Дьокуускай куорат Строительнай уокуругун бирииһигэр Россия үтүөлээх тренерэ Владимир Дмитриевич Попов кэриэһигэр көҥүл тустууга республика оҕолорго турнира 3 № оҕо спорт оскуолатын саалатыгар тохсус төгүлүн үрдүк тэрээһиннээхтик ыытылынна. 19 улуустартан, куораттан 13-14 саастаах 215 тустуук оҕолор, ыраах Усуйаанаттан, Булуҥтан, Эбээн-Бытантайтан, Өймөкөөнтөн, Ньурба нэһилиэктэриттэн тиийэ кэлитэлээннэр, бэрт сэргэх хапсыһыылары көрдөрдүлэр. Ийэлэр, аҕалар, эһээлэр, эбээлэр кэлэннэр, оҕолоругар-сиэннэригэр астына-дуоһуйа ыарыйдылар. Бу спорт оскуолаҕа үгүс оҕону тустуу уһуйбут Владимир Дмитриевич Попову кытта бииргэ тустуук, тренер быһыытынан бииргэ эрчиллибит, үлэлээбит тренердэр үөлээннээхтэрин туһунан үтүөөйдөбүллээхтэр.
Турнир тэрээһинэ да үчүгэй, сыллата тупсан иһэр. Куорат Управатын баһылыга, уруккута Украинаҕа тустуунан дьарыктаммыт, көҥүл тустууга ССРС спордун маастара Виталий Алексеевич Сорочан спорт оскуола ыытар турнирдарын суолта биэрэн тохтоло суох үбүлээн көмөлөспүтэ номнуо уон биэс сыл буолла. Бу да сырыыга ботуччу сыаналаах бириистэри кэлэн туттартаан турнир таһымын да үрдэттэ, күрэхтэһии кыттыылаахтарын да үөртэ.
Бииргэ өйөһөн үлэлэспит биир үөлээнээхтэрэ үтүө өйдөбүллээхтэр.
Үтүөлээх тренердэр, Россия чемпиона Валерий Петрович Керемясов, аан дойду ветераннарын чемпиона Иннокентий Семенович Кочкин история быыһын сэгэтэн ахталларынан, бу үтүөүгэскэ кубулутуллан сылы түмүктээн ыытыллар турнир тустууга дьоҕурдаах оҕолору көрүү, бэлиэтээһин быһыытынан биир сүрүн уратылаах. Инники өттүгэр оҕолору, кинилэр тренердэрин кытта хайдах үлэлэһиэхтээхтэрин торумнууллар. Онон, бэлиэ күрэхтэһии. Владимир Дмитриевич Попов педагог, тренер быһыытынан бэйэтэ туспа суоллаах-иистээх мындыр толкуйдааҕа. Республикаҕа Олег Корнилов, Борис Корнилов курдук улахан ыйааһыннарга Союз "Спартагын" кыайталыы сылдьыбыт күүстээх тустуук ыччаттары таһаартаабыта, тустуу сайдарыгар тренер быһыытынан кылаатын киллэрбитэ. Тумус туттар бөҕөһө улахан дьоҥҥо Россия үрүҥ көмүс призера, билигин кыахтаах бизнесмен Владимир Винокуров, Клим Горохов диэн иитиллээччитэ оҕолорго Россияҕа бастаабыта, эдэрдэрдэргэ миэстэлэспитэ. Ордук тахсыылаахтык сурдлимпиецтары кытта үлэлээн, Прокопий Николаевы, Юрий Копытовы, Юрий Николаевы Олимпиада үрдүк чыпчаалларыгар дабайалларын ситиспитэ. Доруобуйаларыгар хааччахтаах тустууктары бэлэмнээн таһаарыыны саҕалаабыта, маныах чопчу сыаллаах-соруктаах, программалаах этэ. Ити туһунан эрчийбит бөҕөһө, билигин тренердиир Василий Егорович Стручков истиҥник-иһирэхтик саныыр. Учууталлара ылбыт кирбиилэрин үрдүктүк туталлар. Сүбэтэ-амата, уопута, оҕолорго сыһыана спорт оскуолаҕа улахан төһүү буолбута.
Турнир кылаабынай судьуйата, ветераннарга аан дойду чемпиона Иннокентий Семенович Кочкин этэринэн, бу оҕо кыайыа диэн быһаччы этэр уустуктардаах. Тоҕо диэтэххэ, саамай тустар кэмнэригэр сылдьар оҕолор, албас-ньыма оҥорсор, кимтэн да, туохтан да дьулайбакка, куттаммакка, харса-хабыра суох, кэтэсиһэ-манасыһа сылдьыбакка, түргэнник быһаарсан иһэллэр. Инньэ гынан, элбэх бырахсыылардаах, көрөргө наһаа интэриэһинэй. Партерга даҕаны, стойкаҕа даҕаны, улахан маастардар оҥорор приемнарын барытын оҥорсоллор. Түөртүү баалга бырахсыылар олус элбэхтэр. Халбарыйан бырахсыы, прогиб ооҥорон бырахсыы, миэлиҥсэ, өттүк курдук амырыын албастары хотоойутук тутталлар.
Икки күннээх сыралаах киирсиилэргэ 24 кг Ярослав Осипов (Хаҥалас), 26 кг Коля Новосельцев (ДЮСШ-3 - Орто-Халыма), 28 кг Женя Черемкин (Уус-Алдан), 30 кг Ян Васильев (Ньурба), 32 кг Сережа Собакин (ДЮСШ-3), 35 кг Витя Яковлев (ДЮСШ-5), 38 кг Дима Яковлев (Уус-Алдан), 42 кг Гена Старостин (Усуйаана), 46 кг Айсен Алексеев (ДЮСШ-3), 50 кг Айтал Уйгуров (ДЮСШ-3), 55 кг Афоня Дмитриев (ДЮСШ-3), 60 кг Дьулустаан Гаврильев (Амма), 65 кг Ренат Чердонов (ДЮСШ-3), 70 кг Данил Иванов (ОЭУ), +70 кг Никита Прохоров (Мэҥэ-Хаҥалас) турнир кыайыылаахтарынан буоллулар. Иккис-үһүс бириистээх миэстэлэргэ Хатас, Нам, Амма, ДЮСШ-3, Уус-Алдан, Ньурба, ДЮСШ-5, Чурапчы, Усуйаана, Өймөкөөн, Мэҥэ-Хаҥалас оҕолоро тикситэлээннэр Владимир Дмитриевич Попов мөссүөннээх мэтээллэринэн, дипломнарынан сыаналаах бириистэринэн наҕараадаланнылар.
Аҕыйах сылынан тапталлаах Сахаларын сирин киэҥ түһүлгэлэргэ соргулаахтык ааттатар оҕолор тахсыахтара турдаҕа.
Баһылай ПОСЕЛЬСКАЙ
