Муус устар 19-24 күннэригэр Томск куоракка 2001-2002 сыллааҕы төрүөх кыргыттар уонна уолаттар икки ардыларыгар “Үрүҥ көмүс мээчик” Бүтүн Россиятааҕы күрэхтэһии Сибиир уонна Уһук Илиҥҥи регионнар үөрэхтэрин тэрилтэлэрин икки ардыларынааҕы волейболга күрэхтэһии 2016 сыллааҕы иккис түһүмэҕэ буолан ааста.
Бурятия, Тыва, Красноярскай, Петропавловск-на-Камчатке, Иркутск,
Томск, Томскай уобалас Асино диэн сириттэн уонна Саха сириттэн – барыта 8 регионнар хамаандалара күөн көрүстүлэр.
Манна Саха сирин аатыттан Бээрийэ оскуолатын уолаттарын уонна Танда оскуолатын кыргыттарын хамаандата кыттыыны ылбыттара Уус Алдан улууһугар волейбол сайдан иһэрин арылыччы туоһулуур.
Бээрийэ хамаандатын начальник Павлова Анна Петровна, тренер Васильев Анатолий Анатольевич, тандалары начальник Аммосова Светлана Дмитриевна, тренер Аммосов Максим Николаевич салайан илдьэ сырыттылар.
Күрэхтэһии Томск куорат биир кэрэ бэлиэ улахан спортивнай дыбарыаһыгар ыытылынна. Оҕолор онтон чугас спортсменнар түһэр гостиницаларыгар түһэн сынньалаҥнык сырыттылар. Маннык үрдүк таһымнаах күрэхтэһии тренердэргэ да, спортсменнарга да улахан тургутуу уонна үчүгэй оскуола буоларын спортсмен барыта билэр. Төһө да бириистээх миэстэлэргэ тахсыбаталлар да күрэхтэһии очколарын көрөн сылыктаатахха атын хамаандалартан улаханнык хаалсыбаттар эбит.
Оҕолор күрэхтэһиилэргэ сылдьа үөрүйэх уонна хамаанда быһыытынан түмсүүлээх буоланнар сүргэлэрэ көтөҕүллэн сылдьыбыттарын, Сибиир биир улахан кырдьаҕас куоратын бары сонургуу, кэрэхсии көрбүттэрин тренер Максим Николаевич үөрэ-көтө кэпсиир.
Нэдиэлэ холобурдаах эрийсиилээх күрэхтэһии түмүгэр Томскай уобалас Асинотыттан сылдьар хамаанда 1 миэстэ, 2 миэстэ – Томскай куорат, 3 миэстэ – Иркутскай тахсыбыттар. Танда кыргыттарын хамаандадара 8 хамаандаттан 7, Бээрийэ уолаттара 7 хамаандаттан 7 миэстэлэри ылллылар.
“Биһиги оҕолорбут бу маннык таһымнаах күрэхтэһиилэргэ кыттыыларыгар Сахабыт Республикатын волейболга федерацията сылы быһа саастарынан көрөн “Көтөр мээчик” күрэхтэһиилэри ыытыыта улахан оруоллаах. Ол иһин федерация председателигэр Чичигинаров Владимир Ильичкэ, кини солбуйааччытыгар Сивцев Яков Семеновичка махталбыт улахан,”- диэн тренер Максим Аммосов санаатын үллэстэр.
Маны таһынан үөрэнээччилэр уонна салайааччылар хаһыат нөҥүө СР үөрэх министерствотын иһинэн үлэлиир физическэй культура управлениетын начальнигар Томскай Михаил Семеновичка, Уус Алдан улууһун баһылыгар Федотов Алексей Васильевичка, улууспут волейболга федерациятын председателигэр Колодезников Иван Ивановичка, улуус дьаһалтатын спорка уонна дьиэ кэргэн дьыалаларыгар салаатын начальнигар Давыдов Константин Васильевичка, ДЮСШ директорыгар Готовцев Николай Николаевичка, социальнай көмүскэл управлениетын начальнигар Сторожев Анатолий Дмитриевичка, үөрэх управлениетын начальнигар Тарская Ирина Михайловнаҕа, Танда уонна Бээрийэ оскуолаларын директордарыгар, ватсап нөҥүө өрүү бииргэ буолбут биир дойдулаахтарыгар истиҥ махталларын тиэрдэллэр.
Эдэркээн волейболистарбыт бу маннык үрдүк таһымнаах күрэхтэһиигэ кыттар чиэскэ тиксиилэрэ тренердэр уонна оҕолор утумнаах, дьүккүөрдээх үлэлэрин, дьарыктарын түмүгэ буоларын таһынан инники ситиһиилэр төрүөттэрэ буолуо диэн эрэнэбит.
Ефросиния КОЛОДЕЗНИКОВА
Танда, Аллан Төрдө
