Миниистир Леонид Спиридонов коллегия үлэтин салайан ыытарыгар, бастатан туран, икки күнүнэн кэлиэхтээх Өрөспүүбүлүкэ Күнүнэн, сааскы ыам ыйын бырааһынньыктара – Пиэрибэй Маай, Улуу Кыайыы 80 сыла чугаһаабыттарынан эҕэрдэлээтэ, улахан дьаһаллар күүтүллэллэрин санатта, коллегия үлэтин бэбиэскэтин билиһиннэрдэ.
1.Миниистири 1-кы солбуйааччы Гаврил Михайлович Мохначевскай “Саха сиригэр физическэй культура уонна спорт 2030 сылга диэри сайдыытын Стратегиятын”; Манчаары аатынан спорт национальнай көрүҥнэригэр Киин дириэктэрэ Геннадий Васильев Таатта улууһун Ытык-Күөлүгэр буолар “Манчаары XXII оонньууларыгар” бэлэмнэниини; тренер И.Н. Сивцев сырдык аатын үйэтитии тустарынан иһитиннэриилэри оҥордулар.
Физическэй культура уонна спорт Стратегията Россия Президенин соруктарыгар уонна Бырабыыталыстыба дьаһалларыгар олоҕуран оҥоһуллубут. Саха сиригэр физическэй культура уонна спорт бүгүҥҥү туруга сиһилии ырытыллан көһүннэ. Маассабас 2024 сыл түмүгүнэн 55 % тиэрдиллэн, 2030 сылга 70 % тиийиэхтээх. 85 физкультурнай-спортивнай тэрилтэлэрэ үлэлииллэр, олорго спорт 43 көрүҥнэринэн 333 тыһыынча киһи физкультуранан уонна спордунан дьарыктаналлар; Күрэхтэһиилэри ыытыы 560-ҥҥа тиэрдилиннэ. Ыытыллар дьаһаллар сокуоҥҥа, нормативнай-правовой төрүккэ олоҕураллар, оҕо спорда, спорт национальнай көрүҥнэрэ, доруобуйаларынан хааччахтаах спортсменнар спортара тэтимнээхтик сайдаллар, үрдүкү маастарыстыба көрдөрүүлэригэр, үбүлээһиҥҥэ, спорт тутууларын көдьүүстээхтик туһаныыга, материальнай базаны бөҕөргөтүүгэ болҕомто ууруллар. Туһааннаах программалар үлэлииллэр.
2.“Манчаары оонньууларыгар” бэлэмнэниигэ: өрөспүүбүлүкэ Тэрийэр кэмитиэтигэр 19 хамыыһыйалар үлэлииллэр, сүрүн судьуйанан өрөспүүбүлүкэ футболга оскуолатын дириэктэрэ Николай Гаврильевич Цыпандин, Оонньуулар үөрүүлээхтик аһыллыыларын уонна сабыллыыларын сүрүн режиссерунан Саха театрын артыыһа уонна режиссера Роман Романович Дорофеев анананнар үлэлэрин үгэнэ. Манчаары XXII Спартакиадатын 1-кы түһүмэҕэ улуустарга, оройуоннарга ыытыллыбыттар, 2-ис түһүмэҕэ өрөспүүбүлүкэ сүүмэрдиир күрэхтэһиилэригэр түмүктэммиттэр.
Бүтэһик 3-һүс түһүмэҕинэн от ыйын 7-12 күннэригэр Ытык-Күөлгэ финалга күрэхтэһиилэр буолуохтара. “Ньургун Боотур” стадиоҥҥа хапсаҕай, мас тардыһыыта, чэпчэки атлетика, саха атаҕын оонньуута, саха многоборьета; А.Е. Турнин аатынан спорт Дыбарыаһыгар гиирэ спорда, хабылык-хаамыска; А.Е. Мординов аатынан Таатта лицейин спорт балаһааккатыгар саха оҕунан ытыы; Чөркөөх спорка саалатыгар “Курупааскыны” уонна “Тииҥи” буулдьанан ытыылар; Ытык-Күөл “Саһыл уйалаах” ипподромугар ат сүүрдүүтэ уонна хотугу многоборьеҕа күрэхтэһиилэр буолуохтара.
Оонньуулар программаларын чэрчитинэн, бэс ыйын 25-26 күннэригэр Дьокуускай куоракка спорт национальнай көрүҥнэригэр научнай практическай конференция үлэлиэҕэ.
Биэс спорт объектара тутуллаллар: Ытык-Күөлгэ 100 миэстэлээх интэринээттээх, 450 миэстэлээх оскуола номнуо үлэҕэ киллэриллибит. Элбэх өрүттээх чэбдигирдэр-спортивнай комплекс, 1000 олорор миэстэлээх тырыбыналаах, эрэһиинэ бүрүөһүннээх сүүрэр суоллаах стадион, 1000 олорор миэстэлээх тырыбыналаах “Саһыл уйалаах” ипподрома; Боробул бөһүөлэгэр физкультурнай-спортивнай комплекс; Чөркөөх бөһүөлэгэр модульнай спортивнай саала тутулла тураллар. Күрэхтэһиилэр ыытыллар бөһүөлэктэрин тупсарыылар, федеральнай айан суолун оҥоруу күргүөмнээхтик бараллар.
3.Россияҕа уонна Саха сиригэр физическэй культура уонна спорт сайдыыларыгар киллэрбит уһулуччулаах кылаатын иһин, көҥүл тустууга ССРС спордун маастара, Российскай Федерация физическэй культуратын үтүөлээх үлэһитэ, Россия уонна Саха Өрөспүүбүлүкэтин үтүөлээх тренерэ, физическэй культура уонна спорт эйгэтигэр Д.П. Коркин аатынан Саха Өрөспүүбүлүкэтин Государственнай бириэмийэтин лауреата Иван Николаевич Сивцев сырдык аатын үйэтитии туһунан боппуруос көрүлүннэ. Бороҕон олимпийскай солбук оҕо спортоскуолатыгар И.Н. Сивцев аатын иҥэрии; өйдөбүнньүк памятнигы туруоруу; “Саха сирин биллиилээх дьоно” сериянан кинигэни таһаарыы; документальнай киинэни оҥоруу; Бүтүн Россиятааҕы көҥүл тустуу турнира тэрийии; төрөөбүт-үөскээбит Уус-Алданын улууһун уулуссатыгар аата иҥэриллиитин тустарынан көрдөһүү сурукөр Саха Өрөспүүбүлүкэтин үйэтитиигэ хамыыһыйатын көрүүтүгэр ыытар туһунан боппуруос көрүлүннэ.
Тустаах боппуруостар сүнньүлэринэн быһаарыылар ылылыннылар.
Sportyakutia.ru
