Дэгиттэр спортсмен, киһи киһитэ
Аасыпыт үйэ 70-с сылларыгар сахалыы атах оонньууларыгар спорт маастардара бырааттыы Семен, Платон, Валерий Платоновтар төрөөбүт-үөскээбит Өлүөхүмэлэрин соргулаахтык ааттаппыттара. Ол кэмнэргэ, аҕам саастаах, хаалтыстаах, көстүүмнээх, ыраас, сырдык сэбэрэлээх, сүрдээх интеллигинетнэй, аҕам саастаах киһи күрэхтэһиилэргэ көтүппэккэ кэриэтэ сылдьан, бүтэһик туостарга тиийэн блокнотугар ким-төһөнү түспүтүн бэлиэтэнэр буолара. Кини уолаттарын спорка уһуйбут, олох киэҥ аартыгар үктэннэртээбит, республика спортивнай эйгэтигэр бэрт үчүгэйдик биллэр Николай Александрович Платонов. Хас түстэхтэрин ахсын уолаттарын аттыларыгар чугаһаан, тугу эрэ этэр-сүбэлиир быһыылааҕа. Бырааттыылар ол ахсын өссө тыыллан-хабыллан, көрдөрүүлэрин эбэллэрэ уонна республика улахан күрэхтэһиилэригэр эр-биир миэстэлэһэллэрэ. Итинник көстүү түбэһиэхчэ буолбатах этэ. Платоновтар дьиэлэрин тэлэгэһэлэрэ стадиону, тренажернай сааланы санатара. Штанга, гантеллэр, дьаадыратыттан мээчиктэригэр тиийэ спорт араас инбэнтээрдэрэ толору. Аҕалара уолаттарыгар бастакы тренердэрэ, кыраларыгар этэрин-сииннэрин эрчийэн улаатыннартаабыта.
Онно, Платоннах Валерий "биһигини баһыйар кыахтаах кыра бырааппыт тахсан эрэр",- диэн кэпсиир буолаллара. Ол ыра санаа кэмэ өр күүттэрбэтэҕэ. Кыра Платонов убайдарын эрэллэрин толорбута. Курбуу курдук уһун уҥуохтаах, Өлүөхүмэ Нөөрүктээйитин ыччата, аҕатын курдук сырдык хааннаах Александр Платонов, кырдьык да, кылыйар кырдал киэргэлинэн буолбута. Республика оҕолоругар тэҥнээҕин булбатаҕа. Улахан дьону кыайталыыра. Тохсус кылааска маастар значогун түөһүгэр иилиммитэ. Баһылай Манчаары, Саха сирин тыатын сирин оонньууларыгар абсолютнай чемпионнарынан буолуталаабыта. Төрөөбүт нэһилиэгэр оскуола дириэктэринэн үлэлии олорон тус бэйэтэ көҕүлээн тэрийбит "Нөөрүктээйи" волейболга кулууба "СахаВА" күрэхтэһиилэригэр миэстэлэһэрэ.
Дэгиттэр сайдыылаах Александр Платонов киһи быһыытынан общественнай олоххо көхтөөх, дьону кытта уопсай тыл булар, оскуолатын бэйэтэ уруһуйдаан, суруйан киэргэтэр худуоһунньук бэрдэ, гитараҕа да оонньуур-ыллыыр, уус-уран самодеятельность лауреата, нэһилиэк, оройуон Сэбиэттэрин депутатынан талыллан улахан убаастабылынан туһанара.
Ол эрээри, дьылҕа-хаан кытаанах. Күөгэйэр күнүгэр сырыттаҕына, баара-суоҕа 43 сааһыгар ыарахан ыарыы Александр Николаевич олоҕун букатыннаахтык илдьэ барбыта. Тапталлаах кэргэнэ Валентина Ксенофонтовна ыар сүтүгүн кыайан уйбатаҕа, сыл эрэ аҥаара быысаһан эмиэ күн сириттэн күрэммитэ. Билигин Александрдаах Валентина оҕолоро олус кылгас үйэлэммит ийэлээх-аҕаларын олохторун утумнааннар, дьоһуннук салгыыллар. Юрист идэлээх Анна Александровна ыал ийэтэ, үс оҕолоохтор, "Журфикс" сурунаал корреспондена. Физкультура-спорт идэлээх Александр Александрович республика спорка Министиэрстибэтин үлэһитэ, кэргэннээх, үс оҕолоохтор, сиэннээхтэр.
Үтүө аат үйэтитиллэр.
Сахаваболга сытыы киирсиилэр
Турнир үөрүүлээх быһыыга-майгыга аһыллыытыгар хамаандалары икки спорт көрүҥэр спорт маастара Дмитрий Иннокентьевич Шарин чуор куолаһынан хамаандалаан киллэртээтэ. Саха Республикатын спорка миниистирин 1 солбуйааччы Георгий Русланович Балакшин, республика волейболга федерациятын президенэ Владимир Ильич Чичигинаров, федерация вице-президенэ Афанасий Павлович Кириллин, СахаВА бэрэссэдээтэлэ Сергей Иванович Иванов турнир кыттыылаахтарыгар эҕэрдэлэрин тиэртилэр, ситиһиилэр баҕардылар.
Күрэхтэһии кылаабынай судьуйатынан Афанасий Эдуардович Кузьмин үлэлээтэ. Комментатор-судьуйа Александр Ушницкай күрэхтэһиилэр хаамыыларын чөллөркөй куолаһынан кэпсээн-ипсээн сэргэхситиини үөскэттэ. Саха эстрадатын сулуһа Байбал Сэмэнэп эрчимнээх хомоҕой ырыатынан волейбол түлүлгэтин киэргэтэн-тупсаран биэрдэ.
Сахавабол ураты балаһыанньалаах, туспа быраабылалардаах волейбол саҥа көрүҥэ. Идеятын аан бастаан Тулагыттан "Лыгый" волейболга кулуубун хапытаана Герман Степанович Терютин сахпыта, ону Чурапчы "Маарыкчаанын" волейболга кулуубун хапытаана Петр Дмитриевич Гуляев күүскэ өйөөн, республика нэһилиэктэригэр ылынан, өйөөн, оонньонор, дьэ тэнийэн эрэр волейбол бэрт интэриэһинэй көрүҥэ. Балассаакка саха балаҕанын санатар трапециялыы быһыылаах. Хамаанда састааба уон оонньооччуттан турар: 45 саастарыттан 54-гэр диэри биэстии уонна 55-н үөһэ эмиэ биэстии киһилээхтэр. Түөртүү очкону ыла-ыла атын састаап киирэн солбуйсан иһэллэр. Хайа хамаанда урут 24 очкону ылбыт кыайыылааҕынан тахсар. Хамаанда састаабыгар эдэрдэр, эбэтэр дьахталлар киллэриллиэхтэрин син. Ол эрдэ оҥоһуллар балаһыанньаҕа ыйыллар.
Бэрт сытыы, эрийсиилээх киирсиилэргэ, бастакы бөлөххө, Хатастар Аргыһы, Лыгыйы, Маарыкчааны хотуталааннар, бастаатылар; иккис бөлөххө Туймаадалар Уус-Алдан Сыырдааҕын, Төҥүлүлэри уонна Автомобилистар хотуталаатылар. Салгыы утарыта сирэй-сирэйгэр күөн көрсүһүүлэргэ ордук бэлэмнээхтэр бириистээх миэстэлэр иһин кииристилэр. Онуоха, Туймаадалар Уус-Алдан Сыырдааҕын хамаандатын 2:0 баһыйаннар үһүс бириистээх миэстэҕэ тигистилэр.
Финалга Хатас уонна Аргыс хамаандаларын икки ардыларыгар улахан хатыһыылаах оонньуулар буоллулар. Аргыстар бастакы паартияны ылан бараннар, иккис паартияны эмиэ бэркэ саҕалаан бараннар, подачаларыгар "босхо очколары" биэртэлээннэр, ситтэрдилэр. Онтон, ахсаан 23:23 буолан турдаҕына балассаака таһыгар охсоннор, көрсүһүү 1:1 тэҥнэһэ түстэ. Быһаарыылаах, эрийсиилээх үһүс паартияҕа Аргыстар (хап.Иван Решетников) Хатаһы баһыйан иһэннэр, эмиэ аукка охсуталааннар, 15:13 хотторуу хомолтотун, онтон физика учуутала Николай Дьяконов хапытааннах Хатастар бастакы миэстэлэнэн үөрүү өрөгөйүн биллилэр. Кыайыылаах Хатас бастакы хамаандатыгар оскуола дириэктэрэ Руслан Жирков, физкультура учуутала Василий Борисов, суоппар Григорий Евсеев, медтехника инженерэ Семен Толбонов, физкультура учуутала Владимир Еманов; иккис хамаандаҕа физкультура учуутала Евгений Петрищев, буҕаалтар Петр Захаров, "Связь-спорт" ООО ген.дир.солб. Олег Корнилов, урбаанньыт Вячеслав Филиппов, диспетчер Сергей Ушкарев, Хоту сир экологияҕа институтун отделын начальнига Ефим Апросимов тахсыылаахтык оонньоотулар.
Волейболистар ыһыы-хаһыы оройугар дуоһуйуу бөҕөтүн ыллылар.
Бириистэр да ботуччу туттарылыннылар. 55 саастаахтарга Анатолий Солдатов (Туймаада), Сергей Хоменок (Аргыс), Афанасий Кузьмин (Аргыс), Алексей Дмитриев (Туймаада), Василий Борисов (Хатас); 45 үөһэ саастаахтарга Артур Костенко (Аргыс), Янис Ефимов (Туймаада), Виктор Рожин (Аргыс), Вячеслав Филиппов (Хатас), Евгений Петрищев (Хатас) бастыҥ оонньооччуларынан ааттаннылар.
Турниры тэрийэн ыыппыт Валерий Николаевич уонна Александр Александрович Платоновтар күрэхтэһиини ыытыыга күүс-көмө буолбут Баһылай Манчаары аатынан спорт национальнай көрүҥнэригэр Киин дириэктэрэ, Ил Түмэн депутата И.Ю. Григорьевка, Саха Республикатын правительствотын бэрэссэдээтэлин солбуйааччы В.В. Омуковка уонна турнирга кэлэн кыттыыны ылан күрэхтэспит волейболистарга махталларын биллэрдилэр.
Баһылай ПОСЕЛЬСКАЙ.
