Өлүөнэ суорба таас дайынан,
Өнүөннээх мындаатын үрдүгэр
Ыалдьыттыы кэлиҥ диэн угуйа,
Ыраахтан ыҥыра дэндэйэр
Таптыыр сирим Улахан Аан!
Кулун тутар 7-8 күннэригэр спорт маассабай көрүҥэр - волейболга ыраах-чугас улуус спортсменнара Бөртө сиригэр-уотугар быһаарсыылаах киирсиилэргэ күөн көрүстүлэр. Ол курдук Верхоянскай хамаандата, «Сахамедстрах», Уус Алдан, Мэҥэ Хаҥалас, «Саханефтегазсбыт», Таатта, Амма, Орто Халыма, Южнай хамаандата, Хачыкаат, Эркээни, Булгунньахтаах, Мохсоҕоллоох, Үөдэй уонна Улахан Аан хамаандалара кэлбиттэр.
Александр кыра эрдэҕиттэн кэпсэтинньэҥ, дьээбэлээх, олус элэккэй, эйэҕэс, аһыныгас майгылаах. Дьиэ ис-тас үлэтэ, сайыҥҥы от үлэтэ кинитэ суох ааспата. 2002 сыллаахха 2 Малдьаҕар орто оскуолатын бүтэрэн, Чурапчытааҕы физкультура институтугар үөрэнэ сылдьан, Дьокуускайдааҕы иккис нүөмэрдээх педучилищеҕа көспүтэ. 2006 сыллаахха үөрэҕин ситиһиилээхтик бүтэрэн, ол сыл олоҕун аргыһын Вераны көрсөн ыал буолан, икки бухатыыр уолламмыттара.
Саша Хаҥаластааҕы баһаарынай сулууспаҕа үлэлии киирбитэ. Үлэтигэр олус эппиэтинэстээх, толоругас буолан улууска, республикаҕа ыытыллар күрэхтэһиилэргэ элбэхтик үлэлиир тэрилтэтин чиэһин көмүскээбитэ. Спорка волейболу ордорон 2003 сылтан "Сахамедстрах" сүүмэрдэммит хамаандатыгар оонньоон саҕалаабыта. Оонньуурун тухары элбэх ситиһиилэнэн, араас номинациялары ылан, олус диэн үөрэн-көтөн кэлэрэ.
Күрэхпит быйыл бэһис сылын ыытыллынна. Сылын ахсын хамаандалар эбиллэ тураллара олус үөрдэр. Ол курдук 2016 с. Улахан Ан, 2017с. Улахан Ан, 2018 с. Сахамедстрах, 2019 с. Таатта чулуу спортсменнара кыайыыны ситиспиттэрэ. Эҕэрдэ тыллар этиллиннилэр, "Тэбэнэт" кэрэ кыргыттара үҥкүүннэн киэргэттилэр, "Көмүс дорҕоон" вокальнай ансамбль ырыаннан киэргэттэ. Тапталлаах кэргэнэ Вера Валентиновна, күн күбэй ийэтэ Светлана Пудовна истиҥ-иһирэх, долгутуулаах тыл эттилэр, махтал тылларын тиэртилэр. Саша үөлээннэхтэрэ, биир хамаандаҕа оонньообут табаарыстара ахтан-санаан аастылар.
Икки күннээх эрийсиилээх, ыһыылаах-хаһыылаах күрэх түмүгүнэн Уус Алдан хамаандата кыайыы өрөгөйүн ситистэ.
Иккис миэстэни олохтоохтор үөрүүлэригэр Улахан Аан хамаандата ылла.
Үһүс миэстэҕэ Мэҥэ Хаҥалас хамаандатын уолаттара таҕыстылар. Кыайыылаахтарга кубогынан, мэтээлинэн, сыаналаах бириистэринэн наҕараадаланнылар. Күрэхтэһии чулуу оонньооччутунан буолла Уус Алдан спортсмена Егор Ноговицын уонна телевизорынан наҕараадаланна.
Саша аата өрүү маннык ааттана туруо, күрэхтэһиибит үүнэн-сайдан, кэҥээн, бар дьон биһирэбилин ылыаҕа диэн эрэнэбит уонна бу күрэххэ кыттар волейболистар инникитин өссө кыайыы үрдүк чыпчаалын ситиhэн, биhигини үөрдэ туруохтара диэн баҕа санаабытын этэбит!
Марина СОЛОМОНОВА,
Улахан Аан, Хаҥалас улууһа
Бырааттыы-убайдыы Андрей, Пуд, Василий, Айсен Тимофеевтар ийэлэринээн Светлана Пудовналыын
Ньургун Сивцев
Илья Тимофеев
Руслан Сивцев
