Орто-Халыма, Дьааҥы, Өймөкөөн, Усуйаана, Кэбээйи, Мииринэй, Сунтаар, Ньурба, Хаҥалас, Нам хамаандалара кыраһыабай, сытыы киирсиилэри көрдөрдүлэр. Сүрүн сыал-сорук: бастакы уонна иккис миэстэлэри ылаттаабыт хамаандалар үрдүкү лигаҕа тахсар чиэһи ылыахтаахтаахтар.
Болҕомто киинигэр – сүүмэрдэммит хамаанда
Чемпионат үөрүүлээхтик аһыллыытыгар Нам улууһун баһылыгын солбуйааччы Юрий Дьяконов, Саха Өрөспүүбүлүкэтин физическэй культураҕа уонна маассабай спорка Управлениетын начальнига Роман Оконешников, Саха Өрөспүүбүлүкэтин волейболга Федерациятын президиумун бэрэссэдээтэлэ, Ил Түмэн депутата Владимир Чичигинаров, Федерация толорооччу дириэктэрэ Күннэй Попова, Нам улууһун физическэй культураҕа уонна спорка управлениетын начальнига Павел Иванов, Нь.С. Тимофеев аатынан спортоскуола дириэктэрэ Василий Винокуров, сүрүн судьуйа Анатолий Чемерзанскай күрэхтэһии кыттыылаахтарын, көрөөччүлэри эҕэрдэлээтилэр.
Саха сиригэр бастакы волейболга күрэхтэһиилэр 1940 сыллаахха тэриллэннэр, бүгүн спорт маассабай көрүҥүнэн буолбута, волейболистар кэккэлэригэр 30 тыһ.киһи түмсэрин, 2015 сылтан күрэхтэһиилэр лигаларынан ыытыллалларын, хоту улуустар кытталлара, волейболистар оонньуур маастарыстыбалара үрдээн иһэрэ бэлиэтэннэ. Өрөспүүбүлүкэ эр дьоҥҥо сүүмэрдэммит хамаандата Благовещенскай куоракка түмүктэммит Дальнай Восток Кубогар бастакы миэстэни ылбыта улахан ситиһии быһыытынан сыаналанна. Хамаанда аатыттан Сергей Голоков харда тыл эттэ.
Владимир Чичигинаров Сахаларын сирин соргулаахтык ааттаппыт хамаанда волейболистарыгар Сергей Голоковка (Таатта-Ханалас), Олег Малышевка (Таатта), Айтан Кириллиҥҥэ (Сунтаар-Мэҥэ-Хаҥалас), Тимур Стручковка (Дьааҥы), Намтан Данил Лисачевка, Денис Осетровка, Андриан Григорьевка, Кирсан Эверстовка, Айтал Шишигиҥҥа уонна тренер Айсен Жерготовка Махтал сурук уонна спортивнай форма ылыналларыгар сертификат туттарбыта дохсун ытыс тыаһынан доҕуһуолланна.
Пресс-конференция
Күрэхтэһии быыһыгар Благовещенскай государственнай педагогическай университет аһаҕас Кубогын кыайыылаахтарын кытта пресс-конференция тэрилиннэ. Волейбол Федерациятын президиумун бэрэссэдээтэлэ, сүүрбэ сыл хирург-бырааһынан үлэлээн, үгүс дьону үрүҥ тыыннарын өрүһүйбүт, “Туймаада” волейболун кулуубун оонньооччута, турникка 12-16 тардынар “Тардыныы бөлөх” көхтөөх чилиэнэ, чөл олох аргыстаах Владимир Чичигинаров салайан ыытта.
Волейболистар – быһааччы (доигровщик) Денис Осетров, көмүскээччи Данил Лисачев, сибээстээччи (связующай) Кирсан Эверстов “бастыырга эрдэттэн эрэллээхтэрин, финалга Амурскай уобалас хамаандатыгар 0:2 хотторон иһэннэр, хомунаннар, тахсыылаахтык оонньооннор, кытаанах мүччүргэннээх киирсиигэ 3:2 кыайбыттарын, “Лондонскай финал буолла” дэппиттэрин, Благовещенскайга олорор, үөрэнэр биир дойдулаахтара, “Кыталык” түмсүү студеннара ыһыытаан-хаһыытаан улаханнык өйөөн көмөлөһөннөр, заал иһэ бүтүннүү “Саха” хамаандатыгар ыалдьыбытын, атын хамаандалар волейболистарын кытта хаартыскаҕа түһүспүттэрин, билсибиттэрин, доҕордоспуттарын кэпсээтилэр.
Нам спортоскуолатын иитиллээччилэрин үрдүк таһымҥа таһаарары ситиспит улахан дьоҕурдаах уонна сатабыллаах тренерэ, Саха Өрөспүүбүлүкэтин сүүмэрдэммит хамаандатын сүрүн тренеригэр тиийэ үүммүт Айсен Ельфидифорович Жерготов “профессиональнай волейбол баар буолуохтааҕын туһунан былааннаахтарыттан” бэйэтин этиитин саҕалаата. “Россия үрдүкү лигатыгар тахсар сыал-сорук турарын, Саха Өрөспүүбүлүкэтин Бырабыыталыстыбатын бэрэссэдээтэлин солбуйааччылар Дьулустаан Борисов, Сергей Местников этиилэрэ олоххо киллэриллэллэригэр эрэллээхтэрин, 190 см тахса уһун волейболист уолаттар элбээн иһэллэрин, дойду регионнарыттан үрдүктэринэн хаалсыбаттарын, Россия волейболистара аан дойдуга күүстээхтэринэн ааҕыллалларын, олимпийскай оонньууларга түөрт иһиттэн түспэттэрин, ыччаттар аан дойдуга бастыылларын, Дальнай Востокка ситиһии өрөспүүбүлүкэ оҕолоругар, спортоскуолаларга стимул үөскүүрүгэр тиэрдэрин, Саха сириттэн тахсарга ыарахаттары аахсыбакка, үүнэргэ-сайдарга кыахтар баалларын, онуоха Федерация, спорт Министиэристибэтэ үлэни ыыталларын, махтанарын” иһитиннэрбитэ биһирэннэ.
Нь.С. Тимофеев аатын сүгэр Нам олимипийскай эрэллэр спортоскуолатын дириэктэрэ Василий Винокуров “спортоскуола волейболга эппиэтинэстээҕин, Дальнай Востокка кыайыы алҕас кэлбэтэҕин, уон сыллаах үлэнэн ситиһиллибитин, интернат баара буоллар өрөспүүбүлүкэттэн дьоҕурдаах оҕолору мунньуохтарын сөбүн, Федерация өйүүрүн, спонсордар баалларын, кинилэргэ махтанарын, Россияҕа тахсарга путевканы ыларга үлэ барарын”; спортоскуоланы тэрийсибит бастакы дириэктэр, билигин культура Управлениетын начальнигынан үлэлиир Семен Ядрихинскэй историяны ахтан ыларыгар, “уон сыллааҕыта волейбол отделениетын тэрийэргэ быһаарыы ылыллыбытын, волейбол тахсыбат спорт көрүҥэ диэн мөккүөр үөдүйэ сылдьыбытын, госкомспорт бэрэссэдээтэлэ М.Д. Гуляев сөптөөх быһаарыы ылбытын, оҕолору кытта үлэлиир дьоҕурдаах тренердэр анаммыттарын, Айсен Жероготовтыын хамаанданы илдьэ Благовещенскайга күрэхтэһэ маассыынанан айаннаан тиийэ сылдьыбыттарын, Хабаровскайдарга хоттороннор кыһыы-аба буолбутун, Айсен тренер быһыытынан кыайыыга дьулуурдаахтык, кыаҕын толору биэрэн үлэлиирин” - эттилэр.
Саха Өрөспүүбүлүкэтин физическэй культураҕа уонна маассабай спорка Управлениетын сытыы-хотуу начальнига Роман Оконешников “маассабас баарын, маастарыстыбаҕа үлэни күүскэ ыытарга уолдьаспытын, үрдүк таһымтан кыайыы психологията, сайдыы өйө-санаата киирэрин, Россия үөрэнээччилэрин спартакиадатыгар ситиһиилээхтик кыттар наадатын, волейбол оскуолалара Намҥа уонна Чурапчыга көдьүүстээхтик үлэлииллэрин, сүүмэрдэммит хамаанда орто сааһа 20 сааска тэҥнэһэрэ кэскили көрдөрөрүн” тустарынан бэлиэтээтэ.
Бастыҥнар - үрдүкү лигаҕа
Балассааккаҕа болҕомтону тардар интэриэһинэй киирсиилэр буоллулар. 1-кы лига оонньооччулара дьиҥ волейбол бырааһынньыгын бэлэхтээтилэр. Хамаандалар састааптара сүрдээҕин эдэрсийбит. Уһун волейболист уолаттар бэрт чэпчэки, сылбырҕа, имигэс хамсаныыларынан, салгыҥҥа үөһэ уһулута күөрэйтэлээн тахсыталыыллар, самнарыылаах охсуулары, “блоктары”, “албыннааһыннары” хото көрдөртөөтүлэр. Өрөспүүбүлүкэ сүүмэрдэммит хамаандатын волейболистарын оонньуулларын көрөөрү саала туолан ньиргийэн олорбута үчүгэй буолла. Харахпытын араарбакка көрөммүт, улаханнык астынныбыт. Нам волейболистара техникалара чочуллубута, кыраһыабай оонньуулара сүргэни көтөхтө. Кирсан Эверстов мээчиги хайа да балаһыанньаттан “олордон” туруорарын, мээчиги балассаакка “аһаҕас миэстэтигэр” түһэрэрин, Бочууров эҥкилэ суох күүстээх “подачата”, хаҥас илиитинэн сытыытык охсоро, Денис Осетров сытыы охсуутунан мээчиги “тоһоҕолоон” кэбиһэрин, Данил Лисачев комбинацията, Андриан Григорьев “саба баттыыр блога” уо.д.а. эриэккэс оонньуулара өрөспүүбүлүкэ волейболга оскуолата сайдан иһэрин, иникилээҕин чаҕылхай көстүүлэринэн буоллулар.
Түмүккэ, финалга Нам уонна Мииринэй хамаандалара утарыта көрүстүлэр. Кыайыы туһугар дьүккүөрдээх, сытыы тактическай комбинациялардаах абытай киирсиигэ Намнар күүстээх утарсааччыларын 2:0 баһыйаннар, 1-кы лига чөмпүйүөннэринэн буоллулар. Дальнай Восток чөмпүйүөннэринэн буолбуттарын итэҕэттилэр. Үрдүкү лигаҕа таҕыстылар. Үһүс бириистээх миэстэҕэ Уус-Майа хамаандата үһүс бириистээх миэстэлэннэ.
Уһулуччу үчүгэй оонньуулары көрдөрбүт волейболистар анал ааттарынан биһирэннилэр: “Бастыҥ көмүскээччи” Андриан Григорьев (Нам), “Бастыҥ быһааччы” Данил Воронцов (Мииринэй), “Бастыҥ оонньооччу” Денис Осетров (Нам), “Бастыҥ ситимнээччи” Андрей Филиппов (Уус-Майа) номинациялар хаһаайыннарынан буоллулар. Кыайбыт уонна бириистээх миэстэҕэ тиксибит хамаандалар кубоктарынан, мэтээллэринэн, дипломнарынан наҕараадаланнылар.
1-кы лига чемпионатын түмүгүнэн Нам уонна Мииринэй хамаандалара үрдүкү лигаҕа таҕыстылар. Эҕэрдэлиибит! Волейболистарбыт ситиһиилэринэн үөрдэ турдуннар!
Баһылай Посельскай
