Быйыл 14-үс выпуск буолла. 95 студент-ыччаттар үрдүк үөрэх кыһатын бүтэрдилэр. Итини таһынан, Магистратураҕа спорт менеджердэрэ, тренердэр үрдүкү оскуолаларыгар эмиэ үөрэнэллэр.
Бу күннэргэ, Государственнай аттестационнай хамыыһыйа институту бүтэрээччилэр квалификационнай үлэлэрин тутта. Баһыйар үгүстэрэ Сахабыт сирин биллиилээх спортсменнара: Ньургун Скрябин, Дарман Кутубеков, Николай Ноев-Аянитов, Тимур Пестерев, Светлана Рогозина, Мотрена Ноговицына, Николай Гуляев, Наталья Шестакова,Анатолий Баишев, Федор Федоров, Виталий Корякин, Кузьма Татаринов, Сардаана Трофимова бааллар. Кырдьык да, өрөспүүбүлүкэҕэ ааттара-суоллара үчүгэйдик иһиллэр-биллэр, киэн туттар спортсменнарбыт!
Кинилэр ортолоругар, Россия, Европа, аан дойду студеннарын боксаҕа чөмпүйүөнэ, улахан дьоҥҥо аан дойду үрүҥ көмүс медалиһа, Риотааҕы Олимпийскай оонньуулар кыттыылааҕа, спорт үтүөлээх маастара Василий Егоров кыһыл дипломунан бүтэрэн, түөрт сыллаах үөрэҕин ситиһиилээхтик түмүктээтэ. Бакалавр идэтин ылла.
Аан дойдуга аатырбыт-сураҕырбыт Мэҥэ-Хаҥалас Харатыттан төрүттээх-уустаах тирии бэрчээкки маастара аттестационнай хамыыһыйа иннигэр бары боппуруостарга уонна эбии бэриллибит ыйытыыларга чаҕылхайдык эппиэттээбитэ сэҥээриини ылла. Интеллектуальнай сайдыылааҕын, киэҥ билиилээҕин-көрүүлээҕин, эрудициялааҕын көрдөрдө. Оннооҕор, экзамен хаамыытын кэтээн көрө-истэ олорор студеннар, преподавателлэр улахан астыныыны-дуоһуйууну ыллылар. Институту ситиһиилээхтик бүтэрбит Василий Егоровка Магистратураҕа киирэригэр рекомендация бэрилиннэ.
Биллэрин курдук, Василий Егоров спордунан утумнаахтык дьарыктанар. Билигин күөгэйэр күнүгэр сылдьар, спорка үрдүкү маастарыстыба оскуолатыгар тус тренерэ Артур Иннокентьевич Пахомовка эрчиллэр. Василий Егоров уочараттаах, иккис олимпийскай циклын саҕалаата. Россия сүүмэрдэммит хамаандатын чилиэнэ буоларынан, эрчиллэр-бэлэмнэнэр түмсүүлэри көтүппэт, улахан күрэхтэһиилэргэ кыттар сыаллаах-соруктаах. Чугастааҕы кэминэн Россия чемпионатыгар кыттыаҕа.
Кик-боксиҥҥа Россия, Европа, аан дойду чемпионката, спорт үтүөлээх маастара Оксана Васильева экзаменнарын эмиэ туйгун сыаналарга туттартаан бакалавр идэтин баһылаата. Аны, тренердэр үрдүкү оскуолаларыгар киирэн үөрэнэргэ рекомендацияланна.
Чурапчы института федеральнай. Ол эбэтэр, Москва хонтуруолугар, көрүүтүгэр-истиитигэр баар. Үбүлээһинэ барыта киинтэн. Россия киэнэ. Онон, материальнай базатын сайдыыта, тутуу барыыта, ол сиэринэн. Чугастааҕы, тирээн турар соруктарга, Россия уонна Саха Өрөспүүбүлүкэтин бырабыыталыстыбаларын көмөлөрүнэн уопсай дьиэ тутуута, автономнай энергетическэй киин тутуута бааллар, ону сэргэ, Россия спордун Министиэристибэтэ эһиилгиттэн региональнай спорка бэлэмнэнии киинин тутуутун саҕалыыр. Бырайыага барыта бүтэн бэлэм.
Институт студеннарын, спортсменнарын көрдөрүүлэрэ, ситиһиилэрэ ити ааттаммыт бүтүн дойду таһымнаах балысхан үлэлэргэ толору дьүөрэлэһэллэр. Эппиэттэһэллэр.
Быйыл, бу саҥа саҕаламмыт үөрэх дьылыгар, 122 миэстэҕэ 300 абитуриент конкурска кытынна. Инньэ гынан, билигин, өрөспүбүлүкэ 28 улуустарыттан, куораттарыттан киирдилэр. Преподавательскэй кадры бэлэмнээһиҥҥэ Россия үөрэххэ Министиэристибэтин кытта биир ситимнээх үлэ ыытыллар. Холобур, киин сиргэ ыытан тренердэри үөрэтии түмүгүнэн, буулдьанан ытыыга Россия уонна Европа чемпионаттарыттан 12 мэтээл кэллэ.
Институт сүрүн сыала-соруга: үөрэтии хаачыстыбатын үрдэтии. Ол чэрчитинэн, Чурапчытааҕы института Аан дойдутааҕы Арктическай үрдүк үөрэхтэр кыһаларын Ассоциацияларыгар киирдэ. Ити Ассоциацияҕа барыта 18 омук дойдуларын институттара бааллар. Үлэ сүрүн хайысхата: научнай бырайыактары көрүү-ырытыы, студеннарынан, преподавателлэринэн атастаһыннаран үөрэтии, аан дойдутааҕы граннарга кыттыы курдуктар бааллар. Омук тылын билии, үөрэтии болҕомто киинигэр турар.
Чурапчытааҕы физкультура уонна спорт институтун кэскилэ киэҥ.
Институту бүтэрэн диплом ылбыттарга итии эҕэрдэбитин тиэрдэбит!
Айымньылаах үлэни, спорка үрдүк ситиһиилэри баҕарабыт!
Баһылай ПОСЕЛЬСКАЙ.
