Бу үтүө тэрээһин Максим Максимович 75 сааһыгар ананна.Кини 1969 сыллаахха I Хомустаах нэһилиэгин төрүт олохтооҕун Баишева Галина Тимофеевналыын сүрэхтэрин холбоон, үс оҕолонон, элбэх сиэннэнэн 46 сыл устата бу нэһилиэги иккис дойдутунан ааҕан, ньир-бааччы олороллор. Биллэрин курдук, Максим Максимович Саха сирин спордун историятыгар киэҥник биллибит уонна убаастанар спорт маастардарыттан биирдэстэрэ буолар. Кини оччолорго (1960 сыллар ортолоруттан) төрөөбүт оройуонун, республикатын, ону ааһан, Россия киэҥ нэлэмэн сирдэрин тайаан сытар, Союз түһүлгэлэригэр тиийэ тустан, кыайыы көтөллөнөн бииртэн биир үктэлгэ тахсан, аар саарга аатырбыта. Кини олоҕор биир кэрэ түгэнинэн ааҕар, Никополь куоратыгар ССРС зонатыгар бастаан, салгыы 1966 сыллаахха ити күрэхтэһии финалыгар кыттан уонна алтыс миэстэни ылан, сахалартан Семен Дмитриев кэнниттэн иккис киһинэн итинник аакка тиксибитин билигин даҕаны киэн туттан кэпсиир. Билигин санаатахпына, Нам чулуу уолаттара бэйэлэрин ааттарын үрдүктүк да тута сылдьыбыт эбиттэр. Онтон кини аатынан турнирга барыта 14 хамаандаттан уопсайа 123 эдэр кыттааччы (2004-2006, 2002-2003 уонна 2000-2001 сыллаах төрүөх оҕолор) икки күнү эргиччи үөһэ-аллара быраҕыстылар. Ордук үчүгэй бэлэмнээх уонна эрчиллиилээх хамаандаларынан: Бүлүү улууһун оҕолоро (бу хамаанданы ыраахтан Дьокуускайтан – 3-с нүөмэрдээх оҕо спортивнай оскуолата (тренер- Кочкин И.С.) уонна Нам улууһуттан Хатыҥ Арыы оскуолатын иитиллээччилэрэ (тренер Стрекаловскай В.С.)ситистилэр. Маны таһынан, «Динамо» оскуолата (тренер Черкашин Е.И.) уонна Намнааҕы оҕо спортивнай оскуолата (тренер Сивцев К.А.) үчүгэй бэлэмнээхтэрин көрдөрдүлэр. Бары кыайыылаахтар уонна бириистээх миэстэлэри ылбыттар анал кубоктарынан уонна мэтээллэринэн, I Хомустаах уонна Үөдэй нэһилиэктэрин холбоһон туруорбут бириистэринэн наҕараадаланнылар. Бүлүүттэн – Рома Николаев, Дьокуускайтан – (ОСО-3) Амир Батыгов, Шамиль Дзауров, Намтан – Игорь Матвеев, Хатыҥ Арыыттан - Игорь Гермогенов уо.д.а. анал бириистэринэн наҕараадаланнылар.
Манна биир түгэни бэлиэтиир тоҕоостоох дии саныыбын, ол курдук, күрэхтэһиини үөрүүлээхтик аһыы чааһыгар, юбиляр табаарыстара – биир кэмҥэ бииргэ туста сылдьыбыт аҕа табаарыһа – көҥүл тустууга ССРС спордун маастара, Иван Поддубнай Кубогын хаһаайына,Саха АССР үтүөлээх тренерэ Н.К.Алексеев, ССРС спордун маастара, Али Алиев бирииһин үрүҥ көмүс призера С.В.Колесов, биир дойдулааҕа ССРС спордун маастара, Россия Физическэй культуратын уонна спордун үтүөлээх үлэһитэ Ф.А.Соловьев уо.д.а. истиҥ тылларынан көрөөччүлэр болҕомтолорун көтөҕөн, Максим Максимович туһунан тус санааларын уонна киэн туттунууларын өссө төгүл бигэргэтэн, ситэрэн биэрдилэр. Бу турнир оруобуна төрөөбүт күнүгэр түбэһэн,үс бүк үөрүүнү аҕалла,ол курдук, кэрэ-бэлиэ тэрээһиҥҥэ киниэхэ «Үөдэй нэһилиэгин” уонна “Нам улууһун бочуоттаах олохтооҕо” ааттара иҥэриллэн, манна “I Хомустаах нэһилиэгин” аата эрдэ ааттанан, Максим Максимович үөрүүтэ өссөүрдүү уонна үксүү турарыгар баҕарыам этэ.
Анатолий СОФРОНОВ – ОНТУОН
