки сезоннаах «Мындыр» лааҕырга сырыттылар. Күрэхтэһиилэргэ кыттааччы дьиэ кэргэнтэн оҕо элбэх баар. Онон кэлиигэ-барыыга айан ороскуотугар үп-харчы өртүнэн кырыымчыктардаах. Ис дууһатыттан кыһаллан үлэлиир тириэньэр түөрт сыл тухары тус хамнаһыттан 1 мөлүйүөн 600 тыһыынча солкуобайы оҕолор сайдалларыгар диэн, иэскэ киирэн туран, кирэдьиит ылан төлөһө сылдьар. Оҕолор атырдьах ыйыгар Литваҕа Европа, онтон Голландияҕа норуоттар икки ардыларынааҕы уонна Ярославль куоракка аан дойдутааҕы чөмпүйэнээккэ кыттыахтаахтар. Оскуола дириэктэрэ Лариса Сыромятникова, тириэньэр Василий Куприянов уонна төрөппүттэр улууска дьоҕурдаах оҕолор күрэхтэһиигэ кытта баралларыгар анаан пуонданы тэрийиини туруорустулар.
Улуус баһылыга Николай Старостин тириэньэр Василий Васильевичка дьоҕурдаах оҕолору таба тайанан улахан таһымнаах күрэхтэһиилэргэ кытыннаран, улуус, өрөспүүбүлүкэ, ону ааһан дойду аатын ааттата сылдьарыгар махтанна. Инникитин хас биирдии успуорт көрүҥэр анал пуонда тэриллиэхтээҕин ыйда. Итиниэхэ тэрилтэлэри, предпринимателлэри кыттыһыннаран биир хамаанда быһыытынан үлэлиэхтээхпит диэтэ. Николай Прокопьевич Проня Говоровка туһаайан: «Атын оҕолорго холобур буолаҕын, онон өссө бэйэҥ кэннигиттэн элбэх ыччаты батыһыннаран, сайдан, үрдүк чыпчааллары дабайан ис», ‒ диэн баҕа санаатын эттэ.
Улуус баһылыга күн тириэньэргэ, Проня Говоровка 30, Илона Неустроеваҕа, Альберт Алексеевка 15, Сандаара Степановаҕа 10 тыһыынча солкуобай суумалаах сэртипикээттэри уонна Бочуотунай грамоталары туттарда.
Ааптар: Виктория БЕЛОЛЮБСКАЯ, Uluus.media
