Дьокуускай куорат 17-с нүөмэрдээх оскуолатын иккис кылааһын бүтэрбит Дамир Семенов аҕатынаан Рустам Николаевичтыын Аллараа Бэстээхтэн Майаҕа диэри сүүрэ таарыйа сатыы барбыттар.
Дамир үөрэх кэмигэр оскуола кэнниттэн чэпчэки атлетика секциятыгар дьарыктанар. Сэттэ саастааҕар 9-10 саастаах оҕолору кытта марафоҥҥа сүүрэн, тириэньэр Вера Контоева бэлиэтии көрөн, эрчийэргэ санаммыт. Саас өрөспүүбүлүкэтээҕи марафоҥҥа, 400 м сүүрүүгэ иккис миэстэни ылбыт. Майаҕа эбээлээх эһэтэ Зоя Никоновна уонна Степан Андреевич Андреевтар олорор буоланнар, сайыҥҥы өттүгэр нэдиэлэҕэ үстэ «Манчаары» стадиоҥҥа 10 эргимтэни оҥорон эрчиллэр. Аллараа Бэстээхтэн Майаҕа диэри 30 биэрэстэни сатыы кэлбитин туһунан Дамир маннык кэпсээтэ:
— Мин аҕабынаан Аллараа Бэстээхтэн сарсыарда 7.00 чаастан Майаҕа Федор Попов аатынан искибиэргэ 16.00 чааска диэри сатыы кэллибит: сороҕор сүүрдүбүт, сороҕор хаамтыбыт. Ийэбит массыынан сылдьан кэтээтэ, иккитэ ойуур саҕатыгар киирэн аһаатыбыт. 15-һис биэрэстэҕэ тиийбиппит кэнниттэн, аҕам: «Тохтуохха, мантан ыла массыынанан барыахха», ‒ диэбитигэр сөбүлэспэтэҕим. Майаҕа кэлэн баран атаҕым көһүйбүт этэ. Сүүрэн иһэн суол кытыыларыгар үөннэри-көйүүрдэри көрдүм. Бырдаҕа олус элбэх. Кымырдаҕастар тоноҕоччулары соһон сии сылдьалларын дьиктиргии көрдүм, оннук 40-чэ тоноҕоччу сытара. Биһиэхэ Аллараа Бэстээхтэн айанныыр харчылара суох буолан, сатыы иһэллэрэ буолуо дии санаан, биэс массыына тохтуу сырытта. «Камаз» массыына суоппара биһигини Майа диэки баран иһэн көрбүтэ уонна төннөн иһэн бээҕинэттэ. Биир массыына саахалга түбэһэн туора баран хаалбыт этэ, аҕам тохтоон кэпсэппитэ, өссө аҕам билэр киһитэ көлүөһэтин уларытта сылдьара. Хас биирдии биэрэстэни аастахпыт аайы үөрэбит. Маннык сүүрэри сөбүлээтим, Майаҕа диэри кэлбиппититтэн астынным, ‒ диэн эдэр спортсмен түмүктээтэ.
Дамир улааттаҕына хирург буолар баҕа санаалаах. «Тоҕо диэтэр, биир сиргэ олоруом, сүүрэ сылдьыам, дьоҥҥо көмөлөһүөм этэ», ‒ диэн быһаарар. Кини сүүрүүнү таһынан логика, омук тылын куруһуоктарыгар сылдьар уонна эһэтинээн саахыматтыыр.
