Ол курдук, Үөһээ Бүлүү аатырбыт хапсаҕайдьыттара Егор Иванов уонна Платон Саввинов бириистээх миэстэҕэ тиксибэтилэр. Күүтүллүбүтүн курдук, оҕолорго кэбээйилэр үчүгэй хапсыһыылары көрдөрдүлэр. Бүлүү уола, “Азия оҕолоро” оонньуу хапсаҕайга соҕотох кыайыылааҕа Сергей Каратаев бэйэтигэр эрэллээҕин көрдөрөн, утарсааччыларын барыларын кыайталаата .
Улахан дьонҥо 55 киилэҕэ эмиэ Кэбээйиттэн кэлбит оскуола оҕото Дьяконов Мирон үһүс буолбута үөрдэр . 62 киилэҕэ Роберт Окороков үчүгэй тустууну көрдөрбүтэ күрэхтэһии дьиҥ-чахчы киэргэлэ диэтэхпинэ сыыспатым буолуо. Уус Алдантан Афанасий Протопопов сорунан туран дьарыктаммыта өтө көстөр.
70 киилэҕэ маннык састаап өссө өтөрүнэн буолбата буолуо: Рустам Прокопьев , Ренат Потапов , Егор Иванов уонна Исмаил Басов курдук тустууктар мустубуттара киһини үөрдэр . Рустам арыый сылайбыта киһи хараҕар көстөр буолбут, финалга баһыйа тута сылдьан хоттордо, кини маннык охтубутун өссө көрө илик этим. Исмаил хапсыһыылара сытыы, наар бэйэтэ тустуу көрдүүр, бырахсыыта да үчүгэй, ол иһин да кини “Кыраһыабай быраҕыытын иһин” диэн анал бириис хаһаайына буолла.
80 киилэҕэ Сергей Семенов эрэллээхтик кыайталаата. Петр Егоровка дойдута-истиэнэтэ көмөлөстө диэбит курдук, кыл-мүччү кыайталаан, финалга таҕыста. Дмитрий Петуховка бэрт кыра тиийбэтэ, эмиэ финаллыан сөп этэ. 90 киилэҕэ, эрдэ суруйбутум курдук, Платон Саввинов ытыһын сотунна, өтөр буолбатаҕыныы, биир күрэхтэһииттэн мэтээлэ суох төнүннэ. Кузьма Сивцев сыаллаахтык дьарыктана сылдьарын биллэрдэ, финалга Стас Степановы атахтаан истэҕинэ, утары көрсөн тиэрэ көтөн кэбистэ.
Ыарахан ыйааһыҥҥа Евгений Алексеев эмиэ эрэллээхтик бастаата , финалга кини Степан Гаврильевы дойдутугар кыайда. Сунтаар бөҕөһө Гаврил Михайлов үһүс буолуохтааҕын буолла диэххэ сөп.
Күндү ааҕааччылар, маны ааҕан күрэхтэһии тыҥааһынын эккитигэр-хаанҥытыгар иҥэринэн кэбиһиҥ уонна күрэхтэһиилэргэ сылдьан, бөҕөстөрбүтүгэр ыалдьан, кинилэри өйөөн, саха тустуута сайдарыгар күүс-көмө буола сылдьаргытыгар Саха сирин хапсаҕайдаһан тустууга федерациятын аатыттан улахан махталбын тиэрдэбин.
Андрей ЯКОВЛЕВ,
СР спордун бочуоттаах маастара,
күрэхтэһии сүрүн судьуйата.
