Москва тириэньэрдэрэ дьарыгы икки нэдиэлэ устата өрөбүлэ суох сарсыарда 8 чаастан саҕалаан киэһэ 9 чаас диэки бүтэр гына тэрийдилэр. Ол быыһыгар икки төгүл муораҕа сөтүөлээн, саахымакка теорияны үөрэтэн, күрэхтэһэн, киэһэ аайы оонньоммут партияны ырытан күн-дьыл биллибэккэ ааста.
Анапаҕа Чурапчыттан тоҕус оҕо, икки төрөппүт буолан сырыттыбыт. Сарсыардааҥҥы дьарыкка теорияны үөрэтэллэр, эбиэттэн киэһэ күрэхтэһии ыытыллар. Киэһэ спортивнай чаас кэнниттэн ырыталлар. Быйыл 30 оҕо швейцарскай систиэмэнэн 7 тууру оонньоотулар. Былырыыҥҥы чөмпүйүөн Ньургун быйыл уолаттарга төрдүс буолла. Оттон Мурун-Тымпыйа оскуолатыгар үөрэнэр Лия Варламова кыргыттарга бастакы, Карина Романова иккис буоллулар. Лия Варламова чөмпүйүөннээбит Паша Лозовскайы кыайардыы олорон, уопут тиийбэккэ тэҥнэһэн хаалла, үһүс буолбут уолу хотто. Онон уопсай түмүккэ төрдүс миэстэ буолан хаалла. Киэһээҥҥи партиялары ырытыыга тириэньэрбит Артем Ахметов улаханнык хайҕаата: «Партия биһиги турнирбыт киэргэлэ буолла«, — диэн түмүктээтэ. Атын оонньооччуларбыт бэйэлэрин кыахтарынан кытыннылар. Тириэньэрдэр оҕолорго барыларыгар тэҥник, эйэҕэстик эрээри ирдэбиллээхтик сыһыаннаһар буоланнар, дьарыктанар сүрдээх туһалаах.
Лааҕыр кэнниттэн саахыматчыттарым Чычымахха аатырар “Кулунчук” турнирга кыттан кэллилэр. Манна улахан дьоҥҥо чөмпүйүөҥҥэ убаһа, оҕолорго 30000 солкуобай бириис биэрэр буоланнар, өрөспүүбүлүкэ күүстээхтэрэ бары кэлэллэр. Алта саастаах Айсен Оконешников иккис буолан сотовай телефону бириис тутта. Оттон бастакы миэстэни Анапаҕа хаалан дьарыктаммыт Алекс Иванов ылла.
Аны “Кустук” лааҕырга төрдүс симиэнэҕэ дьарыктанан баран балаҕан ыйыгар өрөспүүбүлүкэ чөмпүйэнээтигэр кыттар баҕа санаалаахпыт.
Ааптар: П. Калачев, Uluus.media
