Бэйэтин кэмигэр 800 м сиргэ сүүрүүгэ өрөспүүбүлүкэҕэ бастаталаан, рекорд олохтууру ситиһэ сылдьыбыт, РФ физическэй культураҕа уонна спорка үтүөлээх үлэһитэ, Саха Өрөспүүбүлүкэтин бырабыыталыстыбатын солбуйааччы бэрэссэдээтэлэ Михаил Дмитриевич Гуляев бирииһигэр кросска өрөспүүбүлүкэ турнирыгар аҕыс хамаандаттан 130-ча быһый атахтаахтар кытыннылар. Күһүҥҥү сүүрүүлэр 2009 сылтан үтүө үгэскэ кубулутуллан ыытыллаллар. Маҥнай утаа Маралаайы бөһүөлэгэр, кэлин Чурапчыга бэйэтигэр, аныгылыы көнө, үчүгэй тэлгэтиилээх «Боотур Уус» стадион сүүрэр суолугар астына-дуоһуйа күрэхтэһэр буоллулар.
Бу күһүҥҥү кроһу аан бастакы сылларыттан көҕүлээн тэрийэр, Мугудай нэһилиэгэр быйыл төрдүс төгүлүн баһылыгынан талыллыбыт Кузьма Иннокентьевич Пермяков, улуус депутаттарын мунньаҕын бэрэссэдээтэлэ Яков Павлович Оконешников, өрөспүүбүлүкэ спорка миниистирэ Георгий Русланович Балакшин, итиэннэ, Мугудай, Чурапчы нэһилиэктэрин уонна Чурапчы улууһун бочуоттаах олохтооҕо, кросс «буруйдааҕа» Михаил Дмитриевич Гуляев, күрэхтэһии кыттыылаахтарын итиитик-истиҥник эҕэрдэлээтилэр.
Чурапчы спорка институтун тренерэ Гаврил Алексеевич Константинов сүрүн судьуйалаата.
Чэмэлкэй күннээх күн күн-дьыл сүүрүн-көтүҥ диэбиттии туран биэрдэ!
Киһи эрэ ыраас, чэбдик салгыҥҥа сүүрүөх-хаамыах курдук!
Кросс кыайыылаахтара үксүлэрэ начальнай кылаастартан сүүрүүнэн дьарыктаналлар, сайынын спортивнай лааҕырга сылдьаллар, эт-сиин сайдыытын онно ылаллар. Уһан сиргэ сүүрүүгэ куоталаһыылар буоланнар дистанцияҕа тактическай киирсиилэр буолуталаабыттарын, старт кэнниттэн тута түргэтээбэккэ, сүүрэр бөлөх ортотугар сылдьан баран биэтэк чугаһыгар тэтимнэрин түргэтэтэн, соһуччу сулбу ойон тахсыталааннар, кыайталаабыттарын туһунан үөрүүлэрин кытта үллэһиннилэр. Итинник сүүрэргэ тренердэрэ сүбэлээбиттэрин, «бастаан бытааннык саҕалаан баран, онтон сыыйа утарсааччыларын ортолоругар киирэн, муҥ кыраайдарынан фиништээбиттэрин», - туох баарынан кэпсииллэр. Ситиһиилэрин тренердэригэр уонна ийэлэригэр, аҕаларыгар анаатылар. Институт студеннара бастаабыттара эмиэ түбэспиччэ буолбатах.
Манчаары оонньууларыгар үрүҥ көмүс мэтээллээх Константин Драгунов аан бастаан ийэтэ, өрөспүүбүлүкэ чөмпүйүөҥкэтэ, рекордсменката Екатерина Драгунова сүүрүүгэ уһуйбут, билигин сүүрүүнэн салгыы дьарыктанаары Чурапчы институтугар үөрэххэ киирбит, сыала-соруга эһиил Аммаҕа буолар Саха сирин норуоттарын сопртивнай оонньууларыгар бэлэмнэнии. 2000 м сиргэ сүүрүү кыайыылааҕа Наталья Харабынова Үөһээ Бүлүүттэн кэлэн, эмиэ сүүрүүнэн күүскэ дьарыктанаары институкка үөрэнэ сылдьар. Сүүрүүгэ ананан төрөөбүт курдук курбуу уһун уҥуохтаах Ньурба Хадыытыттан Кэскил Николаев эмиэ бэркэ сүүрдэ.
Саастарынан куоталаһыыларга үчүгэй бэлэмнээхтэр инники күөҥҥэ сырыттылар:
- 2006-2007 сс.т. 500 м. кыргыттарга Сайаана Слепцова (1.52,52, Мэҥэ Хаҥалас), Кристина Сивцева (1. 52,92 - Нам), Алина Кривошапкина (1.53,94 - Нам), уолаттарга Родион Макаров (1.35,71 – Чурапчы), Слава Габышев (1.36,03 – Мэҥэ Хаҥалас), Руслан Садыбалдиев (1.37,16 – Чурапчы);
- 2004-2005 сс.т. 800 м. кыргыттарга Катя Ким (2.45,38 – Чурапчы), Вика Хабарова (2.51,35 – Мэҥэ-хаҥалас), Элла Сергучева (2.54,88 – Мэҥэ Хаҥалас), уолаттарга 2004-2005 сс.т. Ваня Амбросьев (2.25,91 – Мэҥэ Хаҥалас), Денис Васильев (2.37,53 – Чурапчы), Сандал Находкин (2.38,84 – Нам);
- 2003-2004 сс.т. 1000 м. кыргыттарга Лена Мутовина (3.30,78 – Нам), Милена Никифорова (3.33,88 – Чурапчы), Дарина Ушницкая (3.39,25 – Уус Алдан);
- 1999-2001 сс.т. 2000 м. кыргыттар Наталья Харабынова (7.11,40 – ЧГИФКиС), Айталы Трофимова (7.11,80 – Нам), Маша Пермякова (7.20,01 – Мэҥэ Хаҥалас), уолаттар Константин Драгунов (5.44,11 – ЧГИФКиС), Данил Винокуров (5.45,23 – Уус Алдан), Артем Романов (5.49,17 – Мэҥэ Хаҥалас);
- 5 км ыччаттарга Дьулус Елисеев (14.31 – Чурапчы), Степан Степанов (15.08 – Үөһээ Бүлүү), Кэскил Николаев (15.48 – ЧГИФКиС);
- дьахталларга 5 км Сахаайа Власова – 17.39 (ЧГИФКиС), 4 км Саргылаана Флегонтова – 14.55 (Чурапчы), 3 км Екатерина Драгунова – 10.42 (Чурапчы), Валентина Доргуева – 3.27 (Таатта), эр дьоҥҥо 6 км Альберт Варламов – 24.56 (Таатта), 4 км Василий Готовцев – 12.57 (Нам), 2 км Константин Оленов – 6.55 (Горнай).
Ханнык хамаанда ордук бэлэмнээҕин эстафета быһаарда. Онуоха Чурапчытааҕы Республиканскай спортивнай оскуола-интэринээт бастакы, Мэҥэ Хаҥалас иккис, Нам үһүс миэстэлэри ылаттаатылар. Биирдиилээн уонна биирдиилээн бастаабыттарга. Миэстэлэспиттэргэ өйдөбүнньүк мэтээллэр, дипломнар, анал бириистэр туттарылыннылар.
Баһылай ПОСЕЛЬСКАЙ
