Кичэллээх бэлэмнээхтэр, эт-сиин өттүнэн сайдыылаах, спорка дьоҕурдаах икки тыһыынча кэриҥэ 13-16 саастаах оҕолор кыайыы үөрүүтүн биллилэр, төрөөбүт-үөскээбит сирдэрин-дойдуларын соргулаахтык ааттаттылар. Дальнай Восток киин куората омуктар доҕордоһууларын, ил-эйэ түһүлгэтигэр кубулуйда! Спорт 19 көрүҥнэрин чаҕылхай түгэннэрэ умнуллубаттык өйгө-санааҕа иҥнилэр.Приморьеларкичэллээхтик бэлэмнэммиттэр. Владивосток аан дойдутааҕы таһымнаах киэҥ тэрээһиннэри ыытарга олус табыгастаах, улахан сайдыылаах куорат. Японскай муора кытылыгар олорор, баай историялаах, дойдубут уһук-илиҥҥи эрэллээх көмүскэлэ. Сиэдэрэй куорат ырааһа, дьоно-сэргэтэ судургута, тутуулара тупсаҕайдара, уулуссаларын суоллара үчүгэйэ, чээлэй күөх ото-маһа хойуута, сылдьыбыт, көрбүт эрэ киһи хараҕын манньыталлар. Сахабыт сириттэн “ыалдьааччылар” элбэхтэрэ үөртэ.
Көрдөрүүлэр
Биһи спортсмен оҕолорбут бадминтонтан ураты 18 көрүҥҥэ күрэхтэстилэр. 20 хамаандалар түмсэн күрэхтэспиттэриттэн, Сахабыт сирин сүүмэрдэммит хамаандата VI миэстэҕэ тигистэ. Оҕолорбут туох-баар кыахтарынан күрэхтэстилэр.
Барыта: 37 мэтээллэннилэр, о.и. 12 кыһыл көмүс, 10 үрүҥ көмүс, 15 боруонса
1.Сибиир 44-36-35=116
2.Узбекистан 41-27-42=110
3.Москва 29-37-38=104
4.Урал 25-29-31=84
5.Татарстан 13- 6-13=32
6.Саха 12-10-15=37
Эрийсиилээх, кытаанах киирсиилэргэ, мэтээллэри ылаттаабыт көрүҥнэрбит:
Харбааһын (1 мэтээл): Владислав Адасько 3 миэстэ (Дьокуускай).
Чэпчэки атлетика (2 мэтээл - 1 кыһыл көмүс): 100 м м/с Аксинья Панова 1м
(Дьокуускай, Табаҕа), 400 м м/с Артем Балан (Нерюнгри).
Көҥүл тустуу (4): Амелия Лаптева 2м (Хаҥалас), Жанна Докторова 2м (Кэбээйи),
Эрхаан Куличкин 3м (Дьокуускай), Роман Кириллин 3м (Сунтаар).
Дзюдо (1): Елизавета Шамеева (Дьокуускай) 3м.
Бокс (3-1): Александра Слепцова 1м (Мэҥэ-Хаҥалас, Эбээн-Бытантай), Нарыйаана
Васильева 3м (Ньурба), Вадим Дербин 3м (Хаҥалас).
Кураш диэн татардар тустууларыгар (1): Анастасия Попова (Покровскай) 3м.
Буулдьанан ытыыга (3-1): Екатерина Алексеева 1м (Дьокуускай), Айхал Ковров 2м (Горнай); Любовь Кардашевская (Чурапчы) уонна Айхал Ковров буккаас паараҕа 3м.
Күүтүллүбүн курдук, элбэх мэтээллэри спорт сахалыы көрүҥнэрэ аҕаллылар.
Атах оонньуута (10-1): кылыыга Данил Володин 2м, Валентин Васильев 3м;
ыстаҥаҕа Данил Володин 2м, Валентин Васильев 3м, Ксения Калачевская 2м;
куобахха Данил Воеводин 1м = 34м61см-рекорд олохтоото, Валентин Васильев 3м;
үс көрүҥ түмүгүнэн Данил Володин (Өлүөхүмэ) 2м, Валентин Васильев (Дьааҥы) 3м. Иккиэн Дьокуускайга “Модун” спорткомплекска эрчиллэллэр. Ксения Калачевская (Мииринэй) 3 м.
Хапсаҕай (6-5): Алексей Корякин 45 кг (Мэҥэ-Хаҥалас), Вячеслав Ноговицын 50 кг, (Кэбээйи), Влад Ноговицын 55 кг (Сунтаар), Дмитрий Винокуров 62 кг (Бүлүү), Алексей Захаров 70 кг (Горнай) кыһыл көмүс мэтээллэри ылаттаатылар, Адам Николаев боруонса (Ньурба).
Мас тардыһыыта (5-3): 50 кг Айаал Гуляев (Уус-Алдан), 60 кг Роберт Удин
(Сунтаар), Юлиан Сидоров (Сунтаар) кыһыл көмүс, Игорь Пшенников (Өлүөхүмэ) үрүҥ көмүс, Айтал Антонов (Амма) боруонса.
Мини-футбол (1): Алексей Захаров, Игорь Калинин, Даниил Драч, Айкаар Мучин, Никита Павлов, Андрей Разуваев, Артем Романов, Максим Рудых, Данил Марсунов, Илья Тюкин оонньооччулардаах, футболистар Узбекистаны 3:0, Дальнай Востогу 6:1, Кыргызстан 3:3, Уралга 2:7, Приморьены 10:4, финалга тахсар иһин оонньууга Кыргызстаны 6:0, финалга 16-гар диэри саастаах уолаттарга быйыл Россия чөмпүйүөнэ Урал хамаандатын кытта оонньуулара 4:8 түмүктэннэ. Инньэ гынан, футболистарбыт үрүҥ көмүс мэтээллэргэ тигистилэр.
Онтон атын көрүҥнэргэ, биһиэхэ улаханнык тэнийэ, сайда илик кумахха волейболга, “3х3” баскетболга, үҥкүү “брейкинг” спордун көрүҥэр бүтэһик миэстэлэри ылаттаатылар. Художественнай гимнастикаҕа бэркэ баран иһэн предметтэрин мүччү тутан кэбистилэр. Мэтээллэргэ суоттаммыт “бэйэбит көрүҥнэрбитигэр” греко-римскэй тустууга, тхэквондоҕа, остуол тенниһигэр, самбоҕа, оҕунан ытыыга эрийсиилээх, тэҥ киирсиилэргэ мэтээлэ суох хааллыбыт. Балачча ситиһиилээхтик кыттыахпытын сөптөөх түгэннэри куоттардыбыт.
Сиһилии ырытыылар, дьүүллэһиилэр, кэпсэтиилэр күүтүллэллэр.
Буолан ааспыт Оонньуулар уруок, уопут быһыытынан туһаныллыахтара.
2024 с. Дьокуускайга буолар “Азия оҕолоругар” бэлэмнэнии саҕаланна.
Тэҥнээн көрдөххө
Бу иннинээҕи “Азия оҕолорун” Спортивнай оонньууларыгар Саха сирин сүүмэрдээмит хамаандатын оҕолорунан ылыллыбыт кыһыл көмүстэринэн уонна миэстэлэринэн тэҥнээн көрдөххө: 1996 с. 31-1 м, 2000 с. 33–1м, 2004 с. 36–1м, 2008 с. 116–1м, 2012 с. 40–1м, 2016 с. 27–2м көрдөрүүлэрдээх түмүктээбиппит. Тэрээһиннэр ханан да “уу бычыгыраабат” чаҕылхайдар этэ. Алта Оонньуулар бары Дьокуускайга ыытыллыбыттара. Аны кэлэн санаатахха, күрэхтэһэргэ бары өртүнэн бэртээхэй усулуобуйалар тэриллибиттэр эбит. Кэлии делегацияларга ураты болҕомто баара. Ол туһунан атын хамаандалар бэрэстэбиитэллэрэ үтүө тылларынан ахталлар, Саха сиригэр тиийэ сылдьыахтарын баҕараллар.
Ааспыт Оонньуулары кытта тэҥнээтэххэ быйылгы көрдөрүүбүт быдан сэмэй буолла.
Үс иһигэр киирбэтэхпит долгутар.
Ыйыталаһааччы элбэх.
Хааччахтааһыннар охсуулара
“Азия оҕолорун” III, IV, V, VI Оонньууларын тэрийэн, салайан ыыппыт, 2003-2016 сылларга Саха Өрөспүүбүлүкэтин Госкомспордун бэрэссэдээтэлинэн уонна спорт миниистиринэн үлэлээбит, билигин Ил Түмэн физическэй культураҕа уонна спорка Сис кэмитиэтин бэрэссэдээтэлэ, Россия уонна Саха Өрөспүүбүлүкэтин физическэй культураҕа үтүөлээх үлэһитэ Михаил Дмитриевич Гуляев Оонньуулар тэрээһиннэригэр уонна түмүктэригэр санаатын кытта үллэһиннэ:
“2020 с. пандемия мэһэйдээн Оонньуулар буолбатахтара. Былырыын Приморскай кыраай губернатора Олег Николаевич Кожемяко өйөөн, ыытарга ылынан, кылгас кэм иһигэр бэлэмнэнэн, стадионнарын, спортивнай саалаларын өрөмүөннэрин бүтэрэн, норуоттар икки ардыларынааҕы таһымҥа эппиэттиир инвентардары, оборудованиелары аҕалан, күрэхтэһиилэри үчүгэй таһымҥа ыыттылар.
Тэрээһиҥҥэ биир улахан алҕас оҥоһулунна. Ону биһиги 2024 с. хатылаабаппыт туһугар этэбин. Ол – тренердэри оҕолортон ыраах “Нуучча арыытыга” (Русский остров”) Уһук-Илиҥҥи Университекка, онтон, оҕолору туспа “Океан” лааҕырга туһунан бэйэлэрин олордубуттара буолар. Биһи оҕолорбут ситиһиилэрэ сэмэй. Аны икки сылынан “Азия оҕолорун” Оонньуулара бэйэбитигэр ыытыллыахтара. Онно күрэхтэһиилэр түмүктэрин ырытан, сыыһаларбытын көннөрөн, бу күнтэн үлэ саҥаттан туруоруллуохтаах.
Мин манныктарга тохтуом этэ.
Бастакытынан. Бу икки сыл устата пандемия кэмигэр биһиги оҕолорбут дьарыктаммакка дьиэлэригэр хаайыллан олордулар. Оннук сыыһа дьаһал тахсан оҕо спорда хааччахтанна. Атын омук дойдуларыгар, Россия киин куораттарыгар оҕо спордун тохтоппокко, биир базаҕа кииннээннэр, сбордары тэрийэн, оҕолору биир сиргэ түмэн, аһатан, биир сиргэ дьарыктааннар, процеһы тохтоппотохтор. Онтон биһиэхэ, куоракка баар оҕолору саамай сүрүннүүр Олимпийскай эрэл Училищебытын икки сыл устата сабан туран ковид ыарыыны утары эмтиир балыыһа оҥорбуттара. Бу олох өйдөммөт дьаһал тахсан оҕо спордун улаханнык атахтаата дии саныыбын. Куорат курдук киэҥ сииргэ ханна баҕарар балыыһаны аһыахха сөп этэ. Ити дьиҥинэн кыаллар боппуруос.
Иккиһинэн. Иккис улахан сыыһанан ааҕабын - 2021 с. Олимпийскай эрэл Училище көрдөрүүтэ (результата) суох диэннэр, түөрт саамай “Азия оҕолорун” Оонньууларыгар кыттар чэпчэки атлетика, буулдьанан ытыы, тхэквондо, хайыһар отделениеларын сабан, оҕолор түмсэн дьарыктанар сирдэрэ, базата суох хааланнар, бу көрүҥнэр уһун уонунан сыллар усталарыгар бэйэлэрин хайысхаларынан үлэлээн кэлбит систиэмэлэрин суох оҥордулар. Маны хайдах да аны саҥаттан штат булан, төттөрү олоххо киллэрэр улахан уустук буолуо дии саныыбын. Саха сирин оҕолоро сүүрэр, буулдьанан ытар, аҕыс ый уһун кыһыннарга хайыһарынан дьарыктаналлара тохтоото. Маны чөлүгэр түһэрэргэ улахан үлэ эрэйиллэр. Санааны холбоон, бары ылсан, бу сыыһа дьаһал көннөрүлүннэҕинэ эрэ табыллар. 2021 с. көрдөрүү мөлтөх диэн, Нерюнгри, Сунтаар, Чурапчы Республиканскай Олимпийскай солбук оскуолаларыттан 27 штаты кыччатыы буолбута. Ол түмүгэр 1800 оҕо анал тренерэ суох хаалбыттара, дьарыктанан бүппүттэрэ. Бу сыыһа дьаһал оҕо спордугар охсуута улахан буолла.
Үсүһүнээн,бБилигин оҕо спорда Россияҕа, тас дойдуларга күүскэ турар, сайдан барар кэмэ. Оҕо спорда сайдарыгар элбэх үбү-харчыны выезтарга, сбордарга көрөн, болҕомто ууруохха наада. Оҕолор атын сиргэ бараннар биир саастыылаахтарын кытта тэҥҥэ күрэхтэстэҕинэ, дьарыктаннаҕына эрэ көрдөрүүтэ тупсар, сайдар. Сбордар күрэхтэһии барар сирдэригэр буолаллара ордук буолуо этэ. Оҕолору кытта үлэлиир тренердэр сылын аайы аайы бэйэлэрин билиилэрин хаҥатар гына үрдүк таһымнаах соҕуруу куораттарга курстарга, семинардарга, научнай-практическай конференцияларга, форумнарга кыттыахтарын наада. Хас биирдии тренер биллиилээх учуонайдар үлэлэрин ааҕан, методикаларын тупсаран иһиэхтэрин наада. Старшай тренердэр ситиминэн кэлэр технологиялары туһаныыны баһылыахтаахтар. Толкуйдаан үлэлиир, инникитин улахан кыайыы буолуо этэ.
Оҕолорбут бэйэлэрэ өйдөрө-санаалара төһө тиийэринэн, сүрдээҕин кыһаллан күрэхтэстилэр. Ол гынан баран пандемия уонна выезтара суоҕа таайда. Сайдан иһэр организм күннэтэ дьарыктанан, үүнэн-сайдан иһиэхтээх. Омук дойдуларыгар тиийэн дьарыктаныахтарын наада. Ону биһи оҕолорбут икки сыл олорон кэбистилэр. Онон оҕолорбутугар үбү-харчыны уган, кинилэр сайдыыларыгар күүстээх үлэ барыахтаах”.
Оонньууларга бэлэмнэниинэн уонна хамаанданы сүүмэрдээһининэн дьарыктаммыт Саха Өрөспүүбүлүкэтин спорка солбугу бэлэмниир киин дириэктэрэ, РФ уонна Саха Өрөспүүбүлүкэтин үтүөлээх тренерэ Василий Иванович Егоров этэринэн:
“Маннык улахан таһымнаах күрэхтэһиигэ кыттарга элбэх үбүлээһин көрүллүөхтээҕэ кыаллыбата, икки сыл кэриҥэ пандемия уонна кэнники сылларга оҕо спордун сарбыйыылар мөлтөттүлэр. Икки сыл устата өрөспүүбүлүкэттэн тахсыбаккалар, Бүтүн Россиятааҕы күрэхтэһиилэргэ кыттыбатахтара, дьиэлэригэр олорбуттарын охсуута билиннэ. Кэтэхтэн, “дистанционно” эрчиллибиттэрэ. Тренердэр бэйэлэрин иитиллээччилэрин он-лайн ситиминэн ким-хайдах эрчиллэрин хонтуруоллаабыттара. Спорт салайааччылара тренердэри кытта үлэни эмиэ он-лайн нөҥүө ыыппыппыт. Биллэн турар, итинник дьарыктаныы көдьүүһэ намыһах. Онтон, омук дойдуларын уонна Россия киин регионнарын спортсмен оҕолоро күрэхтэһиилэргэ “выезтара” элбэҕэ сөхтөрөр. Оонньуулар күрэхтэһиилэригэр иһиттэххэ, ордук Узбекистан оҕолоро, отуччалыы норуоттар икки ардыларынааҕы турнирдарга кыттыбыттар! Маастарга кандидаттардаахтар, спорт маастардара кытта бааллар. Биһиги Сахабыт сирин оҕолоро өрөспүүбүлүкэ сүүмэрдиир күрэхтэһиилэригэр, саамай ырааппыта Дальнай Востокка сылдьыбыт “уопуттаахтар”.
Аны, тренердэр эмиэ астыммат санааларын биллэрэллэр.
Спорт эйгэтигэр ханна даҕаны, рейтинг, уопут оруола улахан. Холобур, мэтээлэ суох хаалбыт остуол тенниһин сүрүн тренерэ Аркадий Никифорович Иванов этэринэн, элбэх “выезтардаах”, улахан күрэхтэһиилэргэ көтүппэккэ кыттан кэлбит Москваттан, Уралтан, Сибииртэн Россия чөмпүйүөннэрэ, спорт маастардара кэлэн оонньоотулар. Бурятияттан Россия сүүмэрдэммит хамаандатын чилиэнэ спорт маастара Батор Радмаев оонньоото. Узбекистан, Туркмения, Армения оҕолоро үчүгэй бэлэмнээхтэрэ көһүннэ. Били, улахан таһымнаах күрэхтэһиилэргэ элбэхтик кыттар буоланнар, рейтиннэрэ үрдүк. Раднаев 900 рейтиннээх, регионнартан Орлов, Конюхов 1300 рейтиннээхтэр. Ол да буоллар, 300 рейтиннээх Саха сирин оҕолоро тэҥҥэ оонньоотулар, миэстэлэргэ кыранан тиксибэтилэр.
Самбо тренерэ, Саха Өрөспүүбүлүкэтин үтүөлээх тренерэ Николай Петрович Лоднев билинэринэн, пандемия мэһэйдээн самбо хамаандата ырааҕынан ситэтэ суох бэлэмнээх бу Оонньууларга кэлэн кытынна. “Выезд” да суох, күрэхтэһии да аҕыйах. Көрдөрүүлэр ол сиэринэн буоллулар. Тэрээһин да боппуруостар үгүс баҕа санааны үөскэтэллэр. Оҕолору тренердэриттэн араартаан, икки-аҥы ыраах-ыраах олохтоотулар. Транспорынан хааччыйыы ыарахаттары үөскэттэ. Санаатаҕын аайы баҕалаах сиргэр барбаккын-кэлбэккин. Күрэхтэһиилэр ыытыллар спорт объектара бэйэ-бэйэлэриттэн чиэски тураллара улахан уустуктары үөскэттэ. Ону суруналыыстар эрэ буолбакка, хамаандалар бүтүннүү, көрөөччүлэр эмиэ эттэринэн-хааннарынан биллилэр.
Мэтээлгэ тиксибэтэх Греко-Римскэй тустуу сүрүн тренерэ Матвей Матвеевич Матвеев “кыайтарыыта суох кыайыы кэлбэт” диэн принцибинэн үлэлииллэр эбит эрээри, тренердэр тиийбэттэрнинэн, “классиканан” тустар оҕолор суохтарынан, икки көҥүл тустуунан дьарыктанар уолаттары аҕалан туһуннарбыттара таайда. Өрөспүүбүлүкэ үрдүнэн түөрт эрэ тренердээхтэр. Эбии тренердэр штаттара көрүллэллэрин тоҕоостооҕунан ааҕар. Пандемия хааччахтааһынын бэлиэтээтэ.
Оонньуулар дьоруойдара
Владислав Адасько - Дьокуускай куорат М.И. Кершенгольц аатынан оскуола 9-с кылааһа, харбааһыҥҥа боруонса мэтээллээх: “Харбааһынынан бастакы кылаастан дьарыктанабын. Тренерим Гринь Виктория Евгеньевна уонна Лапшин Олег Витальевич миигин харбыырга үөрэппиттэрэ. Дьарыкпыт үтүө түмүктээх буолла. Дьикти түгэнтэн олус соһуйдум, үөрүүм муҥура суох! туруоруммут сыалбытын ситистибит. Оскуолабын бүтэрдэххпинэ манна университекка үөрэххэ киириэм. Үөрэхпэр үчүгэйбин. Ситиһиибин Сахам сиригэр, тренердэрбэр, төрөппүттэрбэр, доҕотторбор аныыбын! Спорт туһата элбэх, бары спордунан дьарыктаналларыгар, хаһан да санааларын түһэрбэттэригэр, дьоллоох буолалларыгар баҕарабын!”.
Аксенья Панова – Дьокуускай аннынааҕы Табаҕа оскуолатын 9 кылааһын үөрэнээччитэ, 100 м м/с кыһыл көмүс мэтээллээх: “Иккис кылаастан Дьокуускай 1 № оҕо спортоскуолатыгар тренер Петр Александрович Нечаевка дьарыктанабын. Кыһыннары-сайыннары күн аайы дьүөгэбин Настя Татарниковалыын автобуһунан айаннаан кэлэбит. Чэпчэки атлетика миэхэ иккис дьиэм кэриэтэ. Тренерим сүбэтинэн, кылгас сиргэ сүүрүүлэртэн мэһэйдээх сүүрүүгэ көспүтүм. Маҥнай утаа, ыарырҕатар этим. Хардыыларым сөп түбэспэттэр этэ. Өр сыралаһыы кэнниттэн дьэ табыллыбыта. Сөбүлээбитим. Сүүмэрдиир күрэхтэһиигэ маастарга кандидаты толорбутум. Хайдах былааннаабыппытынан күрэхтэстим. Күрэхтэһии сүрдээх тыҥааһыннаахтык ааста. Барыллааһын сүүрүүнү кыайбытым. Финалга фальстаартан сэрэнэммин, стаарпар кыратык олорон хаалбытым. Утарсааччыларбын эккирэппитим. Иккис, үһүс барьердарга сититэлээбитим уонна тохсус, онус барьердарга куотан киирэн барбытым. Биэтэккэ бастакынан кэлбитим. Инникитин маастарга үлэлиэхпит. Толоруом дии саныыбын”.
Эрхан Куличкин – “Узбекистан уолугар хоттордум. Бэйэм тустуубунан тустубатым, кини тустуутунан туһуннум. Ол иһин хоттордум. Бастакы миэстэ буолуохпун баҕарбытым. Кыайан табыллан тустубатым. Узбек уола үчүгэйдик тустар эбит. Тутуспуппутугар, илиитигэр күүһэ биллэр этэ. Мин бэйэм тустуубар илии баайсааччыбын, онтон туора атахха киирэбин. Үһүс миэстэбэр үөрдүм. Билигин күүстээх буолар курдук өссө дьарыктаныахпын наада. Иннибэр дальнай восток, Россия күрэхтэһиилэрэ бааллар. Олимпийскай чөмпүйүөн буолар баҕалаахпын. Күүскэ эрчиллэммин сыалбын ситиһиэхтээхпин”.
Роман Кириллин – Сунтаар 8 кыл. Үөрэнээччитэ, көҥүл тустууга 44 кг боруонса мэтээлллээх: “Бастакы кылаастан тустабын. Тренердэрим Павел Степанович Павлов уонна Станислав Григорьевич Яковлев. Заболоцкай турнирыгар бастааммын бу “Дети Азии” кэлэн туһуннум. Пиниги турнирыгар эмиэ бастаабытым. Бастакы миэстэни ылар санаалаах этим. Павел Пинигин турнирын кыайбытым, Дальнай Востокка иккис буолтум. Республикаҕа хаста да бастаабытым. Бу маҥнайгы улахан күрэхтэһиим. Кыратык туох эрэ тиийбэтэ. Иккитэ атахтатан кэбистим уонна “накакка” эргиттэрэн кэбистим. Уонна хайдах эрэ үчүгэйдик арыллан тустубатым. Үһүс миэстэбинэн син астынабын. Баҕа санаам улахан үрдэллэри дабайаммын, Олимпийскай чөмпүйүөн буоларга. Ити туруоруммут сыалбын-сорукпун толоруом диэн бэйэбэр эрэллээхпин”.
Айаал Гуляев – Уус-Алдан Уһун-Күөлүн оскуолатын 8 кыл. Үөрэнээччитэ, мас тардыһыыга 50 кг кыһыл көмүс мэтээллээх: Бастакы миэстэни ылар санаалаах кэлбитим. Киирсиилэр наһаа үчүгэйдик аастылар, ынырык энергия этэ! Хаһыытаан-ыһыытаан киирэн, тоҕута тардан! Кыайталаатым. Маҥнайгы киирсиибэр Узбекистан уолун кыратык ыарырҕаппытым. “Тягата” күүстээх баҕайы этэ. Отон икки Приморскай кыраай уолаттарын кыайталааммын бастаатым. Утарсааччыларым үчүгэй, мөлтөхтөр диэбэккин. Олох “жестко” дьарыктаммыттара биллэр. Кыранан кыайбатылар. “Туора охсуу”, “күлүүс” уонна “прямой тяга” ньымаларынан ылаттаатым. Киирэн биэрэллэр. Албаскар киллэрэн кыайдаххына олох сүрдээҕин үөрэҕин! Аан бастаан олох хотторон иһэр курдук буолаҕын. Кыайдаххына үчүгэй баҕайы буолар. “Азия оҕолоро” оҕолорго анаммыт улахан күрэхтэһии. Маннык улахан масштаабтаах күрэхтэһиигэ урут кытта иликпин. Мас тардыһыы мин профессиональнай көрүҥүм. Бырахпаккабын улаатыахпар диэри илдьэ сылдьарым буолуо диэммин эрэнэбин. Сыаллаахпын – улаатан баран Манчаарыга кыттабын. Мас тардыһыыта биһи народнай көрүҥмүт, ол иһин”.
Екатерина Алексеева – Дьокуускай куорат 17-с оскуолатыгар 9 кылаас үөрэнээччитэ, бинтиэпкэнэн ытыыга кыһыл көмүс мэтээллээх: “Буулдьанан ытыынан биэс сыл дьарыктанабын. Тренерим Иванна Андриановна Жегусова. Барыллааһын 60 ытыыларга бэҕэһээ бастаабытым. Финалга Армения кыыһын 16:4 кыайдым. Ытыым аайы “дестякаларга” түһэртээтим. Буулдьанан ытыы көрүҥэр киһи холку, ыгылыйбат буолуохтаах уонна киһи хомуллар. Быдан уравновешеннай буолаҕын. Тус олоххор да көмөтө элбэх. Мээнэ кыыһыра сылдьыбаккын. Мин бэйэм хараахтарбар сөп түбэһэр. Кумирдардаахпын. 2020 с. Токио Олимпиадатыгар Масников, Каменскай, Бацаракшина ытааччылардаах Россия хамаандата кыайбыта. Кыайыыбын тренербэр уонна манна кэлэн көрө, миэхэ “ыалдьа” сылдьар дьоннорбор аныыбын!”.
Оҕо спордун суолтатын үрдэтиэххэ!
Тэҥэ суох усулуобуйаҕа, оҕолорбут барахсаттар, тренердэрин көмөлөрүнэн, мэтээллэргэ тиксибиттэрэ – дьоруойдуу быһыыга тэҥнэһэр дии саныыбын.
Оҕо диэн оҕо – губка, пластилин курдук. Өйө-санаата, этэ-сиинэ тренердэрэ, учууталлара хайдах үөрэтэллэрин, иитэллэрин күүскэ иҥэринэр, күрэхтэһиилэргэ буһар-хатар. Онон, спортсмен оҕолорбут туох-ханнык усулуобуйа баарынан, бэйэлэрин кыахтарынан күрэхтэстилэр. Көрдөрүү, ситиһии да ол сиэринэн.
Спортивнай оонньуулара “Фетисов Аренаҕа” үөрүүлээхтик
сабылыннылар!
- бырааһынньыктыы быһыыга-майгыга ааста. Норуоттар икки ардыларынааҕы “Азия оҕолорун” кэмитиэтин Президенэ Владимир Максимов сабыллыбытынан биллэрдэ. Кэрэ-бэлиэ түгэнинэн Владивосток куорат баһылыга Константин Шестаков “Азия оҕолорун” оонньууларын былааҕын Спортивнай Оонньуулар Президенэ Дьокуускай куорат баһылыгар Евгений Григорьевка туттарда! Онон, кэлэр Норуоттар икки ардыларынааҕы “Азия оҕолорун” VII Спортивнай оонньуулара 2024 сыл сайыныгар Дьокуускайга ыытыллыаххтара!
Тэрээһин-бэлэмнэнии үлэлэр саҕаланан бара тураллар. Хамаанданы бэлэмнээһиҥҥэ тахсыталаабыт итэҕэстэри хатылаабакка, эрдэттэн сөптөөхтүк дьаһанан, үбүлээһини үгүөрү көрөр быһаарар оруолланыаҕа. Спортсмен оҕолорго күүстээх болҕомто ууруллуута ситиһиилэргэ кынаттыаҕа.
Баһылай Посельскай
