Бу дьыл кулун тутар 3 күнүгэр Н.И.Прокопьев аатынан Хатыы орто оскуолатыгар сылын аайы ыытыллар Иванов Дмитрий Нилович – Кылыыһыт Миитэрэй аатынан оройуоннааҕы атах оонньуутун аһаҕас турнира «Өбүгэм кистэлэӊ күүһэ» бырайыак иһинэн 3с төгүлүн ыытылынна.
Бу турниры Дмитрий Нилович аатын чиэстээхтик сүгэ сылдьар сиэнэ, Саха Республикатын ыччат политикатын туйгуна, Дьокуускай куорат эдэр ыччат палататын бочуоттаах бэрэссэдээтэлэ, УФСИН Саха республикатааҕы общественнай сүбэтин чилиэнэ, «Нидстрой», «Нидстрой+» тэрилтэлэр тэрийээччитэ - Иванов Дмитрий Иванович көҕүлээн табаарыстарын кытта сылын аайы эһэтин төрөөбүт ытык-мааны түөлбэтигэр кэлэн ыыталлар. «Өбүгэм кистэлэӊ күүһэ» бырайыак сүрүн сыала-соруга чөл олоҕу өрө тутуу, түмсүүлээх, инникигэ-кэскиллээххэ эрэллээх буолууга, билиигэ-көрүүгэ дьулуһуу буолар.
Күрэххэ кыттыыны ыла кэллилэр: М.В. Мегежекскай аатынан Маалыкай, В.И. Максимов аатынан Малдьаҕар, А.Ф. Алексеев аатынан Чуукаар орто оскуолаларын хамаандалара. Бу турнир чэрчитинэн чирлидинг күрэҕэ эмиэ үһүс сылын ыытылынна.
Үгэскэ кубулуйбутунан тэрээһин аһыллыытын Норуот эмчиттэрин ассоциациатын чилиэнэ, «Аар Айыы» итэҕэлин уон биирис кэрдиистээх алгысчыта,үрдүк категориялаах норуот эмчитэ Иннокентьева Алиса Михайловна алгыс тылынан саҕалаата. Олохтоох оскуола директора Николаев Леонид Александрович, олохтоох дьаһалта баһылыгын солбуйааччы Яковлев Иннокентий Семенович, Дмитрий Нилович улахан сиэнэ Васильева Мария Ивановна, «Кистэлэӊ күүс» сурунаал редактора «Аар Айыы» республиканскай общественнай тэрилтэ тэрийээччитэ Платонова Марина Спиридоновна – Хомпорууна, республиканскай категориялаах бокса судьуйата Уваров Алексей Юрьевич, «Нидстрой» компания генеральнай директора Терянов Герман Николаевич, «Нидстрой+» компания генеральнай директора Туприн Николай Мирославович, Чуукаар орто оскуолатын английскай тылын учуутала Хабарова Клара Витальевна тыл эттилэр, кыттааччыларга ситиһиини баҕардылар, эти-хааны эрчийэн, сымса, тулуурдаах, дьулуурдаах буоларга үөрэтэр өбүгэ кистэлэӊ күүһүн баһылаан диэн баҕа санааларын эттилэр. Турнир аһыллыытын Хатыы оскуолатын урдуку кылааһын уолаттара атах оонньуутун өрө тутааччыта, тренера Ксенофонтов Анатолий Васильевич ырыатынан киэргэттилэр.
Быйылгы күрэххэ оҕолор сүрдээҕин тэринэн, таһымнара үрдээн кэлбитэ харахха быраҕыллар. Хамаанда уолаттара саастарынан икки бөлөххө хайдыһан илин-кэлин былдьастылар, кылыйан кыыраттылар, буурдаан бурҕаттылар. Кэрэчээн кыргыттар чирлидинг сана олимпийскай көрүӊүгэр холоннулар. Кыргыттарбыт быйыл бэлэмнэрэ күүстээх, оҥорор элеменнара да уустуга барыбытын сөхтөрдө, таӊастара-саптара дьэрэкээнэ, тупсаҕайа, ис-истэриттэн үөрүүнэн сыдьаайан кэрэ көстүүнү, сааскы сыламы бэлэхтээтилэр! Аттыбар олорбут кырачаан кыргыттар: «Аны түөрт сылынан биһиги үӊкүүлүүбүт ээ», - диэн улахан баҕалаах, бигэ санаалаах эппиттэрэ, оҕолорбут барахсаттар сыл аайы күүтэн элбэхтик бэлэмнэнэллэрин, сэӊээрэллэрин туоһулуур. Эдьийдэрим курдук саныыр оскуолам минньигэс астаах повардара дэлэй астаах остуолларыгар маанылаах ыалдьыт буолан, астына-дуоһуйа дойдубут эмис соботун, Мэӊэдьэк убаһатын хартатын, сыалаах хаһатын тото-хана сиэн күүс-уох ыллыбыт, илэ-сала сэһэргэстибит. Ол кэннэ, үгэспитин кэспэтибит, ССРС культуратын үтүөлээҕэ Иван Яковлевич Танхаров тэрийбит «Дьөһөгөй оҕото» түмэлигэр сырыттыбыт. Людмила Владимировна бэлэмнээн түмэл ис бараанын, хас биирдии экспонаты, Хатыы албан ааттаахтарын туһунан улахан кылаас оҕолоро кэпсииллэр. Оҕолорбут оскуоланы бүтэрэллэр, саӊаттан саӊа гидтар үүнэн-сайдан тахсаллар. Хас биирдии оҕо төрөөбүт дойдутун устуоруйатын этигэр – хааныгар иӊэринэ улаатар!
Барыта 57 оҕоттон күрэхтэһии түмүгүнэн:
Кылыыга – 2002-2003 с.т. 1м – Васильев Айаан (Чуукаар), 2м – Гуринов Эрчим (Чуукаар), 3м – Давыдов Петр (Чуукаар), 2000-2001 с.т. 1м - Шарин Айсен (Хатыы), 2м – Ксенофонтов Кэскил (Хатыы), 3м – Сергеев Гавриил (Чуукаар).
Буурга – 2002-2003с.т. 1м – Давыдов Петр (Чуукаар), 2м – Васильев айаан (Чуукаар), 3м – Гуринов Эрчим (Чуукаар). 2000-2001с.т. 1м – Шарин Айсен (Хатыы), 2м - Ксенофонтов Кэскил (Хатыы), 3м – Сергеев Гавриил (Чуукаар).
Куобахха – 2002-2003с.т. 1м - Гуринов Эрчим (Чуукаар), 2м – Васильев Айаан (Чуукаар), 3м – Босоев Михаил (Чуукаар), 2000-2001с.т. 1м Шарин Айсен (Хатыы), 2м – Сергеев Гавриил (Чуукаар), 3м – Ксенофонтов Кэскил (Хатыы).
Үс көрүӊ түмүгүнэн 2001-2002 с.т. – Васильев Айаан, 2000-2001с.т. – Шарин Айсен - Муӊутуур кыайыылаах аатын ылан үөрдүлэр-көттүлэр.
Черлидинг күрэҕэр – 1м - «Мэӊэдьэк мэниктэрэ» (Хатыы) салайааччы Григорьева М.А., Слепцова МВ. 2м – WBG (Чуукаар), салайааччы Хабарова К.В.
Быйылгы күрэхпит бастакы түһүмэҕэ эти-хааны эрчийэр, сымса, тулуурдаах буоларга үөрэтэр өбүгэ оонньуулара түмүктэннилэр. Аны муус устар ыйга бырайыакпыт интеллектуальнай түһүмэҕэ саҕаланыа.
Ньурба оройуонун атах оонньуутун федерациятын бэрэссэдээтэлигэр – Евсеев Сергей Ивановичка, үөрэҕирии салаатын начальнигар Аргунова Алевтина Петровнаҕа, үрдүк категориялаах норуот эмчитигэр Иннокентьева Алиса Михайловнаҕа уонна бары тэрийсибит Хатыы оскуолатын учууталларыгар, чуолаан директорга Николаев Леонид Александровичка махталбытын тиэрдэбит, баҕарабыт күрэх тэрийээччилэригэр, кыттааччыларга, ыалдьыттарбытыгар үөрэххэ, үлэҕэ, спорка өссө чаҕылхай ситиһиилэри. Көрсүөххэ диэри, күндү доҕоттор!
Мария ВАСИЛЬЕВА, Кынаттаах кылыыһыт Дмитрий Нилович улахан сиэнэ
