Сүрүн бириис быйыл кулун тутар ыйга оҥоһуллубут, 680 000 солкуобай сыаналаах УАЗ Хантер массыына.
«Бүлүү Боотур» туһунан сиһилии улуустааҕы успуорт кэмитиэтин бэрэссэдээтэлэ Гаврил Евсеев кэпсиир:
— Биһиги улууспутугар «Бүлүү Боотур» күрэхтэһии үтүө үгэскэ кубулуйда. Алта сыл устата Ил Түмэн дьокутаата, биир дойдулаахпыт Юрий Окоемов сүрүн бирииһи – УАЗ хантер массыынаны оонньотто. Иккис миэстэҕэ спорткомитет 70 000 солкуобайы харчынан аныаҕа. Үһүс миэстэҕэ Бүлүү к. баһылыга Нюргустан Афанасьев 40-50 тыһыынча солкуобайдаах улахан бирииһи туруоруо. Онон кинилэргэ чөл олоҕу пропагандалыылларын, успуорду өйүүллэрин, көмөлөһөллөрүн иһин улахан махталбытын тиэрдэбит.
«Бүлүү Боотур – 2018» күрэхтэһиитигэр бэс ыйын 26 күнүнээҕи туругунан 14 күүстээх спортсмен кыттар баҕалаах. Кыахтаах-күүстээх уолаттарбыт Дьөккөнтөн Николай Николаев, Тааттаттан Владимир Михайлов, Чинэкэттэн Владимир Нифонов, II Күүлэттэн Семен Васильев, Илбэҥэттэн Юрий Протопопов, Сергей Протопопов уо.д.а.
Бастакы күн хапсаҕай, балаҕан нөҥүө гиирэни быраҕыы, массыынаны соһуу, атах оонньууларын национальнай көрүҥнэригэр спорт маастара, XX-с үйэ саамай бастыҥ спортсмена, «Сахаада-спорт» лауреата, уһуну ыстаныыга, атах оонньуутугар өрөспүүбүлүкэҕэ элбэх рекорду олохтообут биир дойдулаахпыт Василий Николаев кэриэһигэр сэттэлии туоска кылыы, буурдааһын, куобахтааһын ыытыллыаҕа.
Иккис күнүгэр «Оленск» стадиоҥҥа бастакы түһүмэхтэн хаалбыт 12 уол кыыһы эккирэтиигэ, мас тардыһыытыгар, Лобоой тааһын көтөҕүүгэ күүстэрин-кыахтарын тургутуһуохтара уонна кыайыылаахтар быһаарыллыахтара.
«Хомустаахха «Бүлүү Боотур-2018» саҕаланыытын киэн туттар биир дойдулаахпыт, саха эстрадатын биллиилээх ырыаһыта Аскалон Павлов арыйыаҕа. Онтон икки күнү быһа уолаттарбыт тыҥааһыннаах киирсиилэрин Дьокуускайтан спортивнай комментатор Дьулустаан Захаров иилээн-саҕалаан, кэпсээн-ипсээн көрөөччүлэргэ тиэрдиэҕэ«, — диэн түмүктээн кэпсээтэ.
Николай Федоров, "Олох суола"
