Быйылгы күрэххэ 16 нэһилиэк күүстээхтэрэ күөн көрүстүлэр

Үлэ уонна Тыа сирин сайдыытын сылыгар, политическай-уопсастыбаннай диэйэтэллэр С.Н. Донской-I төрөөбүтэ — 125, И.С. Егоров-Уһун Дьуона төрөөбүтэ — 125, С.С. Сюльскай төрөөбүтэ — 110, Н.И. Прокопьев төрөөбүтэ 100 сылларыгар аналлаах ыһыах Ньурбаҕа бэс ыйын 26-27 күннэригэр ыытылынна. Икки күнү быһа араас тэрээһиннэр, куонкурустар, күрэхтэр тиһигин быспакка бардылар.

Саамай элбэх көрөөччүнү түмпүт түһүлгэттэн биирдэстэрэ «Боотурдар оонньуулара». Күрэх иннинэ Арассыыйа успуордун маастарын, 5 төгүллээх Белоруссия чемпионун, 3 төгүллээх Европа призерун Владислав Андреевы чиэстээтилэр. Улуус баһылыга А.М. Иннокентьев Бочуотунай грамотаны, харчынан бириэмийэни, «Таркаайы нэһилиэгэ» МТ баһылыга В.В. Васильев Мархаҕа сир учаастагын сертификатын туттардылар.

IMG 20180627 170707

Быйылгы күрэххэ 16 нэһилиэк күүстээхтэрэ күөн көрүстүлэр: Октябрьскай нэһилиэктэн Саша Андреев , Хорулаттан Артем Иванов, Чуукаартан Владимир Кириллин, Хаҥаластан Николай Никифоров, Түмүктэн Дмитрий Григорьев, Сүлэттэн Юрий Иванов, Ньурбачаантан Дмитрий Григорьев, Өҥөлдьөттөн Николай Петров, Күндээдэттэн Вениамин Пайдютов, Чаппандаттан Саян Семенов, Маалыкайтан Иван Саввинов, Дьиикимдэттэн Ньургун Андреев, Мархаттан Аян Петров, Аканаттан Юрий Николаев, Үөдэйтэн Альберт Николаев, Маалыкайтан Владимир Федоров.

Икки күн устата үс төгүл үскэ, тутум эргииригэр, кулун тардыытыгар, мас тардыһыытыгар, 400 миэтэрэни сүүрүүгэ, ох саанан ытыыга, хапсаҕайга, таас көтөҕүүтүгэр күрэхтэстилэр.

Биирдиилээн көрүҥнэринэн түмүктэргэ: үс төгүл үскэ Саша Андреев I миэстэ, Иван Саввинов II миэстэ, Ньургун Андреев III миэстэ, тутум эргииригэр Владимир Федоров I-кы, Альберт Николаев  II-с, Аян Петров  III-с, кулун тардыытыгар Владимир Федоров I миэстэ, Вениамин Пайдютов II миэстэ, Саша Андреев  III миэстэ буоллулар. Мас тардыһыытыгар Владимир Федоров I миэстэни, Альберт Николаев  II миэстэни, Юрий Иванов III миэстэни, 400 миэтэрэни сүүрүүгэ Владимир Федоров I миэстэни, Саша Андреев II миэстэни, Ньургун Андреев III миэстэни, ох саанан ытыыга Альберт Николаев I миэстэни, Дмитрий Григорьев II миэстэни, Николай Никифоров III миэстэни, хапсаҕайга Владимир Федоров I миэстэни, Пайдютов Вениамин II миэстэни, Николаев Альберт III миэстэни ыллылар. Таас көтөҕүүтүгэр Владимир Федоров I миэстэ, Дмитрий Григорьев II миэстэ, Иван Саввинов III миэстэ буоллулар.

Быйылгы ыһыахха Ньурба улууһун нэһилиэктэрэ бириискэ убаһа туруордулар. Онон күрэх түмүгүнэн Маалыкайтан Владимир Федоров  бастакы миэстэни ылан, 3 убаһанан наҕараадаланна, Альберт Николаев  иккис миэстэ буолан икки, Ньургун Андреев III миэстэҕэ биир убаһа сертификаттарын үөрүүлээх быһыыга-майгыга туттулар. Төрдүс миэстэни ылбыт Александр Андреевка Герман, Зоя Титовтар дьиэ кэргэннэрэ МР-158 булт саатын сертификатын, атыттарга Ньурбатааҕы ГОК уонна «Автозапчасти» маҕаһыын бириистэрин туттардылар.

IMG 20180627 172453

Туймаада туонатыгар “Дыгын оонньуутугар” кыттыбыт Владимир Федоров төрөөбүт дойдутугар, Маалыкайын аатыттан кыттан күрэхтэһиини киэргэттэ:

— Бастакы кууруска үөрэнэ сылдьан Ыччат ыһыаҕар кыттаммын, бу түһүлгэҕэ үһүс миэстэни ылбытым. Ол кэнниттэн успуордунан утумнаахтык дьарыктаммытым.

“Боотурдар оонньууларыгар” Ньургун Андреев, Альберт Николаев, Иван Саввинов уо.д.а. үчүгэй көрдөрүүлээхтэр. Бииргэ үөрэммит уолум Проня Калакаров  “Дыгын оонньууларыгар” о.д.а. күрэхтэһиилэрбэр секундааннаан, массажтаан биэрэр чугас доҕорум. “Тоҕус томтор оонньууларын» кыайыылааҕа Любомир Николаев чэпчэки атлетикаҕа дьарыктаабыт бастакы тириэнньэрим. Аармыйаттан кэлиэхпиттэн Арассыыйа үтүөлээх тириэнньэрэ Петр Давыдов дьарыктыыр.

Куоракка баһаарынай чааска үлэлиибин, иллэҥ кэммэр «Модуҥҥа» дьарыктанабын. Төрөөбүт дойдубар сынньана, күүс-уох ыла кэллим уонна төрөөбүт Маалыкайым чиэһин көмүскээтим.

«Дыгын оонньууларыгар» бастакыбын кытынным. Инники сыалым-соругум — кыайыыга дьулуһуу.

Аҕата Федот Васильевич этэринэн, Володя ыал улахана.  Успуордунан бастаан дьиэтигэр дьарыктаммыт:

— Оҕону дьиэҕэ дьарыктыырга араас эрчиллиилэри оҥороро үөрэнэригэр турник баар буолуохтаах.  Володя төрдүскэ үөрэнэ сылдьан норуоттар икки ардыларынааҕы күрэхтэһиилэр кыайыылаахтара Иван Белолюбскай таһыгар бэйэтин уруһуйдуура. “Дыгын оонньууларыгар” сүүрүүгэ, оҕунан ытыыга көрдөрүүлэрэ намыһах буолан, үс бастакы миэстэҕэ хапсыбата. Уолбун улахан күрэхтэһиилэргэ арыаллыы сылдьан сүбэ-ама биэрэбин.

Ааптар: Антонина СЕМЕНОВА, Газета «Ньурба – Огни Нюрбы»

Поделиться:

Комментарии

Защитный код Обновить

#Новости