Саха сирин гиирэ спордун саҕаласпыт, пропагандалаабыт уонна бу көрүҥҥэ үчүгэй түмүктэри ситиспит, уһун сылларга тренердээбит И.И.Кулачиков сырдык кэриэһигэр анаммыт республиканскай таһымнаах турнир буолан ааста.
Турнир ахсынньы 5-6 күннэригэр кэрэ айылҕалаах Таатта улууһун Харбалаах бөһүөлэгэр К.Е.Владимиров аатынан киэҥ, сырдык арочной саалатыгар ыытылынна. Күрэхтэһии республика спорка федерациятын, улуус спорт отделын Харбалаах дьаһалтатын өйөөһүнүнэн үрдүк таһымҥа барда.
Иустин Иустинович Кулачиков Саха АССР бастакынан гиирэҕэ спорт маастара, Дальнай Восток уонна Сибиир икки төгүллээх чемпиона, Саха АССР абсолютнай чемпиона, Саха АССР сэттэ төҕүллээх чемпиона, Харбалаах бөһүөлэгин бастакы тутааччылартан биирдэстэрэ, профтехүөрэхтээһин туйгуна.
Бу көрүҥҥэ Саха сиригэр аан бастакынан турнир Харбалаахха ыытылынна. Турнирга республика 13 улууһуттани 100 кыттааччы кэлбитэ тэрийээччилэри улаханнык үөртэ. Бу сүтэн иһэн өрө охсон сайдан эрэр биир кыраһыабай спорт көрүнүн сэҥээрэн дьарыктанар бэл дьахталлар кэлбиттэрэ улаханнык үөртэ. Олохтоох дьаһалта баһылыга спотсмен, төрөппүт уола Альберт Иустинович күөрэхтэһии ыытылларыгар бары усулуобуйаны тэрийэн күрэхтэһээччилэр бэркэ астынан бардылар.
Күрэхтэһии бастакы күнүгэр спортсменнар регистрацияланнылар, тренировка саҕаланна. Күнүс 3 ч. түрнир үөрүүлээх аһыллыыта сүүсчэкэ кытта кэлбит спортсменнар, тренердэр, судьуйалар парааттарынан, үгэс болбут алгыһынан аһылынна. Манна республика гиирэҕэ федерациятыттан сүрүн тренерэ В.И.Дьячковскай, Тааттатааҕы спорт управлениятын начальнига Г.Г.Вырдылин, улуус баһылыга М.М.Соров, бииргэ төрөөбүт балта П.И.Артемьева, уола А.И.Кулачиков күрэхтэһээччилэргэ ситиһиилэри баҕаран, иһирэх тылларын эттилэр. Онтон киэһэ тыҥааһыннаах күрэхтэһии саҕаланна. Араас улуустартан күүстэрин холоно кэлбит спортсменнар тахсан кыахтарын көрдөрдүлэр. Манна бааллар эбит быччыҥ оонньуулара, бэл кэрэ аҥаардар 16 кг гиирэлэри өрө быраҕаттаан көрөөччүлэри сөхтөрдүлэр. Уонча судьуйа, кылаабынай судьуйа куораттан кэлбит А.Т.Жараев күрэхтэһээччилэри дьүүллээтилэр. Тренердэр, күрэхтэһээччилэр долгуйуулара саала иһигэр сылаас атмосфераны олохтоотулар. Бииртэн биир спортсмен тахсан илин-кэлин түһүстүлэр.
Олохтоохтор итии аһылыгынан икки күнү быһа күрэхтэһээччилэри, ыалдьыттары хааччыйдылар. Киэһэ 7 ч. олохтоох култуура дьиэтигэр Иустин Иустиновичка анаммыт истиҥ-иһирэх ахтыы киэһэтэ буолла. Манна сахалартан бастакы гиирэбиик туһунан доҕотторо, бииргэ үлэлээбит Харбалаах тутааччылара, аймахтара киһини долгутар ахтыылары онордулар. Иустин Иустинович хайдах курдук үлэтигэр бэриниилээҕин, хайдах курдук спорду таптыырын, кини холку майгынын, гиирэ курдук ыарахан спорт көрүҥэр ыччаты уһуйбутун аҕыннылар. Олохтоох уонна улуус култуура дьиэтин ырыаһыттара сэргэх ырыалары бэлэхтээтилэр. Иустин Иустинович быраата норуот маастара В.И.Кулачиков бырааттарыгар, спортсмен уолаттарыгар убайа төрөөбүт, улааппыт алааһын уруһуйдаабыт хартыыналарын бэлэхтээтэ.
Икки күннээх тыҥааһыннаах киирсии кэнниттэн муҥур кыайыылаахтар, эр дьоҥҥо Үөһээ Бүлүүттэн Михаил Саввинов кимиэхэ да иннин биэрбэккэ чаҕылхайдык бастаата. Киниэхэ Иустин Иустинович уолаттара балтылара туруорбут убаһа, дьахталларга Дьокуускайтан кэлбит Елена Гуляева Харбалаахтааҕы чох разреһын “Төлөн” холбоһук аатыттан 10 тыһ. сотовай телефонунан өйдөбүнньүк бириистэринэн наҕараадаланнылар.
Эдэр кэскиллээх спортсмеҥҥа Үөһээ Бүлүүттэн Тимофеев Никандрга 5000 харчынан, дьахталларга Тааттаттан Габышева Еленаҕа Октябрьскай нэһилиэгин дьаһалтатын бирииһэ туттарылыннылар. Ити курдук спортсменнарга араас сыаналаах бириистэри туттаран бары илии тутуурдаах астынан бардылар. Хамаанданан Үөһээ Бүлүү хамаандата эрэллээхтик бастаан, Саха республикатын спордун гиирэҕэ федерациятын кубогын илдьэ бардылар. Бу уустук, ыарахан спорт көрүҥүн республикаҕа киэҥник тарҕатан дьарыктанан эрэллэриттэн астынан, дуоһуйан бары даҕаны сүргэбит көтөҕүлүннэ.
Валентина СОФРОНОВА, Таатта
