И.Е. Винокуров аатынан Намнааҕы педколледж оскуолаҕа киириэн иннинээҕи оҕолору кытта үлэҕэ бэлэмниир салаатын 3-с курсун студенткалара Сахая Попова, бэйэм иитиллээччим Мария Карпова кэлэннэр биһиэхэ практикаларын түөрт нэдиэлэ устата бардылар.
Түмүктүүр тэрээһиннэртэн биирдэстэринэн ким түргэнин, сымсатын быһаарар «Көрдөөх стартар» эстафета буолла. Ол курдук оҕолорбутугар күлбүт-үөрбүт, көр-нар аргыстаах клоуннар Юла уонна Веснушка ыалдьыттаатылар уонна сэргэх күрэхтэһиини ыыттылар.
Оҕолор сөбүлүүр мультиктарын ааттарынан «Робокоп Поли и его друзья», «Турбозавры», «Щенячий патруль» диэн үс тэҥ хамаандаҕа арахсан, араас көрдөөх, мэһэйдээх көрүҥнэргэ, илин-кэлин түсүһэн, хамаанда туһугар кыһаллан, бэйэ-бэйэҕэ көмөлөһөн күрэхтэстилэр.
Аата да этэрин курдук бу күрэхтэһии элбэх түһүмэхтээх, араас туттар тэриллээх, олус интэриэһинэйдик ыытылынна.
Көрүдьүөстээх клоуннар күрэхтэһии ыытаннар оҕолор үөрүүлэрэ үрдэ суох буолла. Ким дьулуурдаах кыайда, хотторбут да хомойбото. Онон бастакы миэстэҕэ саамай түргэн, иллээх, хомуллуулаах Баир Птицын «Щенячий патруль» хамаандата таҕыста, иккис – «Турбозавры» уонна үһүс кыайыыга дьулуурдаах Леня Егоров баһылыктаах «Робокоп Поли» буолла.
Бары кыттыбыт оҕолорго бастакы, иккис, үһүс миэстэлэргэ анал мэтээллэр, минньигэс бириистэр – сок уонна сакалаат – тигистилэр.
Саргылаана КУЗЬМИНА,
«Ымыы» оҕо сайдар киинин иитээччитэ,
Мындаҕаайы, Чурапчы