Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Сергей Местников салайааччылаах өрөспүүбүлүкэ тэрийэр хамыыһыйата көдьүүстээхтик үлэлээтэ. Ааһан эрэр 2024 сыл устата үтүө ааты үйэтитэр үгүс өрүттээх дьаһаллар буолуталаатылар.
Министиэристибэлэр, бөдөҥ тэрилтэлэр, чуолаан, Уус-Алдан улууһун дьаһалтата, дьоно-сэргэтэ түмсүүлээхтик, биир сомоҕо буолан үбүлүөйдээх дьаһаллары көхтөөхтүк ыыттылар. Түмүктүүр дьаһал ахсынньы 19 күнүгэр Дьокуускайга Саха театрыгар үөрүүлээх быһыыга-майгыга буолан ааста.
Республика киэҥ общественноһа, спорт ветераннара, Н.Н. Тарскай биир дойдулаахтара көрөөччүлэр саалаларыгар толору муһуннулар. Аан-киирии тылынан Сергей Местников эҕэрдэлээтэ. Николай Николаевич Тарскай Саха сирин спордун сайдыытыгар киэҥ өрүттээх тэрийэр-салайар үлэни ыыппыта бэлиэтэннэ. Ол курдук, олох эдэр сааһыгар, 1955 с. үөрэҕин саҥа түмүктээт даҕаны өрөспүүбүлүкэ бырабыыталыстыбатын иһигэр киирэн спорду салайбыта. Норуот хаһаайыстыбатын бары салааларыгар өрө көтөҕүллүүлээх бара турар, далааһыннаах сайдыы кэмигэр, спорт эйгэтигэр дьон-сэргэ эмиэ саҥа хамсааһыннары кэтэһэрэ. Тахсыталыыр улахан уларыйыыларга Николай Тарскай сөрү-сөпкө түбэһэн, саҥа тыкпыт сулустуу, саҥа булуллубут алмаас таас кэриэтэ, үлэтин эрчимнээхтик саҕалаан, баара-суоҕа түөрт сыл иһигэр, спорт таһымын үрдүк таһымҥа таһаарбыта. Киэҥ спортивнай хамсааһын төрүттэммитэ. Сахабыт сирин спортсменнара Россия, Сойуус, аан дойду таһымыгар тахсар кыахтаммыттара, Саха сирин дьоһун аатын киһи-аймах бүттүүнэ билбитэ. Тарскай сырдык аатын үйэтитиигэ үбүлүөйдээх сыла ананна. Үүнэр көлүөнэҕэ туһаайыллыбыт тэрээһиннэр үөрэх, спорт эйгэлэригэр элбэх күрэхтэһиилэр ананан ыытылыннылар. Н.Н. Тарскай үлэтин, олоҕун кэпсиир кинигэ саҥардыллан күн сирин көрдө. “Саха” НКИХ ханаалыгар Н.Н. Тарскай олоҕун кэпсиир документальнай киинэ таҥыллан бар-дьон дьүүлүгэр таҕыста. Дойдутугар Уус-Алдаҥҥа Спорт дыбарыаһын иннигэр, үөрэммит Баатаҕайын оскуолатын тэлгэһэтигэр Н.Н. Тарскай өйдөбүнньүктэрэ турдулар. Н.Н. Тарскай аатынан “Туймаада” стадиона саҥардылынна, стадион иһигэр билиһиннэрэ-кэпсии турар муннук арыллыбыта кэрэхсэбиллээх. “АЛРОСА” хампаанньа Саха сиригэр хостообут бөдөҥ алмааһыгар Н.Н. Тарскай аата иҥэрилиннэ.
Ити дьаһаллар өрөспүүбүлүкэ спортивнай общественноһын, спорт ветераннарын көмөлөрүнэн, ыйыыларынан-кэрдиилэринэн көҕүлэннилэр, саҥа сүүрээннэр, саҥа хайысхалар арылыннылар. Уус-Алдан улууһун дьаһалтата, дьоно-сэргэтэ, төрөөбүт-үөскээбит Баатаҕайын нэһилиэгэ ытыктыыр киһилэригэр ис-сүрэхтэриттэн ылсаннар, тэрээһиннэр сүрдээх киэҥ хабааннаахтык бардылар.
Спорт эйгэтигэр ыытылла турар дьаһаллар, күрэхтэһиилэр, “Азия оҕолоро” оонньуулар, көҥүл тустуу аан дойдуга тахсыыта, спорт национальнай көрүҥнэрин сайдыылара, спартакиадалар, күннээҕи кыайыылар-хотуулар, Н.Н. Тарскай үлэтигэр-хамнаһыгар тирэҕирэллэр. Спортсменнарбыт ситиһиилэрэ, дьарыктаах-бэлэмнээх буолуулара урукку кэмнэртэн улахан тутулуктаах уонна инники өттүгэр саҥа сулустар, саҥа ааттар тахса туралларыгар бигэ эрэли үөскэтэллэр.
Саха сиригэр физкультура уонна спорт сайдыытыгар киллэрбит улахан кылаатын, Н.Н. Тарскай аатын үйэтитиигэ көхтөөх үлэтин иһин “Саха Өрөспүүбүлүкэтин физическэй культураҕа уонна спорка үтүөлээх үлэһитэ” дьоһуннаах аат физическэй культура уонна маассабай спорт Управлениетын отделын салайааччытыгар Афанасьева Зинаида Егоровнаҕа иҥэрилиннэ.
Ил Түмэн физическэй культураҕа уонна спорка Сис кэмитиэтин бэрэссэдээтэлэ Георгий Балакшин С.С. Сивцев аатынан Баатаҕайдааҕы норуот айар кыһатын үлэһитигэр Людмила Готовцеваҕа; Саха Өрөспүүбүлүкэтин физическэй культураҕа уонна спорка миниистирэ Леонид Спиридонов Е.Ф. Габышев аатынан Бороҕоннооҕу оҕо спортоскуолатын тренеригэр Виктор Портнягиҥҥа, оҕо спортоскуолатын дириэктэригэр Михаил Слепцовка, Н.Н. Тарскай аатынан Спорт дыбарыаһын дириэктэригэр Константин Давыдовка, Бороҕон киин библиотекатын салайааччытыгар Мария Поповаҕа; Мүрү 2 № орто оскуолатын физкультураҕа учууталыгар Ирина Басыгысоваҕа;
Уус-Алдан улууһун баһылыга Василий Аммосов Н.Н. Тарскай аатынан Баатаҕай оскуолатын дириэктэригэр Арияна Бурнашеваҕа, өрөспүүбүлүкэ спорка музейын дириэктэригэр Михаил Друзьяновка, “Алдан” хайаны хостуур-байытар тэрилтэ дириэктэригэр Иван Готовцевка,
Баатаҕай нэһилиэгин баһылыга Михаил Белолюбскай Уус-Алдан улууһун депутатыгар Алексей Троевка, “Бастыҥ дьонноохх Баатаҕай” гимнин уонна “Төлкөлөөх түөрэҕим” испэктээкил ааптарыгар Иннокентий Сыроватскайга, Национальнай библиотека библиограф үлэһитигэр Туйаара Готовцеваҕа Н.Н. Тарскай аатын үйэтитиигэ көхтөөх үлэлэрин иһин наҕараадалары туттардылар.
Физическэй культура уонна спорт уһулуччулаах салайааччыта уонна тэрийээччитэ Н.Н. Тарскайга анаммыт үөрүүлээх дьоро киэһэ Сергей Потапов туруорбут “Андаҕар” испэктээкилтэн быһа тардан көрдөрүүнэн, опера ырыаһыттарын уонна уус-уран самодеятельность кыттыылаахтарын кэрэхсэбиллээх кэнсиэринэн доҕуһуолланна, дириҥ ис хоһоонноох быыстапка сэҥээриини ылла.
Дьоһун дьаһал үтүө өйдөбүлү хаалларда.
Баһылай Посельскай
