Күрэхтэһии олус тэтимнээхтик ааста, барыта 183 үүнэн иһэр бөҕөстөр Амурскай уобаластан, Саха сирин 14 улуустарыттан ону сэргэ, Дьокуускай, Алдан, Мирнэй, Нерюнгри куораттарыттан уонна биир Казахстан бөҕөһө көбүөргэ таҕыстылар. Турнир тэрийээччититтэн, «Саха сирин тимир суоллара» ААУо ген.дириэктэрин солбуйааччы Д.Д.Трофимовтан XII төгүлүн ыытыллар түһүлгэ туһунан ыйыталастым: - Икки күн устата, биһиги үчүгэй тустуулары көрдүбүт. Урут саҕалыырбытыгар манна кып-кыракый дьоннор тусталлар этэ. Билигин бэйэлэрин саастыылаахтарыгар Россияҕа, Европаҕа, Аан дойдуга миэстэлэспит, бастаабыт уолаттар элбэхтэр. Билигин күннээн туста сылдьар Александр Рассадин, Максим Заморщиков, Иван Оконешников курдук уолаттар бу манна тустан кыайыы көтөллөммүттэрэ. Быйыл, VI «Азия оҕолоро» норуоттар икки ардыларынааҕы Оонньууларга бэлэмнэнэн туран ыытабыт. Онтон, кэлэр сылтан бу күрэхтэһии саҥа циклга кыттар саастаах оҕолор тустуохтара. Кинилэр2020 сылга Саудавскай Аравияҕа ыытыллыахтаах Оонньууларга анаан сүүмэрдиир күрэхтэһиилэри ааһыахтара, - диэтэ улахан тэрийээччи Дмитрий Дмитриевич Трофимов.
Бастакы күн, алта ыйааһыҥҥа күрэхтэһии буолла. Манна чорботон бэлиэтиэҕи баҕарыллар, 35 кг ыйааһыҥҥа барыта 18 бөҕөс баара, манна Хаҥалас улууһун тустууга иитиллээччитэ, утарсааччытыттан түөрт сыл балыс Кирилл Дорожкин (2004 с.т.) Амма уолугар, билигин Р.М.Дмитриев аатынан олимпийскай эрэллэр училищеларын үөрэнээччитигэр Дима Григорьевка (2000 с.т.) улахан эрийсиилээх тустууга хоттордо уонна иккис миэстэни ылары ситистэ. Үһүс миэстэлэргэ, Уус Алдандан Петя Слепцов (2000 с.т.) уонна Чурапчыттан Афоня Ксенофонтов (2001 с.т.) таҕыстылар.
42 кг ыйааһыҥҥа, Ньурба уола, билигин Р.М.Дмитриев аатынан олимпийскай эрэллэр училищеларын үөрэнээччитэ, өрөспүүбүлүкэ күрэхтэһиилэригэр бэйэтин ыйааһыныгар кыайталыыр Саша Авелов (2000 с.т.) бастаата. Бу уол этэҥҥэ сырыттаҕына, дьаныардаахтык эрчилиннэҕинэ инникитин үчүгэй тустуук буолуо.
50 кг ыйааһыҥҥа, бу күн саамай элбэх 26 бөҕөс баара, Мэҥэ Хаҥаластан төрүттээх Чурапчы тустууга оскуолатын иитиллээччитэ Коля Сивцев (2000 с.т.) чөмпүйүөн үрдүк аатын ылла. Утары кимэн үчүгэй тустуулары көрдөрдө.
58 кг ыйааһыҥҥа, Родион Ефремов (2000 с.т.) Уус Алдан кэскиллээх бөҕөһө 16 тустуугу кэннигэр хаалларан кыайыылааҕынан таҕыста.
69 кг ыйааһыҥҥа, 9 эрэ кыттааччы баара, Мэҥэ Хаҥаластан сылдьар Р.М.Дмитриев аатынан олимпийскай эрэллэр училищеларын үөрэнээччитэ Матвей Гоголев (2000 с.т.) бастаата.
85 кг ыйааһыҥҥа, алта бөҕөс кэлбит. Бу ыйааһыҥҥа Чурапчы уола Андрей Иванов (2000 с.т.) кыайыылааҕынан буолла. Бу ыйааһыҥҥа Илья Громов (2000 с.т.) үһүс миэстэ буолан биир дойдулаахтарын үөртэ.
Иккис күн, Чурапчы, Мэҥэ Хаҥалас уонна Дьокуускай к. тустууга иитиллээччилэрэ ураты буочардаах тустуулары көрдөрдүлэр.
38 кг ыйааһыҥҥа 13 бөҕөс туһунна, биһиги уолбут Олег Давыдов (2003 с.т.) сааһынан балыс да буолан, күүһүнэн сабырыйтаран иккис буолары ситистэ. Бу ыйааһыҥҥа Дима Илларионов (2000 с.т.) Чурапчы бастаата.
46 кг ыйааһыҥҥа Дьокуускайтан Россия үрүҥ көмүс призера, бу түһүлгэ былырыыҥҥы чөмпүйүөнэ Эльшад Агаев (2002 с.т.) бу да сырыыга эрэллээхтик пьедестал үрдүкү үктэлигэр таҕыста.
54 кг ыйааһыҥҥа саамай элбэх кыттааччы 27 бөҕөс тустубута. Манна, Мэҥэ Хаҥаластан сылдьар сылдьар Р.М.Дмитриев аатынан олимпийскай эрэллэр училищеларын үөрэнээччитэ Уйгулан Иванов (2000 с.т.) урукку сылларга кэлэн эмиэ бастыыра, быйыл да быһа кыайда, бастаата.
63 кг ыйааһыҥҥа оччугуй эрдэхтэриттэн тустар уолаттар Таатта уола Албан Аввакумов (2000 с.т.) уонна Нерюнгриттэн Никита Плотников (2000 с.т.) бастыыр иһин тустууга бэрт дьүккүөрдээхтик, сытыытык туһуннулар. Бу иннинээҕи көрсүһүүлэрин Никита 10-0 кыайталаабыт буоллаҕына, Албаҥҥа баалынан сабырыйтарда, иккис миэстэнэн дуоһуйда. Албан бастаата.
76 кг ыйааһыҥҥа быйылгы үөрэх дьылыттан Р.М.Дмитриев аатынан олимпийскай эрэллэр училищеларыгар үөрэнэр Даниил Ивановка (2002 с.т.) күүскэ хаһыытаан –ыһыытаан ыарыйдыбыт да, сааһынан аҕа Алдантан төрүттээх өрөспүүбүлүкэ чөмпүйүөнэ Максим Лубянецкайга(2000 с.т.) хоттордубут. Онон, Даниил бу сырыыга эмиэ иккис миэстэни ылла.
Уолаттар түһүлгэҕэ тустуу элбэх албастарын туһанан, үгүс бырахсыылаах кыраһыабай хапсыһыылары көрдөрдүлэр. Ордук, туран хаалбакка, кимэн киирэн атахтан ылан , түргэннээн охторуулар, аттаан сылдьан тустууларга ордук төкүнүтэн, төһүүлээн, кыаһылыы тутан эргитиилэри оҥороллор.
Түмүккэ, «Саха сирин тимир суоллара» ААУо ген.дириэктэрин солбуйааччыта Д.Д.Трофимов кэскиллээх тустууктарга Уйгулаан Ивановка уонна Максим Лубянецкайга телевизордары анал бириис быһыытынан туттарда.
Аны сайын, Дьокуускай куоракка VI «Азия оҕолоро» норуоттар икки ардыларынааҕы Оонньуулар ыытыллыахтара. Манна кыайбыт оҕолор, сүүмэрдээһин бастакы түһүмэҕин аастылар.
Уйбаан УЙГУУРАП,
Степан САВВИН хаартыскаҕа түһэриитэ.
