Мэҥэ Хаҥалас улууһун успуорка федерациялара, успуорт ассоциацията, бэтэрээннэр уо.д.а. кыттыыны ыллылар.
Федерациялар икки ардыларыгар күрэхтэһии үөрүүлээх аһыллыытыгар спортсменнар параадтарын улуус успуорка уонна физическэй култуураҕа управлениетын начаалынньыгын солбуйааччы Иннокентий Баишев салайан киллэрдэ, көрсүһүү кыттыылаахтарыгар ситиһиилэри баҕарда.
Тэрээһиҥҥэ биир дойдулаахпыт, Параолимпийскай оонньууларга үрүҥ көмүс призера, Арассыыйа успуорка үтүөлээх маастара Анастасия Диодорова ыалдьыттаата. Хас биирдиибит өрөспүүбүлүкэ сайдыытыгар кылааппытын киллэрсэ сылдьарбытын, батыһааччылардаах буолуохтаахпытын, успуорт онуоха олус көмөлөһөрүн, күннэтэ дьарыктаныы сыалы-соругу ситиһэргэ олук буоларын бэлиэтээтэ.
Оройуон баһылыга, улууска успуорт ассоциациятын салайааччыта Николай Старостин чөл олоҕу, успуорду көҕүлээччилэргэ, спортсменнарга, тириэньэрдэргэ туһаайан: «Урукку сыллартан биһиги оройуоммутугар успуорду өрө тутабыт, салгыы күүскэ көҕүлээн тэнитэн иһэр сыал-сорук туруоруллар. Умнуллубут көрүҥнэри чөлүгэр түһэриигэ энтузиастарбыт үлэлии-хамсыы сылдьаллар. Күн-бүгүн хоккей федерацията үлэтин үчүгэйдик саҕалаата. Успуорт маассабай көрүҥэр ыччаттарбытын өссө киэҥник хабыахпытын наада. Инники күөҥҥэ сылдьар спортсменнарбыт холобуру көрдөрүүлэрэ салҕана туруо диэн эрэнэбит. Успуорт хайысхатыгар дьарыктанар усулуобуйаны тэрийиигэ салгыы үлэлиир былааннаахпыт. Быйыл Майаҕа буокса саалатын киллэриэхтээхпит. Хоккейга анаан «Эллэй Боотуртан» тымнытар тэрили аҕалан эрэбит», ‒ диэтэ.
Салгыы эҕэрдэ тыллары СӨ Физическэй култуураҕа уонна маассабай успуорка управлениетын салайааччыта Николай Цыпандин, СӨ Оҕо успуордун уонна успуорка резервэ управлениетын начаалынньыга Василий Егоров, төрүт дьарыктарга улуустааҕы федерация салайааччыта Дмитрий Тихонов уо.д.а. эттилэр.
Бу күн СӨ Успуорка миниистирин Махтал суругунан улуустааҕы хоккей федерациятын салайааччыта Анатолий Кычкин, улуустааҕы баһаарынай сулууспаттан Серафим Терентьев, В.П.Ларионов аатынан Майа орто оскуолатын физкултуураҕа учуутала Игнатий Прохоров, «Сиэрпэ уонна Өтүйэ» доҕордоһуутун 50 сылыгар аналлаах бэлиэни успуорт бэтэрээнэ Ходороттон Василий Гаврильев, тириэньэр Борис Ильин, оройуон баһылыгын Махтал суругун Аллараа Бэстээхтээҕи успуорт комплексын дириэктэрэ Лука Апросимов, буулдьанан ытыыга успуорт федерациятын бэрэссэдээтэлэ Леонид Борисов, оҕо тустууга успуордун оскуолатын тириэньэрэ Анатолий Олесов туттулар.
Марфа ПТИЦЫНА, «Эркээйи экспресс»
