Чуолаан,улууспутугар культурнай- спортивнай комплекс тутуллуоҕуттан, бу баараҕай тутуу уораҕайыгар үлэ күөстүү оргуйар. Наммыт спордун түстүүр биһиги инники эрэллэрбит ситиһиилэринэн пьедестал үрдүк чыпчаалыгар тахсаннар,дьоннорун-сэргэлэрин өрүү үөрдэллэр.
Маннык түгэни туһанан, Намнааҕы оҕо анал спортивнай оскуолатын сүрүн тренерын туһунан кылгастык сырдатыахпын баҕардым. Мин тирии мээчиги өрө тутан,чахчы күүстээх уонна дьүккүөрдээх санааларынан кэлбит, эдэр үөрэхтээх тренердэр идэлэрин,билигин даҕаны,хайгыы саныыбын. Ол иһин,бу сыралаах үлэ көлөһүнүн түмүгэ ситиһиигэ тиэрдэрин испэр эрдэттэн эрэнэ санаабытым. Чуолаан, бүгүҥҥү сырдатыым дьоруойа,эдэр анал үөрэхтээх тренер А.Е. Жерготов буолар.
Икки сыллааҕыта Айсен Ельфендирович дьиэ кэргэнинэн көһөн кэлэн, талбыт идэлэрин баһылыы саҥа аһыллыбыт республикатааҕы оҕо анал спортивнай оскуолатыгар волейбол көрүҥүн үөрэтэ кэлбиттэрэ. Икки эрэ сыл иһигэр, кэргэннии Жерготовтар кыргыттары уонна уолаттары чыҥха атын саҥалыы көрдөрүүлээх эрчийэр бэрээдэги тутуспуттара. Ол түмүгэ ситиһиигэ тиэрдибитин,аҕыйах холобурунан бэлиэтээн ааһыахпын баҕардым. 2016 сыл түмүк ыйыгар Ытык-Күөлгэ ыытыллыбыт Таатта улууһун баһылыга М.М.Соров бирииһигэр Нам иитиллээччилэрэ олус табыллан оонньообуттара. Ол курдук, утарылаһааччыларын барыларын кыайан,ол эрэн, түмүк тахсыытыгар олохтоох хамаандаҕа хаачыстыбанан сабырыйтаран иккис миэстэни ылан,бастакы улахан ситиһиилэммиттэрэ. Онтон саҥа үүммүт сылбытыгар,олунньу ый 18-19 күннэригэр оҕо спортивнай оскуолаларын икки ардыларыгар ыытыллыбыт турнирыгар уон икки хамаанданы кэннигэр хаалларан кыайыы өрөгөйүн билбиттэрэ. Манна кыргыттарбыт үһүс миэстэни былдьаһыыга Үөһээ-Бүлүү хамаандатыгар баһыйтаран,төрөөбүт улуустарыгар истиҥ сыһыаны уонна чахчы эрэл кыымын хаалларбыттара. Бу оҕолор үөрүүлэрин уонна махталларын,биллэн туран,тренердэригэр Аина Жерготоваҕа уонна Диана Поповаҕа тиэрдибиттэрэ муҥура суох. Сотору кэминэн оҕолорбутугар республика чемпионата күүтэр. Бу ааспыт күннэргэ Дьокуускай куоракка ыытыллыбыт улахан дьоммут II-с лигатын сүүмэрдиир күрэхтэһиитигэр кыргыттарбыт уонна уолаттарбыт сүрүн састааптара пьедестал үрдүк үктэлигэр тахсаннар, бастакы лигаҕа эрэллээхтик киирдилэр. Хамаанда састаабыгар кэргэннии Жерготовтар кыттаннар, бэйэлэрин уопуттарынан холобур буолбуттарын бэлиэтиир тоҕоостоох.
Анатолий Софронов – Онтуон, Нам.
