Спортивнай тустуу федерациятын толорооччу дириэктэринэн Ньурбатааҕы Оҕо спортивнай оскуолатын тустууга ыстаарсай тренерэ Сергей Румянцев буолла.
Тохсунньу 25 күнүгэр улуус баһылыгын 1-кы солбуйааччыта Артур Яковлев спортивнай тустуу Федерациятын тэрийэр сүбэ мунньаҕы салайан ыытта. Кини Федерация Устаабын билиһиннэрдэ, тустуу көрүҥнэрин улууска сайыннарарга сыал-сорук туруорда. 18 киһилээх Федерация тэрилиннэ. Президиум, ревизионнай хамыыһыйа талылынна.
Спорт үлэһиттэрэ, бэтэрээннэрэ, тэрилтэлэр салайааччылара тустуу көрүҥнэрин хайдах сайыннарар туһунан сүбэлэстилэр. Бу мунньахха спорду өйүүрүн иһин «Стройкомфорт» ХЭТ гендириэктэрэ Анатолий Степановка Оҕо спортивнай оскуолатын Махтал суруга туттарылынна.
Ааптар: Геннадий Антонов.