Күрэххэ Хаҥалас, Бүлүү, Өймөкөөн, Горнай улуустарыттан уонна Дьокуускай куораттан барыта 153 оҕо кэлэн кыттыыны ылан барда. Хамаандалары Петр Андреевич Сивцев, Егор Иннокентьевич Никоноров, Николай Николаевич Данилов, Владимир Николаевич Саввинов, Василий Васильевич Павлов, Эдуард Романович Никифоров, Михаил Васильевич Иванов курдук эдэр спортсменнары, Саха сирин үүнэр кэскиллэрин иитэн таһаарар бэриниилээх тренердэр, спорт маастардара, спорт маастардарыгар кандидаттар салайан илдьэ сырыттылар.
Кэбээйитээҕи Оҕо спортивнай оскуолатын киэҥ уораҕайыгар буолбут түһүлгэҕэ ыҥырыылаах ыалдьыттар кэллилэр. Ол курдук Саха-канадскай оскуола саха тылын уонна литературатын үрдүк категориялаах учуутала, Владимир Егорович Сметанин бииргэ төрөөбүт балта, күрэхтэһии спонсора Мария Егоровна Прокопьева, Советскай Союз спордун үтүөлээх маастара, СӨ спортка үтүөлээх үлэһитэ, Арассыыйа бочуот орденын кавалера, Чурапчы улууһун бочуоттаах олохтооҕо, Россия биэс төгүллээх чемпиона, Европа икки төгүллээх чемпиона Василий Николаевич Гоголев, Дьааҥы улууһун бочуоттаах олохтооҕо, Советскай Союз спордун маастара Михаил Васильевич Ноговицын, Кэбээйи улууһун көҥүл тустууга сүүмэрдэммит хамаандатын сүрүн тренерэ, Россия спордун норуоттар икки ардыларынааҕы кылаастаах маастара, Өрөспүүбүлүкэ мэтээллэрин толору кавалера Александр Олегович Иванов уо.д.а.
Улуус дьаһалтатын аатыттан улуус баһылыгын солбуйааччы Савва Июльевич Афанасьев Алексей Егорович Мостаховка «Кэбээйи улууһун бочуоттаах олохтооҕо» аат иҥэриллибитин туоһулуур дастабырыанньаны туттарда. Михаил Васильевич Ноговицыҥҥа, Василий Николаевич Гоголевка, Александр Васильевич Васильевка дьаһалта аатыттан махтал суруктары туттарда.
Кэбээйи улууһун спорт салаатыгар салайааччы Алексей Нимаевич Сыроватскай эҕэрдэ, баҕа санаа тылларын этэн туран улуус аатыттан махтал суругу тренердэр Николай Николаевич Даниловка (Кэбээйи, ОСО), Михаил Васильевич Ивановка (Кэбээйи, Баҕадьа) туттартаата.
Икки күннээх тыҥааһыннаах киирсиилэр түмүктэринэн сүрүн бириис – «Alpha» мотоцикл күлүүһүн кыайыылаах тахсан Бүлүү улууһун спортсмена Дмитрий Винокуров сиэбигэр угунна.
Бу бирииһи Владимир Егорович Сметанин бииргэ төрөөбүттэрэ уонна ийэтэ туруорбуттара. Дима Россия икки төгүллээх спортинг күрэҕин чемпиона, сыалы ытыыга Россия спордун маастара Николай Николаевич Кобяков туруорбут бирииһигэр тигистэ. Биир улахан бирииһи – телевизоры Владимир Егорович Сметанин ийэтинэн аймахтара Баишевтар туруорбуттарын хапсаҕайга абсолютнай чемпион, Дьокуускай куорат тустууга Артур Говоров ылла.
Күрэхтэһии иккис күнүгэр Чурапчы улууһун бочуоттаах олохтооҕо, Россия биэс төгүллээх чемпиона, Европа икки төгүллээх чемпиона Василий Николаевич Гоголев маастар-кылаас ыытта. Бииртэн биир албастары көрдөрөн оҕолор болҕомтолорун тарта.
Татьяна Максимова-Лазарева, «Кобяйский вестник - Дабаан»