1976 сыл от ыйын 31 күнүгэр, Канада Монреаль куоратыгар Чурапчытааҕы спортивнай оскуола-интэринээт тренерэ Дмитрий Петрович Коркин иитиллээччилэрэ Павел Пинигин кыһыл көмүс, Роман Дмитриев уонна Александр Иванов үрүҥ көмүс мэтээллэри ылаттааннар, үйэлэргэ умнуллубат саха тустуутун улахан өрөгөйө буолбута. Бүтүн Саха сирин, саха норуотун дьоло-соргута арыллыбыта. Ол умнуллубат түгэнтэн, номнуо, 45 сыл ааста. Спорт чыпчаал кыайыытыгар туһаайыллыбыт уохтаах, төлөннөөх эҕэрдэлэр дуораһыйдылар.
Ил Түмэн бэрэссэдээтэлэ Алексей Еремеев, Бырабыыталыстыба бэрэссэдээтэлэ Андрей Тарасенко, эҕэрдэ тыллары эттилэр, государственнай наҕараадалары туттартаатылар. Павел Павлович Пинигиҥҥэ, Александр Николаевич Ивановка, Роман Михайлович Дмитриев төрөппүт кыыһыгар Марианна Романовна Крыловаҕа Ил-Түмэн Махтал Суруктарын, “Ил-эйэни уонна норуоттар доҕордоһууларын бөҕөргөтүүгэ” моонньуга иилиллэр бочуот бэлиэлэрин, итиэннэ, “Саха спортсменнара Олимпийскай оонньууларга өрөгөйдөөһүннэрин 45 сылынан” түөскэ анньыллар өйдөбүнньүк бэлиэлэри, дохсун ытыс тыаһын ортотугар туттартаатылар.
Россия Олимпийскай кэмитиэтин Президенэ Станислав Поздняков, Федерация Сэбиэтин чилиэнэ, “Биир ньыгыл Россия” партия президиумун чилиэнэ, Олимпийскай оонньуулар үс төгүллээх чөмпүйүөнэ, ССРС спордун үтүөлээх маастара, Россия Героя Александр Карелин, Россия тустууга Федерациятын Президенэ Михаил Мамиашвили, ССРС уонна Украина үтүөлээх тренерэ Георгий Бураков онлайн ситиминэн эҕэрдэлэрэ экраннарга көһүннүлэр.
Итинтэн салгыы, Дьокуускай куорат баһылыга Евгений Григорьев, Эдьигээн улууһун баһылыга Василий Сорокин, Чурапчы улууһун баһылыга Степан Саргыдаев, Сунтаар улууһун баһылыга Анатолий Григорьев, Саха Өрөспүүбүлүкэтин муниципальнай тэриллиилэрин толорооччу дириэктэрэ Петр Черемкин эҕэрдэлээтилэр, сыаналаах бэлэхтэри, сүүһүнэн тыһыынчалаах харчынан сертификаттары туттардылар.
Махтал, харда тыллара этилиннилэр.
Павел Павлович Пинигин Монреаллааҕы өрөгөй, бастатан туран, аныгы көлүөнэ тустууктарга ананарын, олимпиада мэтээллэрин ылалларыгар эрэнэрин, Роман Димтриев төһө да 11 сыллааҕыта кэккэттэн туораатар, дьиэ-кэргэнигэр үтүө дьыалалары оҥоро турарын, ити Саха Өрөспүүбүлүкэтин улахан кыһамьыта буоларын, киэн туттарын, бырааттыы Герман, Александр Контоевтары, Владислав Адреевы үрдүк ситиһиилэринэн чиэстээһиннэр буолбуттарын, спортсменнар кыайыыларын бэлиэтээһиннэри саамай сөптөөхтөрүн бэлиэтээтэ.
Марина Романовна Крылова Дмитриевтэр дьиэ-кэргэн аатыттан этэригэр, 45 сыллааҕыта, чахчы, геройдуу быһыы оҥоһуллубутун, Павел Пинигины, Александр Иванову кытта үөрүүлэрин тэҥҥэ үллэстэрин, Роман Дмитриев кыыһа буоларынан, аҕатынан киэн туттарын, аҕата айылҕаттан сэмэйин, олус үлэһитин, тулуурун, дойдутугар олус бэриниилээҕин, ити ураты хаачыстыбалара ыччаттарга эмиэ баар буоларыгар эрэнэригэр, спорт ыарахаттары туоруурга суолтатын бэлиэтээтэ.
Александр Николаевич Иванов Өрөгөй кэлиитэ тренердэриттэн Дмитрий Петрович Коркинтан саҕыллыбытын, дьиҥнээх триумфаторынан Дмитрий Петрович буоларын, Роман Михайлович аттыларыгар мэлдьитин баарыгар үөрэнэн хаалбыттарын, урут хас чиэстээһиннэр буоллахтарын аайы Роман Дмитриев, Павел Пинигин, Александр Иванов үһүөн куруутун кэккэлэһэ сылдьыбыттарын, аны ол хатыламматын санатта. Дмитрий Петрович Коркин уонна Роман Михайлович Дмитриев сырдык ааттарын биир мүнүүтэ саҥата суох туруунан бэлиэтииргэ көрдөспүтүн, саалаҕа кэлбит дьон бары сүһүөхтэригэр турдулар.
Атах тэпсэ олорон чэй иһэ-иһэ кэпсэтиигэ Саха Өрөспүүбүлүкэтин спорка миниистирэ Иннокентий Григорьев, Ис-Дьыала миниистирин солбуйааччы Юрий Алексеев, Чурапчы институтун физическэй культураҕа уонна спорка ректора Иннокентий Готовцев, Д.П. Коркин аатынан Чурапчытааҕы спортивнай оскуола-интэринээт дириэктэрэ Николай Гуляев, Чурапчы спордун салайааччыта Иван Оконешников, РФ уонна Саха Өрөспүүбүлүкэтин биллиилээх юриһа Макар Яковлев, сүүмэрдэммит хамаанданы бэлэмниир киин дириэктэрэ Михаил Пахомов, Үтүө Дьулуур оонньууларын чөмпүйүөнэ Василий Гоголев, ССРС үс төгүллээх призера, Киев физическэй культураҕа уонна спорка институтугар бииргэ үөрэммит доҕоро Михаил Ноговицын, “Прогресс” тутуу тэрилтэтин салайааччыта, быраата Алексей Пинигин, чугас аймахтара Рево Скрябин, Евдокия, Валерий Яковлевтар, Марианна Федотова истиҥ эҕэрдэлэрин анаатылар.
Үөрүүлээх түгэн Саха эстрадатын сулустара Байбал Сэмэнэп, Анастасия Готовцева, кэргэннии Анита-Сай, Эрхаан, Сиэйэ Уола, Далаана, Намыына ырыаларынан доҕуһуолланна. Дьоро күн хаартыскаҕа түһүүлэринэн түмүктэннэ.
Монреаллааҕы Олимпиада геройдарыгар – албан аат!
Баһылай Посельскай
