Спортсменнар Бэрдьигэстээххэ ыытыллыбыт биэс улуус кыттыылаах спартакиадаҕа кыайыылаах тахсаннар, көһө сылдьар Кубок улууска хааларын ситистилэр.
Бүлүү улууһун баһылыга хамаанданы кыайыынан эҕэрдэлээн туран, бэтэрээн спортсменнарга наҕараадалары туттарда. Ол курдук спартакиадаларга, күрэхтэһиилэргэ куруутун ситиһиилээхтик кыттар спортсменнар Н.С. Николаев, И.С. Павлов, Г. Иванов, А. Боронова «Бүлүү улууһун бочуоттаах бэтэрээнэ» анал ааты ыллылар. Элбэх бэтэрээн спортсмен уонна спартакиадаҕа улуустан үлэлээбит судьуйалар улуус дьаһалтатын Грамотатынан бэлиэтэннилэр. Хамаанда үрдүк ситиһиилээх спортсменнарын Наталья Еремисова уонна Дмитрий Егоров истиҥ иэйиилээх ырыанан эҕэрдэлээтилэр, онтон Ирина Петрова бэйэтин хоһооннорун доргуччу ааҕан бар дьон биһирэбилин ылла.
Көрсүһүүгэ мустубут бэтэрээннэр салгыы тэтимнэрин ыһыктыбакка, успуордунан утумнаахтык дьарыктанарга, күрэхтэһиилэргэ үчүгэй бэлэмнээх кыттарга, куруутун тэрээһиннээх, түмсүүлээх буоларга баҕа санааларын эттилэр.
Николай Федоров, газета «Олох суола»
