Ааспыт нэдиэлэҕэ Хапсаҕайга, мас тардыһыытыгар, гиирэ спордугар уонна атах оонньуутугар сылы түмүктүүр хамаанданан Кубоктара

буолуталаатылар. Үөһээ-Бүлүүгэ буолан ааспыт хапсаҕай  Кубогар Үөһээ-Бүлүүлэр бастаатылар, Мэҥэ-Хаҥаластар иккис, Бүлүүлэр үһүс миэстэлэри ылаттаатылар. Намҥа гиирэ спордугар Үөһээ-Бүлүүлэр эмиэ бастаатылар, Хаҥаластар  уонна Намнар, туһааннааҕынан, иккис, үһүс буолуталаатылар. Дьокуускайга “Модун” спорткомплекска түмүктэммит мас тардыһыытын Кубогар Амма мадьынылара бастаатылар. Үөһээ-Бүлүү иккис, Нам үһүс миэстэлэннилэр. Ити иннинэ, сэтинньи бүтэһик күннэригэр “Триумф” спорт уораҕайыгар буолан ааспыт саха многоборьетын Кубогар Кэбээйилэр бастаабыттара, Аммалар иккис, Мэҥэ-Хаҥаластар үһүс миэстэлэммиттэрэ. Кубоктар иһин күрэхтэһиилэр эһиил сайын Тааттаҕа буолар Манчаары оонньууларыгар улуустарга, оройуоннарга күүһү-кыаҕы тургутан көрүү быһыытынан суолталаннылар.

kub 7

Спорт сахалыы көрүҥнэригэр болҕомто күүһүрэр 

Бу ааспыт өрөбүлгэ, ахсынньы 15 күнүгэр, “Юность” стадион манеһыгар, Саха Өрөспүүбүлүкэтин атах оонньуутугар Федерациятын Кубога үрдүк тэрээһиннээхтик ыытылынна. 10 улуустар хамаандаларыттан 89 атах оонньооччулар түмсэн сэттэли ойууларга илин-кэлин түһүстүлэр.

Саха сиригэр физкультура уонна спорт уһулуччулаах тэрийээччитэ, салайааччыта Н.Н. Тарскай 100 сылыгар, Саха Өрөспүүбүлүкэтин физическэй культураҕа уонна спорка Министиэристибэтэ Россия үрдүнэн бастыҥ үлэлээх спортивнай регионунан биллэриллибит, 1996 сыллаахха Сахабыт сирин 1-кы Президенэ М.Е. Николаев төрүттээбит “Азия оҕолорун” Норуоттар икки ардыларынааҕы VIII спортивнай оонньуулара бу сайын Дьокуускайга үрдүк тэрээһиннээхтик ыытыллыбыт кэмигэр  быйылгы күрэхтэһиилэр ыытыллыбыттара кэрэхсэбиллээх. Ити туһунан күрэхтэһии үөрүүлээх быһыыга-майгыга аһыллыытын түгэнигэр “Сахаада-спорт” Ассоциация президенэ Александр Ким-Кимэн, спорт миниистирин 1-кы солбуйааччы Гаврил Мохначевскай, атах оонньуутун Федерациятын президенэ Николай Андреев, мас тардыһыытын аан дойдутааҕы генеральнай сэкэрэтээрэ, бэйэтин кэмин күүстээх кылыыһыта Иннокентий Григорьев бэйэлэрин эҕэрдэлэригэр чорботон бэлиэтээтилэр.

Атах оонньуутун көрдөрүүлэрэ үрдээн, саҥа көлүөнэ атах оонньооччулар саҥаттан-саҥа рекортары олохтооннор сайдыы күүскэ бара турарын, 2017 с. Үөһээ-Бүлүүгэ  уонна 2021 с. Бэрдьигэстээххэ буолан ааспыт Манчаары оонньууларын абсолютнай чөмпүйүөннэригэр сүрүн бириистэринэн массыыналар туттарыллыбыттара таһым улааппытын кэрэһэлииллэр.  Ону сэргэ, мас тардыһыытыгар аан дойду чемпионаттара ыытыллыылара үгэскэ кубулуйда. Хапсаҕай киэҥ сэҥээриини ылар. Саха атаҕын оонньуутугар Бүтүн Россиятааҕы уонна норуоттар икки ардыларынааҕы турнирдар ыытыллаллар. Ветераннар ортолоругар “Сахаада-спорт” маастардарын кэккэлэрэ хаҥаан иһэр, аҕам саастаах ойооччулар чиргэл, чэгиэн-чэбдик туруктаахтарын, спорка уһун үйэлэниини көрөдөрөллөр. Ону чиҥэтэн, Чурапчыттан Дмитрий Макаров, Хаҥаластан Николай Припузов маастар дастабырыанньатынан уонна түөскэ анньыллар бэлиэнэн наҕараадаланнылар.

kub 9   

XX үйэ уһулуччулаах кылыыһыта, Саха АССР, РСФСР спордун маастара, Манчаары оонньууларын чөмпүйүөнэ, оҕунан ытыыга ССРС спордун маастара,

kub 8

атах оонньуутугар “Азия оҕолорун” спортивнай оонньууларын, Саха Өрөспүүбүлүкэ чөмпүйүөнүн, рекордсменын, үстэ төхтүрүйэн ойууга Россия спордун бастакы маастарын,  рекордсменын Юрий Гаврильевы, оҕунан ытыыга уонтан тахса Россия маастардарын ииппит тренер, наставник Владимир Иванович Алексеев үбүлүөйдээх 70 сааһынан эҕэрдэлэри тутта, “Сахаада-спорт” Бочуотун Кинигэтигэр киллэрилиннэ.

kub 11

Атах оонньуутугар Намнар бастыҥнар!

Уолаттарга, кыргыттарга ыччаттарга иккилии бөлөҕүнэн, дьахталларга, эр дьоҥҥо, ветераннарга хастыы да бөлөҕүнэн куоталастылар. Түмүккэ, Намнар бастакы (тр. Николай Кейметинов), Горнайдар иккис (тр. Эдуард Санников), Хаҥаластар (тр. Иван Гермогенов) үһүс миэстэлэнэннэр Кубоктарынан, 60 тыһ.солк. сэртэпикээтинэн, дипломнарынан, өйдөбүнньүк мэтээллэринэн наҕараадаланнылар. Мэҥэ-Хаҥаластар төрдүс, Таатталар бэһис, Бүлүүлэр алтыс миэстэлэнэннэр харчынан биһирэннилэр. Чурапчылар сэттис, Уус-Алданнар ахсыс, Өлүөхүмэлэр тохсус, Үөһээ-Бүлүүлэр онус буолуталаатылар.

Кыайыылаах Нам хамаандатын Нь.С. Тимофеев аатынан Олимпийскай солбук оҕо спортоскуолатын тренерэ Николай Кейметинов салайан аҕалла: “Иллэрээ сыл бастаабыппыт, былырыын иккис буолбуппут, быйыл эмиэ бастаатыбыт. Толору хамаанданан күрэхтэстибит. Атах оонньуутун уонна чэпчэки атлетиканы тэҥҥэ дьарыктыыбыт. Улууспут иһинэн сүмэрдиир күрэхтэһиини оҥороммут, бастаабыттар кэлэн кытталлар. Бэйэбит испитигэр конкуренциябыт үрдүк буолан результаттар бааллар. Миигин кытта спорт маастара Владислав Попов, Владлен Сергеев буоламмыт тренердиибит. Ыччаттарга Владлен Сергеев бастаата, уолаттарга,  дьахталларга биэс атах оонньооччуларбыт миэстэлэстилэр. Ветераннарбыт төрдүс буолуталааннар очко бөҕөтүн аҕаллылар. Улууспут спорка Управлениетыгар, Федерациябытыгар махталбытын тиэрдэбит”.       

  kub 3                                             

13-14 саастаах уолаттарга Роман Потапов (Чурапчы), кыргыттарга Инесса Кузьмина (Горнай); 15-16 саастаах уолаттарга Марк Никитин (Өлүөхүмэ), кыргыттарга Елена Попова (Нам); ыччаттарга Владлен Сергеев (Нам), Валентина Иванова (Үөһээ-Бүлүү);35-49 саастаах ветераннарга Виталий Васильев (Таатта), 50-н үөһэ саастаах ветераннарга Егор Захаров (Горнай); дьахталларга Валерия Олесова (Хаҥалас) кыайыылары ситистилэр. Кубок абсолютнай кыайыылааҕынан кылыыга 30 м 62 см, ыстаҥаҕа 30 м 08 см, куобахха 26 м 00 см түһүтэлээн, 86 м 70 см көрдөрүүлээх Горнай хамаандатыттан Кай Адамов таҕыста. Куобахха 27 м 34 см түһэн Тааттаттан Андрей Васильев кыайда.

kub 2

XX үйэ уһулуччулаах кылыыһыта, дэгиттэр күүстээҕэ-быһыйа, биллиилээх сэбиэскэй-партийнай, хаһаайыстыбаннай салайааччы, Ил Түмэҥҥэ депутаттаабыт Дьааҥыттан хоту дойду хоһууна Иван Иванович Горохов биир дойдулааҕар, Чурапчы спортоскуолатыгар тренер Иван Чиркоевка эрчиллэр кыра саастаах кылыыһыт Рома Потаповка материальнай көмө быһыытынан тус-бэйэтин наҕараадатын туттарда.

kub 6kub 4                                                   

Отчуоттуур-быыбардыыр конференция

Түөрт сыл Федерацияны салайан кэлбит Николай Иванович Андреев отчуота истилиннэ. Федерация толорооччу дириэктэрэ Максим Оегостуровтыын өйдөһөн үлэлээһин түмүгэр элбэх үлэ барбыт, 83 дьаһаллар ыытыллыбыттар, турнирдар, чемпионаттар, Кубоктар, омук дойдуларыгар тахса сылдьыылар, олор истэригэр сыллата Азербайджаҥҥа, Киргизияҕа, Казахстаҥҥа норуоттар икки ардыларынааҕы күрэхтэһиилэргэ атах оонньууччуларбыт үчүгэйдик кыттыбыттар. Спортсменнарга көмө быһыытынан материальнай өйөбүллэр оҥоһуллубуттар, Манчаары оонньууларыгар массыыналар туттарыллыбыттар. “Азия оҕолорун” оонньууларыгар оҕолорбут үс кыһыл көмүс, алта үрүҥ көмүс, биэс боруонса мэтээллэри ылаттаабыттар. Федерация үлэтэ “туйгунунан” сыаналанна.

Атах оонньуутун Федерациятын президенинэн Саха Өрөспүүбүлүкэтин Баһылыгын уонна Бырабыыталыстыбатын Дьаһалтатын салайааччытын солбуйааччы, аатрыбыт кылыыһыт Юрий Кириллович Гаврильев биир санаанан талылынна. Николай Иванович Андреев Федерация попечительскэй Сэбиэтигэр киллэрилиннэ.

kub 14                    

Көлүөнэлэр көрсүһүүлэрэ

“Манчаары оонньууларын” көрсө, “Сахаада-спорт” Ассоциация көҕүлээһининэн, “Боотурдар көлүөнэрэ” саҥа үлэлээн эрэр бырайыак бигэргэнэн,  хапсаҕайдьыттар, мас тардыһааччылар, многоборецтар уо.д.а федерациялар ортолоругар араас кэмнэрдээҕи көлүөнэлэр көрсүһүүлэрин дьаһаллара ыытыллыахтара.

kub 15

Дьоһун дьаһалы атах оонньооччулар саҕалаатылар. Ааспыт үйэ 70-80-90 сылларыттан саҕалаан күн бүгүнүгэр диэри  Саха сиригэр атах оонньуутун сайдыытыгар кылааттарын киллэрбит кылыыһыттар көрсөн, төгүрүк остуол тула олорон кэпсэттилэр. Ыйытыыларга хоруйдааһыннар буоллулар. XX үйэ чулуу кылыыһыттара Николай Санников, Иван Горохов, Владимир Алексеев, Иннокентий Григорьев, Юрий Гаврильев, Виталий Васильев, Захар Ефремов, Айаал Иванов, Егор Филиппов, Валентин Иванов, Кай Адамов, Ньургун Сокольников, Валерия Олесова, Евгения Адамова санааларынан атастастылар, этиилэри киллэрдилэр.

kub 16

Саха спордун көрүҥнэригэр болҕомто күүһүрэр. Кэскиллээхтик сайыннарыыга бэртээхэй дьаһаллар ыытыллаллара кэрэхсэбиллээх.

Баһылай Посельскай

Поделиться:

#Новости