Билиҥҥи кэмҥэ сайдыы хаамыытын батыһан хаһыаттар бэйэлэрин кумааҕы таһаарыыларын тэҥэ киэҥ куйаар ситимигэр анал электроннай таһаарыылаах, аныгылыы тылынан эттэххэ, сайтаах буолаллара кэм-кэрдии ирдэбилэ буолла.

Син эмиэ ол сиэринэн, 18 саастаах “Дьулурҕан” быйыл күһүҥҥүттэн бэйэтэ электроннай таһаарыылаах (сайтаах) буолла. Онно киирэргитигэр dzulurgan.ru диэн суруйаҕыт. Кырдьыгы баарынан эттэххэ, билигин кумааҕы хаһыаты сүрүннээн орто уонна кырдьаҕас көлүөнэ ааҕар. Оттон эдэрдэр, ыччаттар бары олох хаамыытын батыһан аныгы тэриллэргэ: компьютерга, төлөпүөҥҥэ сыһыннылар. Ити өттүнэн ылан көрдөххө, “Дьулурҕан” интернеккэ бэйэтэ таһаарыыланан, ааҕааччы бары араҥатын хабарга дьулуһар.

Кумааҕы хаһыат бу сыллар усталарыгар төһө да ыарахан кэмнэр, уларыйыылар бүрүүкэбиттэрин үрдүнэн бэйэтэ туспа ааҕааччылаах, бэриниилээх “ыалдьааччылаах” буолла. Ылан көрдөххө, билиҥҥи түргэн тэтимнээх олоххо сонуну-нуомаһы нэдиэлэҕэ биирдэ тахсар кумааҕы хаһыакка түмэн бэчээттээһин – татым дии саныыбын. Ол барыта кыаллыбат даҕаны. Итиэннэ оттон “Дьулурҕан” хаһыат быһыытынан анала – сонуну эрэ тарҕатыы буолбатах. Атын ханна да хатыламмат суруйуулары, сүрүннээн ааҕааччылар санааларын, олорон кэлбит олохпут историятын сырдатыы, күрэхтэһиилэри ырытыы, тыҥаан турар кыһалҕалаах боппуруостары дьүүллэһии, дьон туһунан суруйуу, спорка сыһыаннаах ааҕыллыамтыа матырыйааллары бэчээттээһин буолар. Эппитим курдук, кумааҕы хаһыат үксүн – санаа атастаһыыта, дьүүллэһии, ырытыһыы буолуохтаах.

Оттон күннээҕи туох баар спорт сонуннара сайтка тиһиллэн иһиэхтээхтэр. Ол эрээри, сайт эмиэ бэйэтэ интернет-хаһыат курдук көрүллэр. Хаһыат нэдиэлэҕэ биирдэ бэчээттэнэн тахсар эбит буоллаҕына, сайтка сонуннар күннэтэ, этэргэ дылы, сонуна сойо илигинэ тахсан иһэллэр.

“Дьулурҕан” интернеккэ анал электроннай таһаарыыта (сайта) түөрт ый үлэлээтэ. Улуу тренербит Д.П. Коркин кэриэһигэр көҥүл тустууга норуоттар икки ардыларынааҕы турнирга, Россия боксаҕа чемпионатыгар, көҥүл тустууга аан дойду чемпионатыгар сыһыаннаах элбэх матырыйааллар тиһигин быспакка таһаарыллыбыттара. Ютубка бэйэбит страницалаахпыт (Газета Дьулурҕан – YouTube), онно сүрүннээн көҥүл тустуу, хапсаҕай видеоларын угабыт, номнуо балтараа сүүсчэкэ сурутааччылаахпыт. Манна даҕатан эттэххэ, сайт иһинэн сотору кэминэн албан аатырбыт бөҕөстөр хапсыһыыларын ырытан, кэпсээн, көрдөрөр бырайыагы аһан үлэлэтэргэ соруктанабыт.

Ити курдук сайтка суһал сонуннар, биллэриилэр, хаартыскалар, видеолар, интервьюлар күннэтэ сырдатыллаллар. Спорт туһунан кэпсиир атын сайтары кытта тэҥнээн көрдөххө – сонуну түргэнник, суһаллык, бастакынан тутатына тиэрдэргэ дьулуһабыт. Сорохтор “бары сайтар биир кэмҥэ куоталаспыт курдук биир тиэмэни суруйаҕыт” диир буоллаххытына, dzulurgan.ru сайт уратылаах, атын ханна да тахсыбатаҕы, хатыламматы таһаара сатыыр. Ону бэйэҕит сайты көрөн сыаналыыргытыгар ыҥырабын.

Онон “Дьулурҕан” бэриниилээх ааҕааччылара чэппиэргэ бэчээттэнэн тахсар кумааҕы хаһыаты таһынан, аныгы олох сиэринэн “Дьулурҕаны” интернеккэ киирэн электроннай ньыманан ааҕаргытыгар, сайт үлэтигэр көхтөөхтүк кыттыһаргытыгар ыҥырабын! Оттон

биир идэлээхтэрбин, суһал сонуннаах буоллаххытына биһиги сайтпытыгар ыытаргытыгар көрдөһөбүн.

Петр ПАВЛОВ, “Дьулурҕан” хаһыат редактора.

Поделиться:

Комментарии

+1
0 +1 15.01.2019 21:14
Сайт улэлээбэт ди
Ответить

#Новости