Өрөспүүбүлүкэҕэ биллэр-көстөр спортсменнар, тустуу аксакаллара, ис дууһаларыттан Саха сирин тустуутутугар ыалдьар дьон ыалдьыттаабыттара элбэҕи эрэннэрэр.
Ыалдьыттар 2021 с. Горнайга буолуохтаах «Манчаары оонньууларыгар» диэри улууска тустуу өссө күүскэ сайдарыгар бэйэлэрин сүбэлэрин, санааларын тириэрдэр сүрүн соруктаах кэлбиттэр. Көрсүһүүгэ саалаҕа толору киһи муһунна.
Биир дойдулаахпыт Макар Макарович Яковлев, көҥүл тустууга федерация бастакы Президенэ, ССРС көҥүл тустууга федерациятын исполкомун чилиэнэ, Россия юридическай ВУЗ-рын ыккардыгар ССРС самбоҕа чемпиона:
— Өрөспүүбүлүкэҕэ, Россияҕа Горнай улууһа тустуу историятыгар, сайдыытыгар улахан өҥөлөөх. Ини-бии Контоевтар, Петр Сивцев, Осип Михайлов ааттарынан, ситиһиилэринэн киэн туттабыт. Билигин ини-бии Ефремовтар, Михаил Васильев, Эдик Максимов көрдөрүүлэрэ эрэннэрэр. Онон, инникитин бу таһымтан түспэккэ өссө үрдүк кирбиилэри дабайар сорук турар.
Николай Николаевич Волков, Россия үтүөлээх тренерэ, Саха сиригэр көҥүл тустууну төрүттээччи:
— Хас биирдии тренер биирдии эрэ киһини тутан баран сылдьар. Ол түмүгэ кыра буолар. Ким эрэ Манньыаттаахха, атын Кабардина-Балкарияҕа дьарыктанара сыыһа курдук. Россияҕа өрөспүүбүлүкэ оҕолоро үчүгэй көрдөрүүлээх эрээри, кавказтары кыайбаппыт. Туох эрэ тиийбэт. Манна кэлбит оҕолорго туһаайан этэбин, аан бастаан Россияҕа чемпионнуу сатааҥ. Оччоҕо суолгут арыллар. Төрөппүттэр, тэрилтэ салайааччылара оҕолорго бары өттүнэн көмөлөһүҥ. Күрэхтэһиилэргэ, сбордарга сылдьалларыгар айаннарыгар, биллэн турар, ороскуоттаах буолар. Ол иһин өйөбүл хайаан да наада.
Кинилэри кытта ХИФУ профессора, көҥүл тустууга бэтэрээннэргэ биэс төгүллээх аан дойду чемпиона Николай Кириллович Алексеев, көҥүл тустууга Россия призера, самбоҕа хас да төгүллээх аан дойду чемпиона, СӨ тойуксута Владимир Дмитриевич Данилов, ССРС спорка маастара, Бүтүн Союзтааҕы турнирдар кыайыылааҕа Николай Петрович Иванов, РСФСР көҥүл тустууга чемпиона, ССРС Сэбилэниилээх күүстэрин чемпиона 1990-1993 сс СӨ спордун миниистирэ Петр Егорович Попов, 3 №-дээх оҕо спортивнай оскуолатын директора, көҥүл тустууга бэтэрээннэргэ икки төгүллээх аан дойду чемпиона Федот Архипович Соловьев, СӨ народнай артыыһа, сүүрүүгэ спорт маастара Владимир Семенович Татаринов кэлэн бэйэлэрин санааларын эттилэр, сүбэлэрин тириэртилэр.
Спорт бэтэрээннэригэр Валерий Скурухиҥҥа, Василий Пахомовка, Валентин Константиновка, Алексей Саввиҥҥа улууска көҥүл тустуу сайдыытыгар бэйэлэрин кылааттарын киллэрсибиттэрин иһин, Махтал суруктары, кинилэр ааттара туоһуламмыт, Анал бэлэхтэри туттардылар. Кинигэ ааптардара олохтоох библиотекаҕа, чемпион оҕолорго Эрэл Леонтьевка, Петя Поповка көҥүл тустуу сайдыытын туһунан кинигэлэри бэлэх ууннулар. Олохтоохтор уларсан ааҕыаххытын сөп.
Бу күн улууска көҥүл тустуу сайдарыгар быһаччы үлэлэһэр дьон мустан, аһаҕастык, ирэ-хоро кэпсэттилэр. Баһылыктар улууска инникитин көҥүл тустууну өйүүргэ тылларын биэрбиттэрин эттилэр. Өйөбүл баар буоллаҕына, түмүк даҕаны тахсыаҕа.
Ааптар: Күннэй Алексеева, газета "үлэ күүһэ"
