П.П. Юмшанов аатынан Намнааҕы оҕо спортивнай оскуолатын эдэр бөҕөстөрө Дагестан өрөспүүбүлүкэтин Хасавюрт куоратыгар эрчиллэн кэллилэр

Шамил Умаханов аатынан Олимпийскай эрэл училищетыгар тоҕус уол маастарыстыбаларын үрдэттилэр, тустуу бастыҥ түһүлгэтигэр хапсыһыы кистэлэҥнэригэр уһуйуллан, элбэҕи биллилэр-көрдүлэр. Тириэньэрдэр Кузьма Сивцев, Вячеслав Стрекаловскай сатабыллаах салайыыларынан, оҕолорго болҕомтолоох сыһыаннарынан айан-сырыы, үөрэх, эрчиллии табыллыбытын бэлиэтиир тоҕоостоох.

Дагестаҥҥа эрчиллибит, үөрэммит уолаттар үгүстэрэ орто саастаахтар, кинилэр истэригэр улуус, өрөспүүбүлүкэ чөмпүйүөннэрэ, призердара бааллар. Онон уолаттар таһымнарын, бэлэмнээхтэрин көрдөрдүлэр, хайҕаннылар. Ыраах айаны төрөппүттэр, табаарыстар, Нам улууһун, Хатыҥ Арыы, Ленскэй нэһилиэктэрин дьаһалталара, үөрэх управлениета, биирдиилээн оҕо успуордун, тустууну өйөөччүлэр бары көмөлөөн төлөөтүлэр. Оттон биир дойдулаахпыт, аатырбыт тустуук, Ил Түмэн дьокутаата П.П. Юмшанов эрчиллиигэ суолу аһан биэрбит сүрүн киһилэринэн буолар. Петр Петрович көрдөһүүтүн быһа гыммакка, УОР салалтата биһиги уолаттарбытын ытыс үрдүгэр түһэрэн, үрдүк таһымҥа көрсүбүт. Онон П.П. Юмшановы убаастыылларын уонна сыаналыылларын биллэрдилэр. Эһиил орто саастаах оҕолор өрөспүүбүлүкэҕэ бастыыр иһин күрэхтэһиилэрэ Намҥа ыытыллыаҕа.

WhatsApp Image 2018 07 02 at 17.09.47 1 1

Эдэр бөҕөстөр, кинилэр төрөппүттэрэ, тириэньэрдэр көҥүл тустуу дойдута Дагестаҥҥа маҥнайгы, умнуллубат айаны бэлэхтээбит, үгүс аатырбыт тустууктар дойдуларын илэ харахтарынан көрөр, кинилэр хатыламмат ураты эйгэлэрин, эриэккэс айылҕаларын кытта чугастык билсэргэ кыах биэрбит Намнааҕы тустуу спортивнай оскуолатын дириэктэригэр, солбуйааччытыгар, бары көмөлөспүт, өйөөбүт салайааччыларга, төрөппүттэргэ улахан махталларын тиэрдэллэр.

Ааптар: «Эҥсиэли» хаһыат.

Поделиться:

Комментарии

Защитный код Обновить

#Новости