Саха Өрөспүүбүлүкэтин атах оонньуутугар Федерацията, Манчаары аатынан спорт национальнай көрүҥнэргэ Киин, Таатта улууһун дьаһалтатын, спорка кэмитиэтин уонна аймахтар көҕүлээһиннэринэн, турнир хаһан да буоларыныы, үрдүк тэрээһиннээхтик ыытылынна. Атах оонньуута өрө тутуллар улуустарыттан, Хотугу-Илиҥҥи федеральнай университеттан, спорка үрдүкү маастарыстыба оскуолатыттан, Дьокуускайдааҕы педколледжтан уонна «Модун» спорткомплекстан 64 уолаттар, дьахталлар уонна эр дьон, ол иһигэр 22 спорт маастардара, түмүстүлэр.
Турнир үөрүүлээх быһыыга-майгыга аһыллыытыгар Таатта улууһун баһылыгын солбуйааччы Изабелла Александровна Сивцева, СӨ Государственной Мунньаҕын (Ил Түмэн) бэрэссэдээтэлин солбуйааччы, СӨ атах оонньуутугар Федерация президенэ Анатолий Анатольевич Добрянцев, Манчаары аатынан спорт национальнай к6өрүҥнэригэр Киин дириэктэрэ, Ил Түмэн депутата Иннокентий Юрьевич Григорьев, Таатта улууһун спорка кэмитиэтин бэрэссэдээтэлэ Гаврил Гаврильевич Вырдылин, Гаврил Гаврильевич Григорьев уола, урбаанньыт Гаврил Гаврильевич Григорьев турнир кыттыылаахтарын эҕэрдэлээтилэр. Саха эстрадатын сулустара Елена Старостина – Хотун Арылы «Атах оонньуута», Алексей Потапов «Кыайыы уота» эрчимнээх ырыалара түһүлгэни киэргэттэ.
Күрэхтэһии былааҕын өрөспүүбүлүкэ бастыҥ атах оонньооччулара Андрей Васильев, Иван Пестряков, Саина Салышева, Эдуард Спиридонов көтөхтүлэр. Дмитрий Дмитриевкэ, Николай Руфовка, Сергей Захаровка Саха Өрөспүүбүлүкэтин маастарын бэлиэлэрэ уонна дастабырыанньалара туттарылыннылар.
Кылаабынай судьуйанан ааспыт үйэ күүстээх быһыйа Евгений Иванов үлэлээтэ.
Кылыыһыттар сэттэлии ойууга ойууларга туостан туоска кыырайдылар.
Дьахталларга Дьокуускайтан Любовь Унарова (Ялина), Уус-Алдантан Сайыына Салышева, университеттан Юлия Кобякова кыайыылары ситистилэр. Уолаттарга Илья Яковлев (Бүлүү), Сергей Собакин (Чурапчы), Дмитрий Дмитриев (Мэҥэ-Хаҥалас) кыайыылары ситистилэр.
Ордук хатыһыылаах олуктаах ойуулары улахан дьон көрдөртөөтүлэр. Икки улахан маастардар – Уус-Алдантан Иван Пестряков уонна Чурапчыттан Кай Адамов эрбии тииһинии эристилэр. Кылыыга барыллааһын ыстаныыларга Кай Адамов 30 м 44 см көрдөрүүлээх инники испитин, финалга Иван Пестерев бүтэһик ойууларыгар 30 м 56 см түһэн куоһарда. Яков Дмитриев 29 м 31 см – үһүс буолла. Ыстаҥаҕа 29 м 62 см түһэн Пестряков эмиэ бастаата. Адамов – 29 м 25 см, Дмитриев – 29 м 02 см.
Куобахха республика рекордсмена Таатта уолана Андрей Васильев бу да сырыыга ыраах ойууларынан бастыыра буола диэн сылыктааһын баара да, оннук буолбата. Куобах кыайыылааҕынан Чурапчыттан спорт маастара, билигин «Модуҥҥа» тренер-инструкторынан үлэлиир Мичил Яковлев (тр.И.И. Чиркоев) таҕыста – 25 м 82 см. Андрей Васильев иккис миэстэлэннэ - 24 м 88 см, икки сыллааҕыта олохтообут рекордугар икки миэтэрэ кэриҥинэн тиийбэтэ. Ситэ-хото эрчиллибэтэҕэ таайда. Иван Пестряков үһүс үчүгэй көрдөрүүлэннэ – 24 м 56 см.
Иван Пестряков 24 м 56 см куобахтаан, үс көрүҥ түмүгүнэн (84 м 74 см) кыайыылааҕынан таҕыста, бастакы тренерэ Андрей Васильевич Федоров, билигин Борис Николаевич Ильиҥҥэ эрчиллэр. Кай Адамов иккис (84 м 17 см), тренерэ В.В. Зюськов, Яков Дмитриев (82 м 85 см) тренерэ В.В. Зюськов, үһүс буоллулар. Билигин спорка үрдүкү маастарыстыба оскуолатыгар дьарыктаналлар. Көстөрүн курдук, маастардар санитиметрынан быһаарыстылар. Тэҥ таһымҥа сылдьаллар. Конкуренция баара үчүгэй. Хардарыта куоталаһыыга эбиллиэхтэрэ турдаҕа.
Кыайыылары ситиспиттэргэ уонна миэстэлэспиттэргэ атах оонньуутугар Тааттаттан бастакы спорт маастара Гаврил Гаврильевич Григорьев мөссүөннээх өйдөбүнньүк мэтээллэр, дипломнар, сыаналаах бириистэр, харчынан бириэмийэлэр туттарылыннылар. Абсолютнай чөмпүйүөн Уус-Алдан кылыыһыта Иван Пестряков убаһанан наҕараадаланна!
Үс көрүҥ түмүгүнэн миэстэлэспиттэргэ сыаналаах бириистэри Гаврил Гаврильевич Григорьев аймахтара, уола Гаврил Гаврильевич Григорьев, быраата «Аллан» маҕаһыын хаһаайына Никита Гаврильевич Винокуров; көрүҥнэринэн кыайыылаахтарга бириистэри Манчаары аатынан спорт национальнай көрүҥнэргэ Киин, Таатта улууһун спорка кэмитиэтэ, имбэлииттэр обществолара, Таатта нэһилиэгин дьаһалтата, «Сарыал» культура киинэ, «Баай ас» СХПК спонсордаатылар. Турниртан турнига атах оонньооччулар көрдөрүүлэрэ үрдээн иһэрэ үөрдэр.
Кыһыҥҥы сезоҥҥа киирии маҥнайгы күрэхтэһиилэрин көрдөрүүлэрэ үчүгэйдэр.
Баһылай Посельскай, Sportyakutia.ru
